II Tessalônikamiunut 1 - Labrador Inuttitut Heritage Bible

Paulusib manigortitsininganik unangmijaunerme, nerriuᴋojininganiglo Nâlekab tikitsomârninganik.

¹ Pauluselo Silvânuselo Timôteuselo illagêktunut Tessalônikamêtunut Gûdeme Atâtaptingne, Nâlekamelo Jesuse Kristuseme.

² Gûdib Atâtapta, Nâlekablo Jêsusib Kristusib saimarsautingata ullapirsautingatalo illagilisetôᴋ!

³ Gûde ᴋujagijariaᴋatsainarpavut pivluse, ᴋatangutivut, taimaglo idluarpoᴋ; okpernise angijomik aglivalliangmat, nagliktigêngnerlo ilûnapsingne atunit angijorolermat.

⁴ Taimainapse, uvagut aglât nertôtivogut ilipsingnik Gûdib illagêktoᴋotingita akorngane, ᴋenuersârnise okperniselo unangmijaunipsingne tamaine, kappiasuktitaunipsingnelo tukkisijapsingne pivlugit.

⁵ Tamanna nalunaikutauvoᴋ, Gûde idluartomik erᴋartuijomârmat, ilipselo Gûdib nâlegauvinganut âniatitaujutigijapsingnut (iterungnarluse) sapingititaujomârapse.

⁶ Idluarmat Gûdeme, kappiasârtise kappianartomik akkiniaromavlugit.

⁷ Ilipsele kappiasuktitaujose, merngoêrserviksaᴋaromârpose illagiluta, Nâlegaᴋ Jêsuse saᴋᴋijârtitauniarpat ᴋilangmit, Engeline pitsartujoᴋsuit illagilugit,

⁸ Ikomame ikoalajome, akkivigijartorlugit Gûdemik ᴋaujijomangitut, oᴋautsiniglo tussarnertunik Nâlegavut Jêsuse Kristuse pivlugo nâlagomangitut.

⁹ Taipkoa pidlartaujomârput asserornartoᴋsoarmut issoᴋangitomut, Nâlekab kênanganit pitsartuninganillo ânanaujoᴋsoarmit pijomut;

¹⁰ Tikipat ânanaunine saᴋᴋerlugo ivjornaitoᴋotine illagivlugit, tatamnadlalarmelo okpertoᴋotine ilûnaita illagivlugit. Kigligiutsinivut ilipsingnut uvloᴋ taimna pitjutigilugo okperilaurapsigik.

¹¹ Tamannalo pivlugo tuksiarutitsainarpapse Gûdiptingnut, pijungnarsititauᴋovluse ᴋaiᴋojauneᴋ tamanna malitsiarungnarlugo, (ilipsingnullo) ajungituliningit tamaita, ᴋuviagijangillo, okpernerublo piniarninga nâmaksititauᴋovlugit pitsartuninganut.

¹² Nâlegapta Jêsusib Kristusib attinga nertortauᴋovlugo ilupsingne, ilipselo tâpsomane, Gûdipta, Nâlekablo Jêsusib saimarsautânut.