II Tessalônikamiunut 3 - Labrador Inuttitut Heritage Bible

Kaiblainerit tuksiutjerᴋojijut, nâlerᴋojijut, ômariᴋojijut, nâlengituniglo avitauᴋojijut.

¹ Tagvale ᴋatangutivut, tuksiarutitigut, Nâlekab oᴋausingit ingergarniarᴋovlugit nertortauᴋovlugillo, sorlo ilipsingne;

² Piulijauᴋovlutalo inungnit ipkonangat mumiksimajunit ajortoᴋsoarnillo. Okperneᴋ inuit ilûnatiungitoᴋ perᴋutigingmatsuk.

³ Nâlegarle nitornarpoᴋ, tâpsoma nakoᴋsitiniarpâse saputiluselo ajortunit.

⁴ Tamattomingale sungertûtigivapse Nâlekame, perᴋojavut ilipsingnut nâlekapsigik nâlengniarapsigiglo.

⁵ Nâlekable torârtiligit ômatise Gûdib naglingninganut, Kristusiblo ᴋenuersârninganut.

⁶ Perᴋovapsele, ᴋatangutivut, Nâlegapta Jêsusib Kristusib attingane, illagijungnairsiuk ᴋatangutit neliat iluserluktoᴋ, ajoᴋertûtsillo uvaptingnit pijane nâleklugit pingitoᴋ.

⁷ Kaujimagapse, ᴋanoᴋ ilivluse maligaksarigaptigut. Uvagut iluserlulaunginapta ilipsingne.

⁸ Akkeᴋangitomiktauᴋ niᴋiksaptingnik tigusilaungilagut kimillônût, senavlutale oᴋumaitomik uvlôtilugo unnuamelo pivogut, oᴋumaititsijomanata ilipsingnik.

⁹ Taimailiorpogut, perᴋojaunginaptaungitoᴋ, kissianele igjaraksaujomavluta ilipsingnut, malerᴋovluse uvaptingnik.

¹⁰ Najorluselo perᴋolauᴋpapse tamattominga: neliat sulijomangitoᴋ nerrijuksaunginivoᴋtauᴋ.

¹¹ Illapse illangit tussaumagaptigik, iluserluktunik oᴋautauvlutik senajomanatiglo, atungitôvlutiglo pijut.

¹² Taimaitulle perᴋolugillo Nâlegaptigut Jêsuse Kristusikut kaiblarpavut, nipordlutik sanaᴋovlugit, nangminermingnik niᴋiksamingnik niriᴋovlugit.

¹³ Ilipsele, ᴋatangutivut, ajungitulinermik merngortorniarase.

¹⁴ Nâlegomangitoᴋarpalle oᴋausiptingnik aglangne ukkunanêtunik, tâmna nalonairsiuk aglangnut, illaginagolo, kangusuᴋovlugo.

¹⁵ Omisuktotulle piniarviginasiuk, inertersiugle ᴋatangutitut.

¹⁶ Nâlekable ullapirsaijub ullapᴋoserlise ilûnâne sunatuinarniglo. Nâlekab ilûnase illagilise.

¹⁷ Salutitsivunga nangmineᴋ aglaklunga uvanga Pauluse; tamadja aglangne tamaine nalunaikutaliarivaktara, taimak aglakpunga.

¹⁸ Nâlegapta Jêsusib Kristusib saimaningata illagilise ilûnase. Amen. Aglait makkoa Tessalônikamiunut aglaktaumavut Atêneme.