Imgerut 108 - Labrador Inuttitut Heritage Bible

Nertordlernek Gûdib pitsiarninganik, nertornarninganiglo; tuksiarnerlo ikajortaujomamut.

Davidib imgerutâ.

¹ Gude ômattiga oppalungairsimavok; imgeromavunga, nipliajogomalungalo, nertornarneratauk (tarniga).

² Atte Psaltere Harfelo! uvlarârsukut makkitsomavunga.

³ ᴋujagijomavagit Nâlegak innuᴋattigêksuit akkorngane, nertorlutit imgervigijomavagit Inuit akkorngaane.

⁴ Saimaveᴋarnît pingmat ᴋillaub îninga tikkidlugo, mikseᴋârnîllo nuvujat tikkiningit tikkidlugit.

⁵ Kangattarit Gûde ᴋillaub ᴋollânut, nertornarnîllo pile nunnannut illûnainut;

⁶ Nagligijattit piulijauᴋovlugit. Ikajolaurit tallerpingnut, tussarlungalo.

⁷ Gûde oᴋarpok ivsornaitoveᴋotimine, tamana pivlugo ᴋuviasukpunga; Sicheme avigomavara, Suchotiblo ôktoromavara.

⁸ Gilead perᴋutigivara, perᴋutigivara Mannasse, Efraimelo sapputsauviksauvok niaᴋumnut; Juda tunnijijigivara perᴋojanik.

⁹ Moabe ubvarvigivara; ittiggagutiga tassiutijomavara Edomib ᴋânganut; Filistêa igiaᴋomijarutigijomavara.

¹⁰ Kia tassioromavânga iglugasaksoarnut sôngojunut? Kia aiparijomavânga Edomemut?

¹¹ Igvit pinniarniangilatit Gûde, ajaktuijotit uvaptingnik, aularlungilatillo Gûde kattimgajoᴋotivut illagilugit?

¹² Ikajorneᴋartitigut kappiasungnerme, Inuit ikajorninget piutsangimat.

¹³ Gûde illagellugo pinniarnersoarnik pinniaromavogut. Tâpsoma ômigijivut tullerniarpait.