Imgerut 105 - Labrador Inuttitut Heritage Bible

ᴋujalijutiksat Gûdib ajungitulliningit atâtagilauktanut pivlugit.

¹ Nalegak ᴋujagissiuᴋ, attingalo oᴋâlautigissiuk pinniarningit akpautigissigik inuᴋattigêksuit akkorngane.

² Imgervigissiuk nertorlugolo; tattamnartulliningit tamaita oᴋautigissigik.

³ Attinga hailigeojok nertorutigissiuk; tâpkoa Nâlekamik ᴋennerasuartut ômattingit ᴋuviasuglît.

⁴ Nâlegak sôngoningalo apperᴋutigissigik; kênanga ᴋennitsainarsiuk.

⁵ Erᴋaumalersigik tattamnartulliningit, pinnialauktangit; nellunaikutangit ᴋaningatalo idluarsainingit.

⁶ Illipse kivgangata Abrahamib kinguvângit; illipse anerimajangata Jakob ᴋittorngangit.

⁷ Tâmna Nâlegauvok Gûdigijavut; tâmna idluarsaivok sillaksoarme illûnâne.

⁸ Angersimanine erᴋaumavâ issoᴋangitomut, oᴋautsit angerutigilauktane kinguvârênut 1,000 dinut.

⁹ Angerutigilauktane Abrahamut, oᴋarmaringninelo Isaangmut.

¹⁰ Tamannalo idluarningortipâ Jakomut angerᴋattigêngningortilâlo issoᴋangitomik Israelemut.

¹¹ Oᴋarlunelo: Igvit tunnitivigijomavagit Kanaanib nunanganik, kingormgutijapse imerautinganik.

¹² Ikkitôtillugit erᴋanangitotillugillo tujormijangotillugillo tâpsomâne.

¹³ Nûᴋattalaukpullo innuᴋattigêksoarnit innuᴋattigêksoarnut; attaniovingnit innuᴋattigêksuit assinginnut.

¹⁴ Akᴋonartautailitilaukpaillo Inuit nallianullonêt, attannîllo pitlalaukpait pivlugit,

¹⁵ Saimartitakka aktorniarassigik, Nallautaijoᴋotikkalo kiksartiniarassigik.

¹⁶ ᴋâksoarlo ᴋaiᴋovâ nunamut, ᴋaᴋᴋôjaᴋarungnaimariktitsilunelo.

¹⁷ Angut tillivâ tâpkoa sivurngane; Josefe niorvgutigijauvok kivgaulerᴋovlugo.

¹⁸ Ittigangit ᴋejuksoarmut ajoringortipait; timinga nallajariaᴋalaukpok kikkiangme.

¹⁹ Oᴋausingit tikkerᴋârtinagit, Nâlekab oᴋauserijangit, namaksititsiᴋartinagit tâpsominga.

²⁰ Tagva attannek tilliklerpok parngnanairutjarᴋolâlo; attaniojub innuᴋattigêksoarnut annititauᴋovâ.

²¹ Tâpsoma angajoᴋângortipâ igloᴋotiminut, pimajingortilâlo perᴋutiminik tamainik;

²² Angajoᴋâᴋotinginik aksorotjerᴋovlulugo issumaminik, sillatunermiglo ajochertuerᴋovlugo angajuklioᴋotinginik.

²³ Israelelo aulalaukpok Egiptenemut, Jakolo takkorngartaulaukpok Hamib nunangane.

²⁴ Innuᴋotinelo unnuksivalliatipait angijomik, sôngonersautipaillo ômigijinginit.

²⁵ Taipkoa ômattingit mumiktipait ômisuᴋovlugit innuᴋotinginik, pingitsertorlutiglo illusiâlungnik attorᴋovlugit kivganginnut.

²⁶ Tâpsoma kivgane Môse tillilaukpâ, Aron annerilauktane.

²⁷ Tâpkoa tâpsoma nallunaikutangit pinialaukpait akkorngane, tattamnartulliningillo Hamib nunangane.

²⁸ Târmik tikkerᴋojilaukpok tâktitsilunelo; oᴋausingillo tappagilaungilait.

²⁹ Imingat ablatsângortipâ aungmut, toᴋᴋotsilunelo mingeriaᴋotinginik.

³⁰ Nunangat narrâjinik unuktovaksoarnik saᴋᴋêvok, attaningita inningine.

³¹ Oᴋalaukpok, tagva ômajokulluit tikkiput, komait kiglilervingine illûnaine.

³² Nattarᴋonarnik tunnitsivigivait sillalub inningane, ikkomablo ikkoalaninganik nunangane;

³³ Annaulerpaillo nappârtungit Weineliksak, Feigeliksallo, navikpaillo nappârtut kiglilervinginêktut.

³⁴ Oᴋalaukpok, tagva piglertaujârtut, mingôjârtullo kittiksaungitut tikkiput,

³⁵ Nerrilaukpaillo iviksukkat tamaita nunangane nerridlarlutiglo perorsêviᴋotingita perortunginik.

³⁶ Annaulerpaillo nunangane erniangoᴋârtut illûnaita; pitsartuningita sivurlingit tamaita.

³⁷ Aularutivaillo, Silberemik Goldemiglo naksilugit; tâpkoalo kinguvârêngine, ᴋannoêtolikᴋalaungilak attautsemiglonêt.

³⁸ Egiptenemiut ᴋuviasulaukput aularmatta; erksinarningata tupvigilaungmagit.

³⁹ Tâpsoma nuvuja issivilaukpâ ulliksauᴋovlugo, ikkomalo ᴋaumaiᴋovlugo unuarme.

⁴⁰ Tuksiarput, tagva Wachtelinik tikkerᴋojilaukpok, namaksitipaillo ᴋillaub ᴋaᴋᴋôjanginik.

⁴¹ ᴋairtok angmarpâ, tagva imiksuit kôlaukput tagvangat, kôgut kôlaungmatta sunaᴋajuitome pannertome.

⁴² Oᴋautsinne ivsornaitut erᴋaumangmagit kivgaminut Abrahamut oᴋauserilauktane.

⁴³ Taimak innugasaksoaᴋotine aularutivait ᴋuviasuklune, annerimajangillo erᴋiêrtorlune.

⁴⁴ Tunitsivigivaillo nallojut nunanginnik; innuᴋattigêksuit perᴋutingit nangmineliutilugit piᴋovlugit.

⁴⁵ Nâlatsiartuksauᴋovlugit idluarijanginnik, ivlersijuksauᴋovlugillo malligaksauᴋojanginnik. Halleluja.