Imgerut 10 - Labrador Inuttitut Heritage Bible

Tuksiarnek ikajortaunermik, ômisuktut akkerartorungnarlugit.

¹ Nalegak, sôg ᴋaningitome nangerᴋît, ijerlutillo nalliutome kappianartome?

² Gûdeᴋangitub pimariuterlune pattangajok unangmivâ; pijauvut illuserlungnut taipkoa issumertulauktanginnut.

³ Gûdeᴋangitok uivênerminik nertuteᴋarmat ingminik, illipaujublo Nâlegak oᴋarnerlutigilugolo nachogivâ.

⁴ Gûdeᴋangitok issumamine piojorijome (oᴋarpok): apperᴋutigingilâ; illuserlungnermine tamaine Gûde sunaunginasugivâ?

⁵ Apᴋosiningit soᴋᴋosijuitsainarput; erᴋartuinivît poktoningat ᴋanningilak tâpsomunga; angutauserlune ômigijine illunaita pinniarvigivait.

⁶ Omamigut oᴋarpok: Aulaniatsengilanga; ᴋanoêtoᴋarniatsengimarikpok.

⁷ Kanninga tattapok oᴋauselungmik, nallangainermiglo uivêriklernermiglo; oᴋangata attâne ᴋannoêtoᴋarpok kappianartoᴋalunelo.

⁸ Iksivavok uttaᴋilunelo iglugasait terliarsivinginne, passijaksaungitullo toᴋᴋopait, angigutsivlune ijikita aklujut ᴋenenasuarpait.

⁹ Sagvangitome uttaᴋᴋivok Loevetut sittimine; uttaᴋᴋivok pattangajok angujomavlugo; anguvâ nulluaminut nussukuniuk.

¹⁰ Annaujaulune ochovok, pitsartuninganullo aklujut ochotitauvut,

¹¹ Omâmigut oᴋarpok: Gûdib puigorpâ, kênane ijerpâ, takkoniangitsainarpâ.

¹² Nâlegak Gûde makkitit, aggaktit ᴋongmuartikit; pattangajut puigortailikit.

¹³ Sôg idluitoâlub Gûde nachogijaksarivaûk, oᴋartuksaulunelo ômamigut apperᴋutigingilât?

¹⁴ Takkolaukpotit; ᴋannoêtut kappianartullo tautukpâttit; illijaksauvut aggangnut; aklujut perᴋovât illingnut; ikajorteôvotit illiârsungnik.

¹⁵ Gûdeᴋangitub tallinga serᴋomitsuk, idluitullo pinniarlungningit apperᴋutigikit, nachvarniangilettillo.

¹⁶ Nâlegak attanniotsainarpok issoᴋangitomut; nallojut nunanganit nungutaujomârput.

¹⁷ Pattangajut tussuningit tussalaukpâttit, Nâlegâk; igvit ômattingit ᴋollarungnaitimarikpâttit, siutivît kamagingmagit.

¹⁸ Illiârsuk aklujorlo idluarnermik sakᴋêvigigangne, innuk tattitosarungnaiᴋovlugo nuname.