II Timôteusemut 2 - Labrador Inuttitut Heritage Bible

Timôteuse nertornardlune ajoᴋertuiᴋojauvok, ânianartunuttauk sangutitaulugane, ajoᴋertuinerluktut akkerartorlugit.

¹ Tamanna pivlugo ernîk sôngolerit saimarsaumut Kristûse Jêsusemêtomut.

² Uvamnillo tussartatit unuktut kigligiudsijungnartut tussâtilugit, tamakkoa pitikigit inungnut nalâgôrtunut, assimingnik ajoᴋertuijungnartunut.

³ Kappianartunik ᴋununak, Jêsusib Kristûsib sorsuktuksangatut ajungitotut.

⁴ Sorsuktuksat naliat illangiutinasuangilak nunab pinginik, idluarijaujomagame sorsuktuksauᴋojiminut.

⁵ Ajugaunasuartoᴋarangallo (sorsuklune) niaᴋôsertauniangilak, kissiane idluartomik ajugaugune.

⁶ Perorsêvingmik sanajok, perorsianik nerrerᴋârtuksauvok. Kamagikit oᴋautsikka.

⁷ Nâlekable tukkisitiniarpâtit tamainik.

⁸ Jêsuse Kristûse erᴋarniaruk, toᴋungajunit makitok, Dâvidib kinguvânga, oᴋautsit tussarnertut oᴋautigijakka maliklugit.

⁹ Tamakkoa pivlugit kappiasuktitauvunga ᴋelaksugauvlunga aglât, idluitulijotut; Gûdible oᴋausingit ᴋelaksugaungilat.

¹⁰ Tamanna pivlugo kappianartut tamaita ᴋenuersârutigivakka anerimajut pivlugit; tâpkoatauk piulijaunermik Kristûseme Jêsusemêtomik perᴋovlugit, ânanaunek nâksaungitok illagilugo.

¹¹ Tamadja oᴋausek okpernartoksôjok: toᴋoᴋatigiguptigo, inôᴋatigijomârivavuttauk;

¹² Kenuersârupta, atanioteᴋattaujomârivogut; missiarutigiguptigo, missiarutigijomârivâtiguttauk.

¹³ Uvagut okpingikalloaruptalônêt, tâmna nelâgôtsainarpok; ingminik missiarutigijungnangilak.

¹⁴ Tamakkoninga erᴋaitikit, kigligiutsilerillo Nâlekab sângane, oᴋausituinait pivlugit akkerartorᴋonagit; tamanna atungimat, tussartulle kigdlormut sâtitsungnarpait.

¹⁵ Pinasuatsialerille Gûdemut takotilutit idluartomik sanajotut passijaksaungitotut, mikseᴋârnerub oᴋausinginik ingmigôlingatitsijotut idluartomik.

¹⁶ Anerneliungitut ᴋuksalainerit oᴋâlagalâdlarnerit allakit; angijomik aglivalliatitsingmatta idluitulinermik.

¹⁷ Taipkoalo oᴋausingit siamarterdlutik sujuktitsivut uviniub ukkisimaningatut; taipkoa illâgik Himenêuselo Filêtuselo.

¹⁸ Taipkoa mikseᴋârnek tamaivâk, makinermik pijarêrtomik oᴋarlutik; ilangitalo okperningit mumiktilaukpait.

¹⁹ Gûdible tungavilianga sôngojok aulajungnangerpok, imaitomik nalunaikutalik; Nâlekab pine illitarivait; imaitomiglo: Kristûsib atinganik taisijok idluitulinermik atorungnairle.

²⁰ Iglomele angijome iluleᴋuteᴋarpok goldiniglo silberiniglo kissêniungitok, ᴋejungniglole machaniglo; ilangillo nertornartomut, ilangille nachonartomut ilingavut.

²¹ Tagva naliat avikune inungnit tâpkonangat, tâmna iluleᴋutauniarpok ivsornaitok, nertornartok, iglub inuanut atornarlune, ajungitulinernullo tamainut atuinauvlune.

²² Inôsuktut ikligunerivaktangit ᴋemangniakit; idluarnerle pinasuaruk, okpernerlo, naglingnerlo, ullapirsainerlo ilûnaita Nâlekamut tuksiartut illagivlugit ômamut ivjornaitomut.

²³ Apertsûtille silaitut atungitullo allakit, nalunginangne, aivatitsituinarmatta.

²⁴ Nâlekable kivganga aivasungutailijuksauvok, tamainulle inôtsiarlune, ajoᴋertuinermik pitsiarlune; ningarosuktunik kamangitsertorungnarlune ᴋenuersârnermut;

²⁵ Tapatojullo inerterungnarlugit, (neriuklune,) Gûdib taipkua sukutsiane tunitsiviginiarmangâgit ᴋaᴋialernermik, mikseᴋârnek illitarijungnarlugo;

²⁶ Amalo tupalerniarmangâta Sâtanasib niganganit; tâpsomunga napersimagamik, pijomajanganik piniartuksauvlutik.