II Timôteusemut 1 - Labrador Inuttitut Heritage Bible

Timôteuse sokᴋosijuirᴋojauvok. Paulusib Rômame parngnanairsorsimajub ilinganinganik.

¹ Pauluse Jêsusib Kristûsib Apostelinga, Gûdib pijomajanganut, angersimanek inôgutilik Kristûse Jêsusemêtok maliklugo,

² Timôteusemut ernimnut nagligijamnut: Gûdib Atâtab, Kristûsiblo Jêsusib Nâlegapta saimarsautiminut nâpkigosungnerminullo, ullapirsautiminullo illagilitittok.

³ ᴋujagivara Gûde, kivgartortara sivorlerijakka maliklugit issumamut ivsornaitomut, sorairnanga erᴋatsainarapkit tuksiarnimne uvlôtilugolo unnuamelo.

⁴ Kugviornît erᴋarangapko, angijomik kipilerpunga takojomavlutit, ᴋuviasungnermik ilumertaujomavlunga.

⁵ Erᴋarangapkolo okperneᴋ ilungnêtoᴋ takkormôjuitok, sivorlermik anânatsiarne Loidame ineᴋalauᴋtok anânangnelo Eunikeme; ᴋolangilangale ilingnêninganiktauk.

⁶ Tamanna pivlugo erᴋaitipagit, omartitseᴋovlutit Gûdib tunergutânik ilungnêlertomik, aggamnut patingmilaurapkit.

⁷ Anernermik sivôrajomik Gûdib tunitsivigilaungimatigut, pitsartunelingmigle, naglingniktomiglo, idluartomiglo.

⁸ Taimaimat kangusungniarnak kigligiutsinek Nâlegaptingnik pivlugo, pivlungalônêt ᴋelaksugaujunga tâmna pivlugo; uvaptulle kappiasuktitauneᴋ oᴋautsit tussarnertut pivlugit ᴋunuginago pît Gûdib pitsartuninganut.

⁹ Tâpsoma piulilaungmatigut, ᴋaiᴋolutalo ᴋaiᴋojinermut ivsornaitomut, piniarnivut pitjutiginagit, issumasimanerminulle saimanerminullo tunitsivioniptingnut Kristûseme Jêsuseme silaksoak pigiarᴋârtinago;

¹⁰ Mânale nalonairtisimavok piulijipta Jêsusib Kristûsib sakᴋijârninganut; tâpsoma toᴋo nukkingerutingmago, inôtsemiglo asserojuinermiglo ᴋaumajomut pititsingmat oᴋautsinut tussarnertunut;

¹¹ Tamattominga perᴋojauvunga oᴋâlajuksaulunga, Aposteleojuksaulungalo, nalojunullo ajoᴋertuijôjuksaulunga.

¹² Tamannatauk pivlugo taimâk kappiasuktitauvunga; kangusûtigingilarale tamanna; okpervigijara ᴋaujimagapko, nalutsanginivaralo, tâpsoma pigumitâk piksara saputijungnarmago uvluksak imna tikidlugo.

¹³ Ajoᴋertûsek atsuilinartok, uvamnit tussâjat, okpernermiglo naglingnermiglo Kristûse Jêsuseme, igjaraksarivlugo ajoᴋertûtigitsainaruk.

¹⁴ Pigumitâksak (tunergusiarijat) ajungitok tamanna torᴋoruk Anernermut ajunginermut uvaptingnik ineᴋartomut.

¹⁵ Tamanna ᴋaujimavat, Asiamiut ilûnatik tunungmanga; taipkoa illâgik Figelluselo Hermôgeneselo.

¹⁶ Onesiforusikut Nâlekab nâpkigiligittôk: tapsoma nakoksiteᴋattalaungmanga, kangusûtigilaurnagillo ᴋelaumgujarijakka;

¹⁷ Rômamulle pigame, ataruilivlune ᴋenilaukpânga, nennivlungalo.

¹⁸ Nâlekable tunitsivigiliuk nâpkigijaunermik, nagvârᴋovlugo Nâlekame uvluksab neliuniksangane. ᴋanorlo angijomik pitsiarvigilaungmanga Efêsuseme, ᴋaujimavotit.