Imgerusersoak 5 - Labrador Inuttitut Heritage Bible

Nagligijaujub illanâb nippinga tussarpâ oᴋautigivâlo ananauninga.

¹ ᴋaivunga najâk nulliaksâklo, perorsêviᴋotimnut. Mirreᴋotikka, tauvluᴋutiksaᴋotikka illagallugit nappilaukpakka; orksuᴋotimalo ingninga, igupsaujârtunit orksuᴋotiga illagallugo nerrilaukpara, Weineᴋotigalo immuᴋotiga illagallugo immilaukpara. Nerrileritse nagligijakka, immerluselo illanârijakka nâmaksilerluselo.

² Sinnikpunga, ômattigale erᴋomavok. Tagvanêpok illanârijama avilortartub nippinga: Upkoêrutilaunga, najâk, illanâk, Taubeᴋotîk, idluitailijoᴋotîk; niaᴋora nâmangmat missuksoarmik, erᴋisulângajukka nâmavut unuab kuttinginnik.

³ Ulliga pêlaukpara, ᴋannok attijaksaringmivigô? Ittiggakka ubvalaukpakka, ᴋanok ipperaksarigivakkâ?

⁴ Illanârijamale aggane nuitatipait killakut, timimalo sajugutigivait.

⁵ Tagva makkilaukpunga illanârijara upkoêrutijomavlugo; aggakka kussilaukput Mirrinik, Mirrillo kôlerput aggamnit pallangairuserviub sanneroanganut.

⁶ Illanâralo upkoêrutijarêlaurapᴋo, tagvanêtsungnailaukpok, aularlunelo. Tagva tarniga annilerpok oᴋausingit pivlugit. Kennerasuarpara nachvârnagole; ᴋaigarsugvigivara, tâpsomale kiolaungilânga.

⁷ Udsertortit iglugasaksoarne agvertartut naipipânga, tâpkoa annaulerlunga amêrpânga; udsertortit avaluksuit kânginne tâlutaᴋotimnik aksârpânga.

⁸ Oᴋautimarikpapse Jerusalemib panningit illipse, illanâra naipigupsiuk, tagva oᴋautissiuk, naglingnermut ᴋannimagama.

⁹ Illanârijat sunaunersauva illanârnerit assinginnit, igvit ânanaunerpângojotit arnanit tamainit? Illanârijat sunaunersauva illanârnerit assinginnit, taimak oᴋautimarikaptigut?

¹⁰ Illanârijara ᴋaᴋopok aupalluklunelo, annerijaumavok tausendioᴋattartunit.

¹¹ Niaᴋunga Goldeôvok ivsornainerpâk, nujangit erᴋisulângavut, ᴋernertauvut tullugaktut.

¹² Ijigik Taubit kôngnêtut ijingititut, ubvarsimajutitut imungme iput, ivertisimatsiarlutiglo.

¹³ Ulloagik perorsêviârsuktitut, mingoarutiksanik tippitsiariktunik perorviojutitut ipûk. Kangasinâgik paunaujaujartotut Mirrinik kussertotut ipûk.

¹⁴ Aggangit suvloliktut Goldeôjotut, Tirkiseliktotut unnuktunnik. Timinga Elefantit tôgângatut ivsornaitotut pinnarnarsijaujotut Safirinut ipok.

¹⁵ Niungit nappajutitut Marmoreôjutitut tunganilititaumajutitut ittikkanut Goldeojunut ipuk. Tautua Libanonetut ipok annerijaumavlune Cederititut.

¹⁶ Kaninga mamaksauteôvok innerᴋonamariklune. Taimaitôvok nagliktanâra, illanâra taimaitôvok, Jerusalemib paningit illipse.

¹⁷ Namungarsimavâle illanârijat, ânanaunerpangôjotit arnanit tamainit? Namut illanârijat sâmalerᴋâ? Tagva illagilutit ᴋennerasuaromavavut.