Imgerusersoak 3 - Labrador Inuttitut Heritage Bible

Tarnib, okpertoᴋattigêllônêt kenneningit Nalekamik nertortauningallo tâpsomunga; tâpsoma ânanaudlarninga.

¹ Unnuarme innangavimne tâmna tarnima erdligijanga ᴋennerlaukpara. Kennerlaukpara, nachvârnagole.

² Makkitsomavunga iglugasaksuillo apᴋosinginne agvertaromavunga, ᴋenneromalungalo tarnima erdligijanganik. Kennerlaukparalo nachvârnagole.

³ Udsertortit iglugasaksoarne agvertartut naipipânga: Tarnima erdligijanga takkolaungipissiûk?

⁴ Tâpkoa annikitomik sannerᴋolaurapkit, tagva tâmna tarnima erdligijanga nachvârlaukpara. Tigumivara sapᴋotailijomalugolo, âtsiᴋârnanga tâpsominga anânama iglunganut, ernilauktub uvamnik aiparusinganut.

⁵ Oᴋautimarikpapse illipse Jerusalemib paningit tuktungajôjârtunêtose naternaub tuktunginnelônêt illanâra (uigasuk) tuppaksarlugo perᴋonnase, koksâlatinagolônêt, nâmagijaukârtinago tâpsomunga nangminek.

⁶ Kinauva tâmna (arnak) majorartok sunaᴋajuitomit, isserluktut ᴋongmualuatsiartotut, isserluktut Mirrinit Weirauchemillo âniasiusiortiblo serᴋallijanginnit sunatuinarnit pijotut?

⁷ Ahâk, Salomob inangaviata avatâne nangertoᴋarpok sôngojunik 60 ginik, Israêlitit sângojunginnit.

⁸ Illunatik tigumiarput saviksoarnik, pikᴋaridlarlutiglo sorsungnermut. Attunît saviksoalijarput makkitimingne, sivoranarnek unuarme pivlugo.

⁹ Attannek Salomo sannaᴋojilaukpok ingminut inangavingmik kejungnit Libanonemit pijunit;

¹⁰ Napppajungit Silbereôjut, egangavingit Goldeôjut, iksivavingat aupalloriktok, nattingalo ᴋerᴋane ivertitaumajok takkoranidlartomik Jerusalemib panninginnut.

¹¹ Annileritse, Zionib panningit illipse, takkonârlugolo attanek Salomo, niaᴋotelijarlune niaᴋosertaujutigijanganik anânaminut kattititauvingata uvlungane, ômattingatalo ᴋuviasungningata uvlungane.