Imgerusersoak 2 - Labrador Inuttitut Heritage Bible

Tarnib, okpertoᴋattigêllônêt Kristusiblo oᴋarᴋattigêngningit.

¹ Nuvugulangovunga Saroneme, paunaujaujartôlungalo naksarme.

² Paunaujaujârtotut kakkilautiggit akkorngane, taimaipok illanârijara pannit akkorngane.

³ Nappârtotut paungâluliktut nappartotuinait akkorngane, taimaipok illanârijara, ernerit akkorngane. Iksivavunga tâpsoma tachaliningane kêmitivigijama, paungâlungillo ᴋillamnut mamakput.

⁴ Tâpsoma tassiorpânga iglomut Weinetalingmut, naglingnerlo saimatiovok ᴋollimne.

⁵ Nakkoksitipânga nuvugulângnut, maksuserpângalo paungâlungnut, ᴋannimagama naglingnermut.

⁶ Aggangit saumît niaᴋorma attânêput, tallerpingitalo erᴋisimiarpânga.

⁷ Oᴋautimarikpapse Jerusalemib panningit illipse, tuktungajôjârtune, naternaub tuktunginnêlônêt, nagligijaujok tuppaksartaililugo perᴋovluse, koksalâtinagolônêt, nâmagijauᴋârtinago tâpsomunga nangminek.

⁸ Tagva illanârijama nippinga. Ahâk ᴋaivok, ᴋiggertarpok ᴋaᴋᴋane, akpangerlunelo ᴋaᴋᴋârulângne.

⁹ Illanârijara adseᴋarpok tuktungajôjârtomik tuktuarᴋamiglônêt. Ahâk iglupta sannerangata tunnuane nangerpok, itsuarlunelo igalâkut, ijainilunelo killapatâlikut.

¹⁰ Illanâra kiovok oᴋautilungalo: Makkitit illanâk ânanaugijâk, ᴋailutillo tamaunga.

¹¹ Ahâgle okkiok annigorpok, sillaluk sorairpok aularlunelo.

¹² Nuvugulât sakᴋersimavut nuname, operngâk tikkisimavok, Taubelo tussartauvok, nunaptingne.

¹³ Nappârtub Feigeliksab ᴋuglungajune siggilertipait, nâppârtut Weineliksat nuvugulâtârput, tunijilutiglo tippinermingnik. Makkitit illanâk, ânanaugijâk ᴋailutillo tamaunga.

¹⁴ Taubeᴋotîk ᴋairtut kôrungnângine, ujaraksuit ᴋoppanginne, tautungnik takᴋotilaunga, nippît tussarlaulago; nippît mamadlarmat tautuillo innerᴋonarpok.

¹⁵ Terriraniat angulersigik uvaptingnut, terriraniaᴋat, perorsêvingnik Weineliksenik asseroijut; nappârtoᴋotivut Weineliksat nuvugalâᴋarmatta.

¹⁶ Illanârijara pigivara, tâpsomalo pigivânga, Rosit akkorngane nerrijub.

¹⁷ Uvlok niglilerᴋârtinago, tachaillo nûᴋârtinagit, utterit, tuktungajôjârtotullo ilerit illanâk, tuktuaraktullonêt ᴋakᴋanne aviktarvingne.