Imgerusersoak 7 - Labrador Inuttitut Heritage Bible

Nagligijaujub nulliaksab nertortauganerninga. Tâpsoma naglingninga illanârijaminut (Nalekamut).

¹ Ananaudlarmek pissungnît ittiggagutine, igvit attanniub panninga. Makkitîkpît kotsinâgik mattarêkutitut îpuk illissimajub aggangita sannajangititut.

² Kallasît ermgusiârsuktut angmaloriktotut ipok, imiksamik ajoksajuitotut. Natjakik ᴋakᴋojaksatitut ᴋallerêktitaumajutitut, avatânetoᴋartutitut paunaujaujartunik ipûk.

³ Iviangêkik tuktungajoraktutitut magguktut maggoliavinîktut ipûk.

⁴ Kongesit nuvogusertut Elefantit tôgânganit sannamajotut ipok. Ijikik tassîktitut Hesboneme itterviksoarmetûktitut Batrabbimik attelingme ipuk. Kingait nuvugusertut Libanonemêtotut ipok, Damaskusemut sângajotut.

⁵ Niaᴋoit nappavok illingne Karmeletut. Nujatit niaᴋorne, attanniub tungujaungajoᴋotingatut ᴋellaksortauvlune ungiarnelliortaumajotut iput.

⁶ Ananaudlarmêk, innerᴋonadlarlutillo, nagligijaujotit erᴋisimiarnerme!

⁷ Takkinivît Palmib nappârtunga adsigivâ, iviangêkpîllo Weinib paungangit kattingajut adsigivait.

⁸ Oᴋalaukpunga: Palmib nappârtunga majoariaᴋarpara, akkerungillo tigulugit. Iviangêkik Weineliksab paungangititut kattingajutitut ilerlik, ᴋingavillo naimaᴋarninga ilerle paungâluktitut.

⁹ ᴋillaillo ilerle Weinetut idluarnerpaujotut illanârijamnut imernerijaujotut, sinniktunniglo kangasinâᴋartitsijotut oᴋarungnartunik.

¹⁰ Illanârijamnut illingavunga, tâpsomalo tussuninga torârpok uvamnut.

¹¹ ᴋailaurit illanâk, naternamut ailauluk, iglugasangnelo siniktalauluk;

¹² Uvlarârsukut makkerᴋovlunuk, perorsêvingnut Weineliksanut, takkoᴋovlunuk nappârtok Weineliksak siggilermangât, ᴋuglungajungit, kârsimangmangâtta, nappârtut Granatiliksat nuvugulâktârmangâtta; tagvane naglingnimnik tunnitsivigijomavagit.

¹³ Dudait tippeᴋarput, upkoaptalo sângane perortoᴋarpok pivianartunik sunatuinarnik. Illanâk tamangnik komerguservigilaukpagit, mannanitanik sivurnganenitanniglo.