II Samuel 5 - Labrador Inuttitut Heritage Bible

Davidib mingoartaupsarninganik attanermut Israelitinut illunainut; salaᴋarninganiglo Jerusalemiunik Filisteriniglo.

¹ Kinguvarêllo Israelitit illunatik tikkilerput Davidemut Hebronemut, oᴋarlutiglo: Ahâk, sauneᴋattigivaptigit, uvineᴋattigilutillo.

² Taimaglotauk mattoma sivurngane Saule attanniotillugo uvaptingnut, igvit Israelitit aulartilugillo ittertilaukpattit. Nalekablo oᴋautilaukpâtit: Igvit innuᴋotikka Israelitit pairijaksarivattit attaniojuksaulutillo Israelitinut.

³ Angajoᴋaunerôjullo Israelitine illunatik tikkilerput attanermut Hebronemut. Attaniublo Davidib angerᴋattigivait Nalekab sângane, tapkoalo Davide mingoarpât attanningortilugo Israelemut.

⁴ Davide Jareᴋalaukpok 30 ginik attaningortitaugame, attanniotilunelo Jarit 40 git nâlugit.

⁵ Hebroneme attanniotilaukpok Jarit 7 it takkillo 6 it nâvlugit Judakunut; Jerusalemele attanniotilaukpok Jarit 33 git nâvlugit, Israelitit illunamasianginut Judakunullo.

⁶ Attannerlo anguteᴋotine illagellugit aularpok Jerusalemut, Jebusiterit nunaᴋalauktut tagvane sorsugvigijomavlugit. Tapkoale Davide oᴋautivât: Ovunga itterniangilatit; tautungitulle tussiatullo agviarniarpâtit. Issumaᴋalaukpulle Davide tagvunga itterungnarniangimat.

⁷ Davidible Zionib igloksoanga sôngojok aksarnigariva, tagva Davidib iglugasaksoangit.

⁸ Tagva Davide uvlorme taipsomane oᴋarpok: Jebusiterinik salaᴋartok, tikkitorlo iglut ᴋânginut, tussiatunut tautungitunullo, Davidib tarningata omigijanginut, tamna aulatsijungortitaujuksauvok angajoᴋangortitaujuksaulunelo. Tamanna pivlugo oᴋartoᴋarpakpok: Ittertoᴋarniarane iglomut tussiatomiglonêt tautungitomiglonêt.

⁹ Taimak Davidib igloksoak sôngojok iglogiva, tailugolo: Davidib iglogasaksoangit. Davidelo igloliorpok avatâgut Millomit, illuanelo.

¹⁰ Davidelo agvertarpok pivallialunelo, Nalekablo, Gudib Zebaothib illagiva.

¹¹ Hiramiblo Tirusemiut attannerijangata Davide kivgartortunik tilliklervigiva, nappartuniglo Cederinik, iglub saneranganut illingajunik, igluliorteniglo, ujaralerijuniglo, iglomik igluliorᴋovlugit Davidemut.

¹² Davidelo tukkisilerpok Nalekab attanermut Israelitinut naᴋᴋiterlaungmago, attaniovingalo angijorortimago innuᴋotine Israelitit pivlugit.

¹³ Davidelo nulliaitsarinersauvok, panervgaksarinersaulunelo sulle Jerusaleme, Hebronemit tikkilauᴋârdlune; ernetarnersaulunelo sulle pannetarnersaularmelo.

¹⁴ Tamakkoalo erniangolauktut tapsomunga Jerusaleme attingit: Sammua, Sobabe, Nathan, Salomo.

¹⁵ Jebehar, Elisua, Nefeg, Jafia.

¹⁶ Elisama, Eliada, Elifaleth.

¹⁷ Filisterillo tussaramik Davide attanningortilugo mingoartaulaungmat, illunatik paunga majorarput Davide ᴋenneromavlugo. Davide tamattominga tussarame attersarpok igloksoarmut avalulingmut.

¹⁸ Filisterille tikkilerput tangmarterlutiglo Refaimib naksangane.

¹⁹ Davidiblo Nalegak appertsorpa, oᴋarlunelo: Paunga majorartuksauvîk Filisterit akkerartorlugit? Aggamnullo tunnijomavigit? Nalegak Davidemut oᴋarpok: Majorarit takpaunga, Filisterit tunnijomavakka aggangnut.

²⁰ Davidelo tikkipok Baal-Prazimemut, ullimarpaillo tagvane, oᴋarlunelo: Nalekab omigijikka sivunamne siamartilaukpait sorlo imiksuit suppingmatta. Tamanna pivlugo nuna tamna taijaulaukpok Baal-Prazim.

²¹ Gudingoaᴋotitiglo ᴋemmakpait tagvunga; Davidible anguteᴋotingitalo tiguvait.

²² Filisterille ama majorarput paunga, tangmarterlutiglo Refaimib naksangane.

²³ Davidiblo Nalegak apperiva; tamna oᴋarpok: Majorartuksaungilatit paunga; kingorngattigulle tikkikit, tikkiᴋovlutit tapkonunga nappartut Maulberiggit sâdlugit.

²⁴ Tussarniaruvillo nappartut Maulbeeriggit pappingita ᴋêaksungningat pigialermat, tagva tuavitit, Nalegak annisimangmat sivunerne, Filisterit kattimgajoksoaᴋotingit annauleromavlugit.

²⁵ Davide taimailiorpok, sorlo Nalekab perᴋolaungmago, ullimarpaillo Filisterit Gebamit Gaser tikkilugo.