Imgerut 109 - Labrador Inuttitut Heritage Bible

Nallautainek Messiasib ômigijingit pivlugit.

Davidib imgerutâ imgerutigilugo.

¹ Gude nertornarutigijara, nippangerniarnak.

² ᴋannitik Gûdeᴋangitut nallangaitoksôjullo angmarmagit akkerartorlunga, oᴋarlutiglo uvamnut oᴋannut saglojunnut.

³ Illumavânga oᴋautsinnut ômisungnelingnut, akkerartorpângalo pitjuteᴋaratik.

⁴ Nagligigapkit, taimaimat kiglornipânga; uvangale tuksiarpunga.

⁵ Idluitomik akkiniarpânga ajungitomut, ômigijaunermiglo naglingnermut.

⁶ Gûdeᴋangitok angajoᴋângortiuk tâpsomunga; Sâtanaselo nangerle tâpsoma tallerpiane.

⁷ Erᴋartortaugune passijaksaunerartaule, tuksiarningalo ajorningorle.

⁸ Uvlungit ikkitôlerlit, pinniarᴋojauningalo assianut pijaule.

⁹ ᴋittorngangit illiarsungorlît nulliangalo uigarningorle.

¹⁰ ᴋittorngangit tammarnartovingme saksârtôlit ᴋennulutiglo ᴋennerlutiglo (nerᴋiksamingnik) sujuksimavlutik.

¹¹ Pijomatudlartub pinnasuarligit perᴋutingit tamaita; takkorngartallo arktautigiligit perᴋutingit.

¹² Ajungitullijoᴋartailile kinamik tâpsominga, kialonêllo nâpkigitaililigit illiarsuᴋotingit.

¹³ Kinguvângit nungutaulît; attingit kinguvarêt aipangine pêjartaulit.

¹⁴ Atâtagilauktangita idluitulliningit issumagijaulît Nâlekab sângane, anânangatalo ajorningit pêrtautaililît.

¹⁵ Nâlekab ijîngme sângangnêtitsainarligit, tâpkoalo erᴋaumajauningat pêjarlerliuk nunamit.

¹⁶ Tamana pivlugo issumalaunginame nâpkigosugomavlune; ajulertorle, aklujorlo kiksartorlo unangmigamiuk toᴋᴋotsomavlugo.

¹⁷ Ominaut pijomalaukpa, tikkitauniarivok tâpsomunga; saimartitaunek pijomalaungilâ, tagva ungasingniarivok tâpsomangat.

¹⁸ Ominaullo attilaukpâ uvinerungmitut; itterporlo illuanut immektut orksutullo sauninginnut.

¹⁹ Tagva taimaivigiliuk annorâktut attortamitut; tapserutitut, tapseruserutigitsainartamitut.

²⁰ Taimak akkilertaulit tâpkoa Nâlekamut akkerartortikka, idluitunniglo oᴋauseᴋartut tarniga akkerartorlugo.

²¹ Igville Nâlegak, Nâlegak, aiparilaunga, attit pivlugo; saimaveᴋarnît manigornerigapᴋo piulilaunga.

²² Aklugama, pattangalungalo, ômattigalo serᴋomisimavok illumne.

²³ Nungusârpunga tachaktut nakiglilertotut, aijaliktauvunga piglertaujârtutitut.

²⁴ Sêrᴋûka nukkingerôtivuk nerritailinermut; uvinigalo sallukpok ᴋuinijungnairlune.

²⁵ Mittautiksaujariaᴋarpungalo tâpkonunga; takkoleraiguninga illeᴋettamârput.

²⁶ Illilertulaunga Nâlegak Gûdîk; iᴋajulaunga saimaveᴋarnît malliklugo;

²⁷ Tukkisilerᴋovlugit tamana igvit aggarigangne, igvit Nâlegaujotit tamattominga pinniaravit.

²⁸ Oᴋarnerlotjileraikpatta, tagva igvit saimartitsilaurit. Akkerartoraikpânga, tagva kangusuktitaulît; kivgaᴋotille ᴋuviasugle.

²⁹ Akkerartortikka mamailisartaunermik attititaulit; kangusuktitaunermiglo annorârtitaulit ullingmik sorlo.

³⁰ Nâlegak ᴋujagidlaromavara ᴋannimnut, nakorijomalugolo unnuktut akkorngane.

³¹ Aklujub tallerpiane nangermat ikajoromavlugo tâpᴋonangat, innôsinganik pitlaraksauneraijunnit.