II Samuel 8 - Labrador Inuttitut Heritage Bible

Davidib salaᴋarninginik sunatuinarnik. Pinniarᴋojaunerillo pijariaᴋortônerpât âᴋiktauninginik.

¹ Pijoᴋalaukporlo mattoma kingorngane Davidib Filisterit sâlagingmagit, nukkingêrotipaillo; sappulutaksoarlo sôngojok ᴋaᴋᴋarulângme Amamik attelingme aksarnigariva Filisterit agganginit.

² Moabiterit ullimarlaurivait taimak, pingajuingit magguit toᴋᴋomut pitingmagit, pingajuingillo attautsit innuᴋongmagit. Taimak Moabiterit kivgangortitauvut Davidemut, âtsilutiglo pilliutinik tapsomunga.

³ Davidib Hadad-Eser, Rehobib erninga Zobamiut attanningat sâlagigiva, ingergarame, pitsartunine aingmilugo, kôngmut Fratemut.

⁴ Davidiblo tapkonangat tiguvait 1,700 dit horsit ᴋângine ablangajut, 20,000 dillo pissuktut, aksalloalingillo illunaita attoraksaujungnaitipait, aksalloaggillo 100 dit amiakoᴋovait.

⁵ Siriamiullo Damaskusemit ᴋaivut Hadad-Eser, Zobamiut attaningat ikajoromavlugo; Davidiblo Sireamiut angutit 22,000 dit ullimârpait.

⁶ Sorsuktuksaniglo pititsivok Damaskusemut Siriamêtomut. Taimak Siriamiut kivgaulerput Davidemut, pilliutinik âtsilerᴋovlugit tapsomunga. Nalekab Davide ikajormago namut ainingine illunaine.

⁷ Davidiblo sappulutat Goldeôjut Hadad-Eserib kivganginut illingalauktut tiguvait, âlaitalo Jerusalemut.

⁸ Betamille Berothaimemillo Hadad-Eserib iglugasaksoanginit attanek Davide tigusivok kannujarmik unnudlartomik.

⁹ Toile attaniôjok Hematheme tussarame Davidib Hadad-Eserib sorsuksoaᴋotingit illunaita ullimarlaungmagit;

¹⁰ Ernine Joram tilliva Davidemut, illanaᴋardlunelo salutitauᴋova, saimartitauᴋolâlo Hadad-Eser sorsugvigilaungmago sâlagilaungmagolo, (Toi unatadlarneᴋarmat Hadad-Eseremut) najorteᴋarporlo pivianartunik Silbereôjunik, Goldeôjuniglo, ᴋaᴋᴋorliôjuniglo;

¹¹ Tamakkoa attaniub Davidib perᴋutautipaittauk Nalekamut, Silbere Goldelo assingit Nalekamut perᴋutautilauktangit nallojunit illunainit nalaktilauktaminit, illaliudlugit:

¹² Siriamiunit, Moabemiunit, Ammonib ᴋittornganginit, Filisterinit, Amalekiterinit, Hadad-Eseriblo Rehub erningata, Zobamiut attaningata aksartaujutigijanginit.

¹³ Taimaktauk Davidib attine angijorortipa, utterame Siriamiullo 18,000 dit ullimaramigit sioraujaliub naksangane.

¹⁴ Sorsuktuksaniglo pititsivok Edomiut nunanganut, Edomiullo illunamasiatik David nalekpât, Nalekab Davide ikajormago, namut ainingine illunaine.

¹⁵ Taimak Davide attanniolaukpok Israelitinut illunamasianginut, idluarnermiglo idluarsainermiglo saᴋᴋertitsivok innugatoksoarnut illunamasianginut.

¹⁶ Joabe, Zerujab erninga angajoᴋaulakpok sorsuktuksaksoakattigênut; Josafatele, Ahiludib erninga aglakteôlaukpok attanioviub pijoᴋarninginik.

¹⁷ Zadok Ahitob erninga, Ahimelechelo, Abjatharib erninga ajochertuijersoangôlaukpuk; Seraja aglakpakteôlaukpok.

¹⁸ Benaja Jojadab erninga angajoᴋaulakpok Krethinut Pletinullo. Davidib erningit attannertuijôlaukput.