II Tessalônikamiunut 2 - Labrador Inuttitut Heritage Bible

Okperneᴋarungnainermik Kristusib tikitsomârningata sivorngagut, Antikristusemiglo.

¹ Kenuvigivapsele, ᴋatangutivut, Nâlegapta Jêsusib Kristusib tikitsomârninga, katijomârnivullo tâpsomunga pivlugik,

² Tuavi nakimarnerᴋonase, kakilârtitauᴋonaselo, anernermullônêt, oᴋautsimullônêt, aglangnullônêt, uvaptingnit pimajônerartaujunut, Kristusib uvluksanga neliusimajarêrasugilugo.

³ Tamartitauta lititse kimullônêt, sunamullônêt. Neliutijomângimat, kissiane okperungnaineᴋarᴋârpat, saᴋᴋerᴋârlunelo inuk ajortoliksoaᴋ, asseroinerub ᴋitornganga,

⁴ Akkerartortoᴋsoaᴋ, ingminiglo nâlegautitoᴋ tamainut Gûdemik kivgartornermiglônêt Gûdemik taijaujunut, Gûdetullo ingitsartorlune Gûdib iglunganut, Gûdeovlune oᴋartoᴋ.

⁵ Erᴋaumangilasê oᴋausera ilipsingnut tamattominga oᴋalaurama najorluse sullê?

⁶ Kaujimagivase sulle taipsoma noᴋangautigijanga, taimna neliunermine kissiane saᴋᴋijârtitauᴋovlugo.

⁷ Kassênerub nalonarninga atorêrpoᴋ, sagvangitomele sulle, saᴋᴋertailititsijoᴋ pêrtaujariaᴋarᴋârmat.

⁸ Idluitulijoᴋ tagva saᴋᴋeromârpoᴋ; tâmna Nâlekab nungutsomârpâ ᴋanerme anerninganut, pêrlugolo tikivingme saᴋᴋijârninganut.

⁹ Taipsoma saᴋᴋijârninga Sâtanasib aulatsininganut pivoᴋ, pitsartunernut sunatuinarnut saglotonelingnut, nelunaikutanullo, tatamnartulinernullo,

¹⁰ Tamartitsinernullo sunatuinarnut idluitulerᴋojijunut, taipkonane assiojomârtune, mikseᴋarnermik ivlersineᴋ illaliulaungimatsuk, (tamattomûna) piulijauniardlutik.

¹¹ Tamanna pivlugo tamarnartoᴋsoarnik pitsartunilingnik Gûdib tiliklervigijomârpait, saglonermik okpilerᴋovlugit;

¹² Pidlartauᴋovlugit tamaita mikseᴋârnermik okpingitut, idluitulinermiglo ᴋuviasûteᴋartut.

¹³ Uvagulle Gûdemik ᴋujalijutigijariaᴋatsainarpapse, Katangutivut, Nâlekab nagligijangit, kiglinganit Gûdib anerilaungmase piulijauᴋovluse, Anernerub ivsornaititsininganut, mikseᴋârnermiglo okpernermut:

¹⁴ Taimaitomut ᴋaiᴋolaungmase oᴋautsinut tussarnertunut atortaptingnut, ânanaudlartomik perᴋutiksaulerᴋovluse Nâlegaptingnut Jêsuse Kristusemut.

¹⁵ Taimaimat, ᴋatangutivut, aulajungnangerniaritse, sungertûtiginiarlugillo ajoᴋertûtsit ajoᴋertortautigijase oᴋausiptingnullônêt, aglaptingnullônêt.

¹⁶ Nâlegaptale Jêsusib Kristusib (nangmineᴋ), Gûdiptalo Atâtapta, uvaptingnik nagligosuktub, saimarsainerminullo manigornartomik nâksaungitomik, nerriugijaksamiglo ajungitomik tunitjivigilauramitigut,

¹⁷ Tâpsoma ômatise kaiblarligit, nakoᴋsitiluselo ajoᴋertûtsemelo, piniarnernelo tamaine ajungitune.