Imgerusersoak 8 - Labrador Inuttitut Heritage Bible

Okpertoᴋattigêt Kristusiblo oᴋarᴋattigêngningita kingorlingiet. Nagligijaujub ânanausijauninga.

¹ ᴋannoktok anniginajarlagit, anânama iviangêgingnik amâmalauktok! Sillame naipinajarupkit, kunniklutit pijungnarajarᴋovlunga, kinamullo mittautigijauᴋonanga.

² Tassioromanajarpagit ittertitsomanajarlutillo anânama iglunganut, ajochertuivigijaksarnut uvamnik; tagvane immertitsomanajarpagit Weineᴋotimnik tauvluᴋutiksalingmik, paungâluillo Granatit iptinginnik.

³ Aggangit saumît niaᴋorma attânêput tallerpingitalo erᴋisimiarpânga.

⁴ Oᴋautimarikpapse illipse Jerusalemib panningit, nagliktanâra tuppaksarlugo perᴋonase, ᴋoksalâtinagolônêt, nâmagijauᴋârtinago tâpsomunga nangminek.

⁵ Kinauva tâmna majorartok sunaᴋajuitomit, egangajorlo illanârijaminut? Nâppartub paungâluliksab attâne tuppaksarlaukpagit, anânavit ernivigilauktangane illingnik, erniarilauktivit ernivigilauktangane illingnik.

⁶ Pitilaunga paisijotut ômattingnut, paisijotut tallernut. Naglingnek sôngongmat toᴋᴋotut, singnânerlo pallangaipok kappianaviktut. Aumaninga ikkomauvok ikkoalaniolunelo Nâlekamit.

⁷ Imersuit unnuktut naglingnek ᴋamitsungnangimatsuk, kôksuillônêt ippititsungnangimatsuk. Nalliata igloᴋotime perᴋutingit tamaita tunnijomanajarunigit naglingnek pivlugo, tamanna tamât sunaunajatsangilak.

⁸ Najaᴋarpogut mikkijomik, iviangeᴋangilarlo. Sunamik najavut piniarvigijaksarivittigô, manna oᴋauseᴋartuksaugupta tapsomunga?

⁹ Karmaukpat tagva tallulioromavogut ᴋângane silbereôjomik. Upkoangokpat, tagva sillapâromavavut sâtujanik ivjujunnik Cedereojunnik.

¹⁰ Karmauvunga, iviangêkalo nuvugosîktitun îpuk. Tagva tâpsoma ijîkita sângangne, taimangorpunga, ullapirsaumik nachvârtotut.

¹¹ Salomo perorsêveᴋalaukpok Weineliksamik Baal-Hamoneme. Perorsêvik Weineliksak tunnivâ udsertortunnut, attunît paunganginnut ᴋaitserᴋovlugit Silberlinginik tausendinik.

¹² Perorsêviᴋotiga Weineliksak sâmnêpok. Igvit Salomo pijuksauvotit tausendinik; 200 dinigle perortungita udsertortingit.

¹³ Nunaᴋartotit (nulliaksara) perorsêvingne, illaujut nippît tussarnârpât, tussalaulago!

¹⁴ Kemâlerit illanâk, adseᴋarlutillo tuktungajôjârtomik, tuktuarᴋamiglônêt ᴋaᴋᴋane tauvluᴋutiksatalingne.