Imgerut 107 - Labrador Inuttitut Heritage Bible

ᴋujalijutiksak Gûdemut piuliklerninga kappianartunnit sunatuinarnit pivlugo.

¹ Nalegak ᴋujagissiuk, illanâᴋarmat, pitsiarningalo îtsainarmat issoᴋangitomut.

² Taimak oᴋarlît Nâlekab piulijangit, tâpsoma kappianartomit piulilauktangit;

³ Nunannillo kattersulauktangit unangat, pângat, avangat imarbingmillo;

⁴ Tammarlutik arvertalauktut sunaᴋangitome apᴋosiniôlungitome, iglugasaksoasilauratiglo igloᴋarvigijungnartamingnik;

⁵ ᴋâklutik immerudlarlutiglo, tarningillo perlilerlutik illungine;

⁶ Nâlekamullo niplialauktut kappiagijamingne, tâpsomalo piulilauktangit kappiasungninginnit;

⁷ Tassiulauktangillo apᴋosinekut tamarnangitokut, aiᴋovlugit iglugasaksoarnut, igloᴋarvigijungnartamingnut:

⁸ Tâpkoa Nâlegak ᴋuviagijaksarivât, pitsiarninga, tattamnartulliningillo pinniarnerijangit Inuit ᴋittornganginut pivlugit.

⁹ Tarne imeruktok namaksitimago; tarnelo ᴋâktok illumertimago ajungitomik.

¹⁰ Iksivajuksaulauktut tâktome tâksinermelo, parngnanairsortauvlutik ajoringorsiume, kikkiangmelo;

¹¹ Gûdib ôᴋausingit nâlalaunginamigit, ᴋotsingnerpângojublo attannertuininga nachogilauramitsuk;

¹² Tamanna pivlugo tâpsoma ômattingit ᴋannoêtomut miklilertimagit, nallaᴋovlugit tagvane, ikajortaunatiglo kinamut;

¹³ Nâlekamullo niplialertut kappiagijamingne; tâpsomalo iᴋajulauktangit kappiasungninginit.

¹⁴ Tassiorlugillo târmit, tâksinermillo, ᴋellarutingillo kiktoratilugit:

¹⁵ Tâpkoa Nâlegak ᴋujagijaksarivât, pitsiarninga tattamnartulliningilo Inuit ᴋittornganginne pinianerijangit pivlugit.

¹⁶ Upkoat ᴋanujaujut pittarmagit, sanneroallo kikkiangojut annaulugit navingmagit.

¹⁷ Sillaitut oᴋumaiksartitaulauktut, arvertarnitik tappanitik, ajornitiglo pivlugit;

¹⁸ Tarningita nerᴋiksat tamaita makkojugilaungmagit, ᴋannilauktullo toᴋᴋub ittervinginnut;

¹⁹ Mannalo niplialauktut Nâlekamut kappiagijamingne, tâpsomalo iᴋajulauktangit kappiasungninginnit;

²⁰ Oᴋautsine tillikliutivait, pijungnaitilugillo; piulilugillo ittersâlunginnit:

²¹ Tâpkoa Nâlegak ᴋujagijaksarivât, pitsiarninga tattamnartulliningillo pinniarnerijangit Inuit ᴋittornganginne pivlugit;

²² Tunnijijuksaulutiglo tunnergutinnik ᴋujalijutiksannik, pinniarningillo unnipkautigilugit igiaᴋomijarlutik.

²³ Umiaksoakut umiaktortut imarbiksoarme, niuveriartortullo imaksoakut;

²⁴ Nâlekab piniarninginik takkolauktut, takkolauktullo tâpsoma tattamnartullininginnik ittinnerme;

²⁵ Oᴋalaurangame akᴋonaksoaᴋartitsilunelo, makkitatitsijomik mallingnik.

²⁶ Tâpkoa ᴋongmuartitaungmatta ᴋillangmut, sittotitaulutiglo ittinnermut, tarningit kappiasumut mungolermatta;

²⁷ Tallangajotut aulajoksiormatta sannepiktorarmattalo, illisimaililermattalo;

²⁸ Niplialermattalo Nâlekamut kappiagijamingne, tâpsomalo tassiortangit kappiasungninginnit,

²⁹ Saimarlugolo sillarnerluksoak, aklairartuinarᴋovlugo, maggillo nokkarmatta;

³⁰ ᴋuviasulertullo ᴋassungangmat, tâpsomalo kissarvingmut âmagit tussugijangat malliklugo:

³¹ Tâpkoa Nâlegak ᴋujagijaksarivât, pitsiarninga, tattamnartulliningillo pinniarnerijangit Inuit ᴋittornganginne pivlugit;

³² Nakorijaksarilugolo innugasaksuit illagêngninginne, nertorlugolo angajuklit ᴋachimioningane.

³³ Tâpsoma kôgut sunaᴋajuitungortipait, puailavillo immermik imerungnârvingortipait;

³⁴ Nunalo perutsianartok naksangortipâ sioraujalingmut, tâpkoa nunaᴋartut tagvane kassêningit pivlugit.

³⁵ Sunaᴋajuitorlo tassingortipâ imektalingmut, nunnalo pannertok puailavingortipâ imilingnik.

³⁶ ᴋâktullo pitipait tagvunga, iglugasaksoarnik âᴋiksoerᴋovlugit igloᴋarvigijungnartamingnik;

³⁷ Perorsêvîllo kangasuivigilugit perᴋovlugit, Weineliksanniglo illijerᴋovlugit, Jârinelo tamaine perortunnik perᴋovlugit.

³⁸ Pitsartutipaillo unnuksivalliadlarᴋovlugit, nergjutingillo ikkitôtilungilait;

³⁹ Nukkingerotilauᴋârmagit, okkungatilauᴋârmagillo ᴋanoêtub tattininganut, issumajârnermullo.

⁴⁰ Nachonarnek nâvipâ attannernut, saksartilaitalo inuᴋangitome apᴋosineᴋangitome;

⁴¹ Aklujorlo ᴋakᴋitipa pattanganinganit, kinguvângillo kattimgajutitut îtipait.

⁴² Tamanna idluitailijut takkoniarpât, ᴋuviasungniarlutiglo; kassênerlo tamât nippangertitauniarpok.

⁴³ Kina sillatôva puigortaililunelo tamattominga? Tagva tukkisiniarput, ᴋannok unnuktigijunik ajungitullinernik Nâlegak sakᴋêmat.