II Samuel 9 - Labrador Inuttitut Heritage Bible

Davidib ajungitullininganik Jonathanib erninganut.

¹ Davidelo oᴋarpok: Amiakoᴋariva sulle kinamik Saulib iglunganit, napkiningnermik pinniarᴋovlunga tapsomunga Jonathane pivlugo?

² Kivgaᴋalaukporle Saulib iglunganit Zibamik attelingmik, tamna ᴋaiᴋovât Davidemut. Attanniublo oᴋautiva: Zibaôvît? Tamna oᴋarpok: Ahaila, kivgait.

³ Attannek oᴋarpok: Pittaᴋarᴋa sulle kinamik Saulib iglunganit, Gudib napkigosungninganik pinniarvigilugo piᴋovlunga? Ziba oᴋarpok attannermut: Pittaᴋarpok sulle Jonathanib erningita illanganik ittikamigut tussiatomik.

⁴ Attanniub oᴋautiva: Nanekâ? Ziba oᴋarpok attannermut: Ahâk Lodabaremêpok, Machirib Amielib erningata iglungane.

⁵ Tagva attannek Davide tilliklerpok tagvunga, aijauᴋolâlo Lodabaremit Machirib Amielib erningata iglunganit.

⁶ Manna Mefiboseth Jonathanib, Saulib erningata erninga, Davidemut tikkiname, pamakterlune kênane pûpa, opigosuklunelo. Davidele oᴋarpok: Mefiboseth! Tamna oᴋarpok: Mânepunga kivgait.

⁷ Davidib oᴋautiva: Sivoraniarnak; takopsoanermik pinniarvigijomagapkit, Jonathan, atâtait pivlugo; atâtatsiavillo Saulib perorsêviᴋotigilauktanginik illunainik tunnitsivigijomagivagit; igville uvlut tamaita nerrimavikotimne nerriᴋattautsainartuksauvotit.

⁸ Tamnale opigosukpok, oᴋarlunelo: Kinauvîk uvanga kivgait, sâleravit kingmemut toᴋᴋungajomut, sorlo uvanga illingagama?

⁹ Tagva Davidib Ziba Saulib kivganga, ᴋaiᴋova oᴋautilâlo: Tamaita Saulib iglomioᴋotingitalo illunatik perᴋutigilauktangit tunnimavakka angajoᴋavit erninganut.

¹⁰ Taimak manna perorsêviᴋotinga sannalersiuk igvit, ᴋittorngaᴋotivillo, kivgaᴋotivillo, kattitilugillo perortangit, innogutiksauᴋovlugit angajoᴋavît erninganut, nerᴋiksaᴋarᴋovlugo; Mefibosethele angajoᴋavit erninga, uvlut taimaita nerriᴋattaujuksauvok nerrimaviᴋotimne. Zibale erneᴋalaukpok 15 enik kivgaᴋalarmelo 20 ginik.

¹¹ Zibalo attannermut oᴋarpok: Tamainik, sorlo angajoᴋama attanniub kivgane perᴋolaungmago, taimak kivgait pinniartuksauvok. Mefibosethelo nerrijuksauvok nerrimaviᴋotimne sorlo attanniub ᴋittorngangita nalliatitut.

¹² Mefibosethelo erniârsuᴋalaukpok, tamna atteᴋalaukpok Michamik. Zibable iglomioᴋotingita illunatik Mefibosethe kivgartorpât.

¹³ Mefibosethele igloᴋalaukpok Jerusaleme, nerrigame uvlut tamaita attanniub nerrimaviᴋotingane, tussialaukporlo ittikkamigut igluktut.