Imgerut 102 - Labrador Inuttitut Heritage Bible

Imgerut ârutiksak.

Pattangajub tuksiarninga, angijomik kiksarune, ârusungnerminiglo nâvitsigune Nâlekab sânganut.

¹ Nalegak tuksiarnera tussalauruk, nipliadlarneralo tikkile illingnut.

² Kênait ijerniarnagotôk sâmnit kappianartoᴋartillugo, siut maniuk uvamnut; ᴋaigarsukuma tussarsâlaunga!

³ Uvlukka annigorsimangmatta isserluktut sorlo, saunikkalo ôtaumavut aumaliktutitut.

⁴ Omattiga annaulersimavok pannersimalunelo iviksukatitut, puigorama aglât nerrijaksakka nerrilugit.

⁵ Saunikka nippingavut uvinimnut, ᴋêamut annersaumingmullo.

⁶ Tûliojartotut sunaᴋangitomêtotut îpunga; imaingertaujârtotullo iglugasaksoarnêtotut asserorsimajune.

⁷ Pigârpunga, tingmiatullo innutôjotut iglub ᴋângane îpunga.

⁸ Uvlut tamaita ômigijima oᴋarnerlutigivânga uimajâdlarlutiglo akkerartortikka, angerput taivlunga.

⁹ Argjat nerrigapkit ᴋaᴋᴋôjaktut, imiksaralo akkupara ᴋugviornermik.

¹⁰ Illulungnît ningarnîllo pivlugik, kivilauramga egilungalo nunamut.

¹¹ Uvlukka tachaktut nakiglilerpalliajotut îput, pannilerpungalo iviksukatitut.

¹² Igville Nâlegâk îtsainarpotit issoᴋangitomut, erᴋaumajaunillo soraijuitsainaromârpok.

¹³ Igvit makkilaurittôk, Zionelo nâpkigilugo; nalliutingmat saimarvigilugo perᴋovlutit; nalliutok kajusimaviojok tikkisimavok.

¹⁴ Kivgaᴋotivit ujarangit ᴋuviasutigingmagit, sanningillo illapsugivait.

¹⁵ Tagva nallojut Nâlekab attinga sivuragijomârpât, attannîllo nunamêtut illûnatik opinarnît;

¹⁶ Nâlekab Zion iglugasalliormagit saᴋᴋermallo opinarnermine.

¹⁷ Tâpsoma ᴋemaksimajut tuksiarningit sâvigivait, tuksiarningillo nachogingilait.

¹⁸ Tamanna aglaktaule kinguvâksannut; innugasaksuillo pingortitaujuksat, Nâlegak nertoromârpât.

¹⁹ Tâmna takkosarmat ᴋotsiktonerminit ivsornaitomit; Nâlegak takkonârpok ᴋillangmit nunamut;

²⁰ Tussaromavlune parngnanairsortat annersaumininginnik, ᴋellarudjarijomavlunelo ᴋittorngannik toᴋᴋotaujuksannik.

²¹ Zioneme oᴋâlaᴋovlugit Nâlekab attinganik, nertornarninganiglo Jerusaleme;

²² Inuᴋattigêksuit kattijomârpâtta, attaniovîllo, Nâlegak kivgartoromavlugo.

²³ Tâpsoma pitsartunera mannigotitipâ apᴋome, uvlukka nailivait.

²⁴ Oᴋarpunga: Gûdîk pêrniarnanga uvluma ᴋetterᴋangane. Jâritit itsainarput soraijuitomik.

²⁵ Igvit sivurngane nuna tunganektâlaukpat, aggakpîllo ᴋillait sannagivait.

²⁶ Tâpkoa nungujomârput, igville itsainaromârpotit. Illûnatik nutaungitôvalliajomârput ulliktut; âblatsângoromârput anorâktut, igvit âblatsângortitsomârungne.

²⁷ Igville sorlo illingagavittut itsainarpotit, Jâritillo naggaserniatsangilet.

²⁸ Kivgaᴋotivît ᴋittorngangit îtsainaromârput, kinguvângillo sângne pitsornaromârput.