Imgerut 106 - Labrador Inuttitut Heritage Bible

ᴋujalijutiksak Gûdib ajungitulliningit pivlugit, inuᴋotine tappatôjut nâpkigitsainarlaungmagit.

¹ Hallêluja. Nalegak ᴋujagissiuk illanâᴋarmat, pitsiarningalo îtsainarpok issoᴋangitomut.

² Kia Nâlekab pinniarnersoangit nâlugit oᴋautigijungnarpagît, nakorijungnarlugo nertornarninga tamât?

³ Pillorikput perᴋojamik nâlaktut, piniatsainartullo idluartomik.

⁴ Nâlegak erᴋaringa, saimaveᴋarnît, angerutigilauktat innuᴋotingnut malliklugo. Nallipsalaunga ikajornernut.

⁵ Takkojungnarᴋovlunga annerimajavît illingatsiarninginik, innuᴋotivillo ᴋuviasungninganik, ᴋuviasuteᴋarᴋovlunga, nertortitsungnarlungalo kingormgutijattit illagallugit.

⁶ Ajortullilaukpogut atâtagilauktavut illagilugit; namangitullilaukpogut, Gûdeᴋangitôlauklutalo.

⁷ Atâtagilauktapta Egipteneme tattamnartullinitit tukkisijomalaungilait; pitsiarnersoarnît erᴋalaungilât, tappatôlaukpullo imarbingme, imarbingme iviktalingme suvlulingnik.

⁸ Ikᴋajulaukpaillo attinne pivlugo, sôngonine sakᴋertitsomavlugo.

⁹ Imarbiglo iviktalik suvlolingnik suarpâ, tagva ipterilingalerpok; tassiorpaillo ittinertigut, sorlo sunaᴋajuitokut.

¹⁰ Iᴋajulaukpaillo tâpsoma illulugvigijingata agganginnit.

¹¹ Immaksuillo akkerartortingit ullikpait, attauserlonêllo amiakolaungilak.

¹² Tagva oᴋausingit okperivait nertornarningalo imgerutigivât.

¹³ Pinniarningille puigorsârpait; uttakkilaungilallo attanertuininganik.

¹⁴ Ikligosulerpullo sunnaᴋajuitome, Gûdelo ôktorpât innuᴋangitome.

¹⁵ Tâpsomalo tuksiartipait, nûsilingnartorlo tillivâ ikligosungningita akkorngannut.

¹⁶ Môsemullo kippalilaukput tangmârvingme; Aronemut ivsornaitoᴋotinganut.

¹⁷ Nuna ingminik angmarpok êlugolo Datane, ullikpaillo Abiramib kippaliᴋattigijangit.

¹⁸ Ikkoma ikkilertaulaukpok kippalidlartoᴋattigêt akkorngane; ikkoalaniub Gûdeᴋangitut ikkipait.

¹⁹ Nochangoak sannalaukpât Horebeme, tuksiarvigivâllo, adsingoak kovijaumajok.

²⁰ Nertornautigijatiglo ablatsângortipât tuktuvangmut iviksukᴋanik nerrijomut.

²¹ Gûde piulijitik puigorpât, taimak angijôtigijomik pinnialauktok Egipteneme;

²² Tattamnartullilauktok Hamib nunangane, kappianadlartunniglo pinnialauktok imarbingme iviktalingme.

²³ Oᴋalaukporlo, nungutsomavlugit; Môsesib tâpsoma annerimajangata ᴋoppak sângerlaungipago sângane, ᴋaningajârninga sangutilugo, asseroimarerᴋonago.

²⁴ Nunalo ivlernartok nachogilaukpât; oᴋausingit okperingilait.

²⁵ Oᴋaloᴋivullo tuppermingne; Nâlekab nippinga nâlalaungilât.

²⁶ Agganelo ᴋongmuartipait akkerartorlugit, ochotitsomavlugit sunaᴋajuitome;

²⁷ Kinguvângit egilugit nallojut akkornganut, nunannut siamartillugit.

²⁸ Baal-Peorelo ungagivât, nerrilutiglo Gûdingoat innôseᴋangitut tunnergusianginit;

²⁹ Ningaksarpâllo pinniarnermingnut; tagva kappianartok tikkitalâvok akkornganut.

³⁰ Tagva Pinehase tikkipok, idluarsailunelo pijoᴋartomik tamattominga; tagva kappianartok nokᴋartitauvok;

³¹ Tamannalo idluarsititaujutigijanganut illingatitautsainarlaukpok issoᴋangitomut.

³² Ningaksarpâllo imektarvingme akkerartornermik attelingme, Môse aglât ᴋanoêtitaulaungmat pivlugit.

³³ Annerninga ningaksarmatsuk, opallortornermullo oᴋautsit illangit annivut tâpsomangat.

³⁴ Inuᴋattigêksuillo taipkoa nungulaungilait, Nâlekab perᴋolauralloarmagit.

³⁵ Aᴋᴋupulle ingminik nallojut akkornganut, illiniarlutiglo tâpkoa pinniarninginnik.

³⁶ Kivgartorlutiglo tâpkoa gudingoanginik, tâpoalo nigarutigivait ingmingnut.

³⁷ Ernitiglo pannitiglo tunnergutautipait Sâtanasinnut.

³⁸ Auglo passijaksaungitok kovilaukpât, ernimik pannimiglo aungit, tunnergutautilauktamik Kanaanemiut Gûdingoanut, nuna akkiliksannut aungmik ulliktaulaungmat;

³⁹ Ivsornartipullo pinniarnermingnut, ajortullilutiglo illusermingnut.

⁴⁰ Tagva Nâlekab ningarninga illungertulerpok innugasaksoaᴋotine pivlugit, kingormgutijanelo makkojugililaukpait.

⁴¹ Tunnivaillo nallojut agganginut, ômigijingit attanioterᴋovlugit tâpkonunga.

⁴² Omigijingitalo, nênerlaukpait; manigotititaulutiglo tâpkoa agganginnut.

⁴³ Tâpsoma piuleᴋattalaukpait; ningaksarlaukpâlle ᴋajusinermingnut, ikkitôlerpallialaukpullo idluitullinitik pivlugit.

⁴⁴ Kappiagijangallo takkosarpâ, ârusungningit tussaramigit;

⁴⁵ Erᴋaumalaukporlo pivlugit angersimanerminik, ᴋaᴋᴋialerporlo pitsiartoksônine malliklugo.

⁴⁶ Nâpkigijautilaukpaillo illûnainut parngnanairsortinginnut.

⁴⁷ Ikajortigut Nâlegak Gûdivut, kattersortigullo nallojunnit; nertordlerᴋovluta atternik hailigeôjomik, nakorsarᴋovlutalo nertornarnernik.

⁴⁸ Nertortaule Nâlegak Israelib Gûdinga issoᴋangitomit issoᴋangitomut; innugasaksuillo illûnamasiatik oᴋarlît: Amen Halleluja.