Imgerusersoak 4 - Labrador Inuttitut Heritage Bible

Nagligijaujub nulliaksab tagva okpertoᴋattigêt ânanauninga. Tâpsoma tussuninga.

¹ Ahak, illanâk igvit ânanauvotit, ahâk ânanauvotit. Ijikik Taubit ijingititut îpuk mattummiutapit tunuani. Nujatit tuktungajutitut kattimgajutitut ᴋaᴋᴋame Gileademe iput.

² Kigutit saukattitut kattimgajutitut sallimajutitut ubvarvingmit pijutitut, attunît maggungnik nochaliktutitut, nochaisingitutitullo akorngane iput.

³ Kangasinâkik ᴋellarutiksatut aupaluktotut ipûk, oᴋâlanîllo tussarnidlarpok. Ulluakik paungâlub Granatib ᴋoppangatut ipûk mattummiutapit tunuani.

⁴ Kongesit Davidib nuvugusingatut ipok sappulutaliktut, nivingaviojotut sappulutanik 1,000 dinik, sôngojullo sakkunginnik sunatuinarnik.

⁵ Iviangêkik tuktungajôjâraktutitut magguktut maggoliaviniktut ipuk, paunaujaujartut akkorngane nerrijûktut.

⁶ Uvlok niglilerᴋârtinago, tachaillo nûlerᴋârtinagit, ᴋaᴋᴋamut Mirrilingmut, ᴋakᴋârulangmullo Weirauchelingmut aijomavunga.

⁷ Ilâle illanâk ânanauvotit, taksaᴋalungilarlo illingne attautsemiglônêt.

⁸ ᴋailutit aiparilaunga nulliaksara, Libanonemit, aiparilaunga Libanonemit. Tamaunga nangeriartorit poktojomit Amanamit, poktojomit Seniremit, Hermonemillo, Loevit iglunginnit, Leopardit ᴋakᴋanginnit.

⁹ Igvit ômattimnik tigusivigivarma najâk, nulliaksâklo; ômattimnik tigusivigivarma ijikpît aipanganut, ᴋellaumgujavit ᴋongesermiutit illanganut.

¹⁰ Ananaudlarmêk naglingnît, najâk nulliaksâklo! Naglingnît nâmanersauvok Weinemit, mingoaruteᴋotivillo tippingata tauvluᴋutiksat tamaita pitikipait.

¹¹ Kangasinâkik, nulliaksâk, kusserpûk igupsaujârtut orksungita ingninganik; igupsaujârtut orksungat imuglo oᴋavit attânêpûk. annorâkpillo tippingat Libanonib tippingatut ipok.

¹² Najâk, nulliaksâklo perorsêviovotit pallangairsimajok, puailaviovotit pallangairsimajok, imektarviovotit naᴋᴋitesimajok.

¹³ Perortitatit perorsêviktut ᴋuvianadlartotut paungâluliktut Granatinik perortuniglo pivianartunik Ciperinik Nardinniglo iput;

¹⁴ Nardinik Safran illaliudlugo Kalmusemik Zimete illaliudlugo, nappârtuniglo Weirauchelingnik; Mirriniglo Aloeniglo, illaᴋarlutik tauvluᴋutiksanik nâmanerpânik.

¹⁵ Perorsêviub puailavingatut, imektarviktut inôselingmik imeᴋartotut Libanonemit kôlertotut iput.

¹⁶ Makkitarit attuarnek, ᴋailutillo uarngnerluak annordlerlutillo perorsêveᴋotipkut, tauvluᴋutingit kusserᴋovlugit.

¹⁷ Illanârijara (Nalegara) ᴋaile perorsêveᴋotiminut, nerrilunelo perortunginnik pivianartunik.