Imgerut 104 - Labrador Inuttitut Heritage Bible

Gûdib nertortauninga pingortitangit pivlugit.

¹ Tarnik Nâlegak nertoruk! Nâlegak Gûdîk angijovaksôvotit; ânanauvotit, ânanaunelijarlutillo inerᴋonadlartomik.

² Annorâᴋotit attortat ᴋaumaniôvok; ᴋillak issivipet tulleraraktut.

³ Igvit igloᴋotitit kattigoliungatipattit imermut; igvit nuvujat aksalloaligivâttit; agvertarpotit annorib esarungita ᴋângine.

⁴ Engeleᴋotingnik annoringortitsijotit, kivgakotingniglo ikkoalajungortitsijotit.

⁵ Nunamik tunganektârilauktotit tungavinganut, aulajuerᴋovlugo issoᴋangitomut.

⁶ Ittinnermut ullilaukpat annorâmut sorlo, immaksuillo ᴋaᴋᴋat ᴋânginêlaukput.

⁷ Suarnernulle ᴋemâlaukput; kallungnivît nippinganut, aulasâdlalaukput.

⁸ ᴋakᴋat kongmualilaukput, naksat kivilaukput unnunga innemut tunganektârlauktarnut tâpkonunga.

⁹ Igvit kiglilerveᴋartitsilaukpotit, tâpsoma ᴋângagut pingilat; amalo nunna ulligaksaringilât.

¹⁰ Igvit puailaᴋojivotit puailavingnik naksarne ᴋaᴋᴋat akkorngane kôᴋovlugit.

¹¹ Immertitserᴋovlugit naternaub ômajunginnik illûnainik, ômajullo nujuartut imerugungnaiterᴋovlugit ingmingnik.

¹² Tâpkoa sanniane ᴋillaub tingmiangit nunaᴋarput, nipjarlutiglo akkerᴋut attâne.

¹³ Igvit ᴋakᴋat immertipâttit igloᴋotingnit pângat; perortunnillo pingortitarnit nuna namaksititauvok.

¹⁴ Iviksuᴋanik perorᴋojivotit nergjutinnut perortutsianiglo Inuit attoraksanginik, nerᴋiᴋsannik ᴋaitsilutit nunab illuanit;

¹⁵ Weinelo ᴋuviasuktitserᴋovlugo innub ômattinganik, tautualo keblidlarᴋovlugo orksumut; ᴋakᴋôjarlo nakkokserᴋovlugo innub ômattinganik.

¹⁶ Nâlekab nappârtokotingit ipteᴋadlarᴋovlugit; Libanonib Cederekotingit tâpsoma illilauktangit.

¹⁷ Tagvane tingmitjat uvloᴋarput, Reigerillo (tingmitjat angijut) ᴋeblariktut innigivait.

¹⁸ ᴋakᴋat kingiktut ᴋemâviksauvut tuktujartunnut, ᴋairtullo ᴋairusuggit ukkalliaitsijannut.

¹⁹ Takᴋek taimailingatipat nallunaiᴋutauᴋovlugo nalliunernut; seᴋᴋerngub nippivine nallungilâ.

²⁰ Târneᴋartitsivotit unnuangolerᴋovlugo; tagva nappârtut ômajungit tamaita aularput.

²¹ Loeviarᴋat ᴋallingoartut aksârnigaᴋaromamut, nerᴋiksarsiortullo Gûdemit.

²² Seᴋᴋinerle nuilerangat angerarput, innarlutiglo sittimingnut.

²³ Tagva innuk aularpok sullijaksaminut, perorsainerminullo unnuk tikkilugo.

²⁴ Nâlegak pinniarnitit angijovaksôvut, ila unudlartoksôvlutiglo. Illûnaita sillatôvlutit âᴋiksulaukpâttit, nunalo nâmavok perᴋutingnik.

²⁵ Imarbingme angijome nerrotôjoksôjomelo, tagvane aulavut kittiksaungitut, tamarmik, ômajut angijut, mikkijullo.

²⁶ Tagvane umiaksuit umiaktorput; tagvane arveᴋarpok, igvit sannalauktattit, tagvane kattiᴋovlugit.

²⁷ Illûnatik miperpâtit nerᴋiksamik tunnitsivigilugit perᴋovlutit nalliutome idluartome.

²⁸ Tunnitsivigijaraigungne, tagva kattersoivut; aggaktit issivigungne tagva perᴋutinnik namaksititauvut.

²⁹ Kênait ijerungne tagva ᴋoaksârput; annerningit pêrpâttit, tagva nungulerput, saningormilutiglo.

³⁰ Igvit annernît aulartipat, tagva pingortitauvut; nunablo tautua nutângortipat.

³¹ Nâlekab opinarninga issoᴋangitôvok; Nâlekab piniarnine ᴋuviagivait.

³² Nuna takkosarpâ, tagva sajukpilukpok; ᴋakᴋat aktorpait, tagva isserlukput.

³³ Nâlegak imgervigijomavara inôsera nâlugo, Gûdigalo nertoromavara înera nâlugo.

³⁴ Oᴋautigijakka ᴋuviagilerligit tâpsoma. Nâlegak ᴋuviasutigivara.

³⁵ Ajortullijut nungutaulerlît nuname, Gûdeᴋangitullo sorairlît. Tarnîk Nâlegak nertoruk! Halleluja!