II Timôteusemut 4 - Labrador Inuttitut Heritage Bible

Timôteuse ᴋaiblartaugannerpok.

¹ Tagva kigligiutsivunga Gûdib Nâlekablo Jêsusib Kristûsib sângane, tâmna erᴋartuijomârmat inôjuniglo toᴋungajuniglo sakᴋervingme nâlegauvingmelo naliuningane.

² Oᴋausek oᴋâlatigiuk ataruilivlutit, piviksaungmangât, piviksaungimangâllônêt; sivôrasârilutillo, siluklutillo, ᴋaiblailutillo ᴋenuersârnermullo ajoᴋertuinermullo ilûnânut.

³ Naliutsomârmat ajoᴋertûtsemik atsuilinartomik ômisugvingat; kajungilârnermingnulle ingmingnut ajoᴋertuijuksatârniarput, siutimik ungilautigijangit (tussarnerijangit) maliklugit;

⁴ Mikseᴋârnermik siutitik tunutsitilugit, tukkeᴋangitunullo oᴋautsinut sâdlutik.

⁵ Igville pigârit ilûnâne, kappianartut ᴋunutiginagit, oᴋautsinik tussarnertunik oᴋâlajotut, nâmaksitiniaruk kivgartortuksaunît.

⁶ Uvanga tunergutautitaujarêlerama, aviniarviksaralo naliutivok.

⁷ Sorsulaukpunga ajungitomik sorsugiamik, arvertarnimnik nâmaksititsilaukpunga, okpernermêtsainalaukpunga.

⁸ Ilâ mâna idluarnerub niaᴋôtâ ilimavok piksamnut, Nâlekab idluartomik erᴋartuijub tunijomârtanga uvamnut uvluksame ipsomane; uvamnutuinaungitorle, ilûnainulletauk sakᴋerninganik ᴋuviasûteᴋartunut.

⁹ Omarilerille, tuavitomik tikiniarlutit uvamnut.

¹⁰ Dêmasib ᴋemangmanga, silaksûb tamattoma pinginik ungalernerame, Tessalônikamullo aularlune: Krêssense Galâtsiamut (aularivok), Tituse Dalmâtsiamut.

¹¹ Lukasib kissime najorpânga. Markuse ilingnut pilugo, neksarlugolo pît; atortuksarigapko kivgartornermut.

¹² Tiᴋikuse Efêsusemut tililauktara.

¹³ Tikiniaruvit, ulliksoara neksaruk, Troasemut Karpusikunut ᴋemalauᴋtara; aglaillo, piluartomigle kissit pimasarsimajut aglaviksat.

¹⁴ Aleksanderib kannutjerijub angijomik kappiasuktilaukpânga. Nâlekable akkiniaromârpâ iliolaungninga maliklugo.

¹⁵ Igvittauk tâmna ulloreagiuk; oᴋausivut angijomik akkerartulaungmagit.

¹⁶ Akiornimne sivorlerpâme kinamik illaᴋalaungitunga, ilûnatigle ᴋemakpânga. Issumagijauniaratiktok tamanna pivlugo!

¹⁷ Nâlekable nangeᴋatigivânga nakoksitilungalo, oᴋausek tamanna nâmaktomik oᴋautigijauᴋovlugo uvapkut, nalojullo ilûnatik tussaumavât. Piulijauvungalo Loevib sigguanit.

¹⁸ Nâlekablo piuliniarpânga ajortunit tamainit, ikajorlungalo nâlegauvingminut ᴋilangmêtomut. Tâmna nertortaule issoᴋangitomit issoᴋangitomut. Amen.

¹⁹ Salitikit Priska Akvilaselo, Onesifôrusikullo.

²⁰ Erastuse Korintemêtualaukpok; Trofimuselo ᴋanimajok ᴋemakpara Milêtusemut.

²¹ Ataruililerille okiôᴋârtinago tikiniarlutit. Eubulusib, Pudensiblo, Linusiblo, Klaudasblo ᴋatangutigêllo ilûnatik salutipâtit.

²² Nâlekab Jêsusib Kristûsib anernît illagiliuk! Saimarsautib illagilise! Amen. Timôteusemut aglait aipangit aglaktaumavut Rômame, Pauluse aipânik sakᴋertitaugame ataniviksoarmut Nêromut.