II Timôteusemut 3 - Labrador Inuttitut Heritage Bible

Neliutut kingorlerpât, ajoᴋertuinerluktullo, unangmijaunerillo, aglaillo hailigit atornarningat oᴋautauvut.

¹ Tamannale nalojungnairuk, uvluksane kingorlerne nangianartoksoarnik neliutoᴋaromârmat.

² Inuᴋaromâlermat ingmingnik piojorijoᴋsoarnik, pijomatudlartunik, nertortaujomajunik, pimariutertunik mitauteᴋadlartunik, angajoᴋâmingnik nâlengitunik, ivjornartunik,

³ Naglijuitunik, saimajuitunik, terliaᴋataujunik, nâmaksijuitunik, erᴋsinartunik ajungitomik naglingitunik,

⁴ Oᴋauteᴋaluktunik, ilerakutisuitunik, piblingaitunik, allianarluktunik unganersaijunik Gûdemit;

⁵ Gûdemik nâlekteojârtunik, pitsartuninganigle sakᴋertitsijomangitunik. Taipkoatauk allakit.

⁶ Taipkoa illangit iglunut terliarutivlutik pulârᴋattarput, (oᴋautsimikut) arnakulluit naperdlugit, arnat ajortoliksuit, sunatuinarnullo ikligunernut tessiortaujut,

⁷ Ilinniatsainartut, mikseᴋârnerle illitarivlugo sapertut.

⁸ Sorlole Jannêsib Jambrêsiblo Môsese akkerartulaungmakko, taimâktauk tâpkoa miksaᴋârnek akkerartorivât; inuit ukkua asserorsimajunik issumalit okpernek ajulerpât.

⁹ Akunêrtomigle taimainiangilat; silainingit sakᴋerniarmatta ilûnainut, ipkotitunak.

¹⁰ Igville tukkisitsiarpat ajoᴋertuinera, iluseralo, issumasimaneralo, okperneralo, kamangitsertorneralo, nagligosungneralo, ᴋenuersârneralo,

¹¹ Unangmijauneralo, kappiasuktitaunikkalo tukkisilauktakka Antiochiamêdlunga, Ikôniamelo Listramelo, ᴋanok angijomik unangmijaugama tâvane; Nâlekablo piulilaukpânga taipkonangat tamainit.

¹² Ilûnatiglo Gûdib idluarijanganut inôniaromajut Kristûse Jêsuseme, unangmijaunek atoraksarivât.

¹³ Inuille ajortut uivêriklertullo ajorpallianiarput, tamartitsivlutik tamartitaularmiglo.

¹⁴ Igville sokᴋosijuilerit, sorlo ilinnialauravit sorlolo perᴋojaugavit, ᴋaujimavlutit kina ilinniartitsijigilaurangne.

¹⁵ Sorusionernillo ᴋaujimagangne aglait hailigit, tâpkoa ajoᴋertortaujutigijungnarpatit, piulijauᴋovlutit okpernermut Kristûse Jêsusemut.

¹⁶ Aglait tâpkoa ilûnatik Gûdemut pititaumajut atornarput ajoᴋertûtsemut, inerterinermullo, âᴋiniarnermullo, pidlarnermullo idluarsinerme;

¹⁷ Gûdib inuᴋotinga nâmaksiniarᴋovlugo pijungnarsilunelo ajungitulinernut tamainut.