II Samuel 3 - Labrador Inuttitut Heritage Bible

Abnerib illagêlerninganik Davidemut, toᴋᴋotauninganiglo Joabemut.

¹ Akkunêrtomigle sorsungneᴋalaukpok Saulib iglomioᴋotingita Davidiblo iglomioᴋotingita akkorngane. Davidele agvertarpok pivallialunelo; Saulible iglomioᴋotingit agvertarput ikiglivallialutiglo.

² Davidemullo nutakᴋanik erniangojoᴋalaukpok Hebroneme: Erneriᴋârtanga Amnon, Ahinoamit Jesreelemiomit;

³ Tuglia Kileabe, Abigailemit, Nabalib Karmelemiub nulliagilauktanganit; pingajuat Absalome, Maachab, Thalmaib attaniub Gesureme panningata erninga.

⁴ Sittamangat Adonia, Hagithib erninga; tallimangat Safatja Abitalib erninga.

⁵ Pingasojoat, Jetream Eglamit Davidib nullianganit. Tapkoa Davidemut erniangôlaukput Hebroneme.

⁶ Sorsungneᴋartillugo manna Saulib iglomioᴋotingita Davidiblo iglomioᴋotingita akkorngane, Abnerib Saulib iglomioᴋotingit pitsartutipait.

⁷ Saulelo panervgaᴋalaukpok Rizpamik attelingmik, Ajab panninganik. Isbosethelo Abneremut oᴋarpok: Sôg atâtama pannervganga sinniᴋattigiviûk?

⁸ Tagva Abnerib Isbosethib oᴋausingit tamakkoa ningaumajadlarutigivait, oᴋarlunelo: Kingmiub niaᴋungatut illingavîk, Judakut akkerartorlugit Saulib atâtavit iglomioᴋotinginut, tapsomalo ᴋattangutinginut, illanarijinginullo, napkigosungnermik sakᴋertitsijunga, pititsilaungitungalo illingnik Davidib agganginut? Igvillo uvlome passivarma idluitullinermik arnak pivlugo?

⁹ Gudib Abner imâglo, imâglo pinniarvigiliuk, pinniarlungikuma, sorlo Nalekab Davide oᴋautimarilaungmago,

¹⁰ Attaniovik Saulib iglunganit pêjartaujuksaungmat, Davidiblo iksivautaksoanga makkitatitaujuksaungmat, Israelemut Judamullo, Danemit Berseba tikkilugo.

¹¹ Tagva mattoma kingorngane kiojungnangilâ oᴋautsemik attautsemiglonêt, taimak sivuragiva.

¹² Abnerelo kivgartortunik tilliklerpok Davidemut, oᴋautauᴋolâlo: Kia nuna perᴋutigivaûk? Oᴋarporlo: Angerᴋattiginga; ahâk, aggama illagijaksarivâtit, sangutitsiᴋovlunga illingnut Israelitinik illunamasianginik.

¹³ Tamna oᴋarpok: Atte, angerᴋattigijomavagit. Attauserle tuksiarpara illingnit, kênamnik takkoᴋonak, kissiane ᴋaititsiᴋârtillutit uvamnut Michalemik, Saulib panninganik, ᴋainiaruvit kênara takkojomavlugo.

¹⁴ Davide kivgartortunik tilliklilaurivoktauk Isbosethemut, Saulib erninganut, oᴋautsauᴋolâlo: Nulliaᴋotimnik Michalemik tunnitsiviginga angerutigilauktamnik uvamnut Filisterit 100 dit uviningita aminginut.

¹⁵ Isbosethelo tilliklerpok tagvunga, tigujauᴋolâlo angumit taipsomangat Paltielemit, Laisib erninganit.

¹⁶ Uingatalo ᴋannilârpa, ᴋêalunelo kingorngane Bahurime tikkilugo. Tagva Abnerib oᴋautiva: Uttilerit, ailutillo. Uttilerporlo.

¹⁷ Abneriblo Israelitit angajoᴋaunerôjungit oᴋarᴋattigivait, oᴋarlunelo: Illipse mattoma sivurngane akkunît Davide pinnasuarlaukpasse attanningorᴋovlugo illipsingnut.

¹⁸ Taimailioleritse manna, Nalekab Davide oᴋautigilaungmago: Innuᴋotikka Israelitit piulijomavakka kivgama Davidib aggangittigut, Filisterit agganginit omigijingitalo illunatik agganginit.

¹⁹ Abner oᴋarivoktauk Benjaminekut siutingita sângine; oᴋariartorlunelotauk Davidib siutikita sângangne Hebroneme, tamainik Israelitit Benjaminekullo illunatik namagijanganik.

²⁰ Abnerelo mana Hebronemut Davidemut tikkilermat, angutit 20 git illagallugit, Davidib nerrimârterpait.

²¹ Abnerelo Davidemut oᴋarpok: Parngnaileromavunga aijomalungalo Israelitit illunamasiatik kattitilugit angajoᴋamnut attanermut, angerᴋattigivlutit piᴋovlugit, attanioᴋovlutit tarnivit tussugijanganut. Taimak Davidib Abner nûlerᴋova ingminit, aularᴋovlugo ullapirsauteᴋarlune.

²² Ahâglo, Davidib Joabiblo kivgangit tikkilerput sorsuktoᴋattigênit, naksarlutiglo aksarnigaujunik unnuktunik. Abnerele manna Davidemêtsungnailaukpok Hebroneme; nûlerᴋolaukpâle, ullapirsauteᴋarlune aularlaungmat.

²³ Joabele sorsuktuksaksoaᴋattigêllo illunatik illagallugo tikkisimangmat, oᴋautaulerpok, Abner Nerib erninga tikkisimalaungmat attannermut, nûlerᴋolaungmagolo ingminit, ullapirsauteᴋarlune aularlaungmat;

²⁴ Tagva Joabib attanek ittervigiva, oᴋarlunelo: Sunaliorlauᴋît? Ahâk, Abnerib tikkilaukpâtit; sôg nûlerᴋolaukiûk illingnit, aularᴋovlugo?

²⁵ Abner, Nerib erninga illitaringipiûk? Tikkisimagame tillioromavlutit, illitarksilerᴋovlugo itterningnik, anningnerniglo, timeroilerᴋovlugolo pinniarnernik tamainik.

²⁶ Joabelo Davidemit annigame, kivgartortunik tilliklerpok Abnerib kingorngane, aiklermiᴋovlugit tapsominga Borhasiramit; Davidelo ᴋaujimalaungilak tamattominga.

²⁷ Abnerelo manna tikkipsarmat Hebronemut, Joabib tessiorpa ittertarviksub ᴋerᴋânut, angigutsivlune oᴋarᴋattigijomavlugo; kappivâlo tagvane nângagut, toᴋᴋolerᴋovlugo, nukame Asahelib aunga pivlugo.

²⁸ Davide tamattominga kingorngane tussarame, oᴋarpok: Passijaksaungilanga attaniovigalo Nalekab sângane soraijuitomik, Abnerib Nerib erningata aunga pivlugo;

²⁹ Joabible niaᴋoanut illingalerle, taipsomalo atâtangata iglomioᴋotinginut illunainut; pittaᴋangitsainarniaranelo Joabib kinguvângine, ajualingmik marneᴋatsainartomik, kallaᴋadlartomiglo, ajaupialijarlunelo pissugiaᴋartomik, saviksoarmullo ochotitaujomik, ajoksartomiglo nerᴋiksamik.

³⁰ Taimak Joabib angajuatalo Abisaib Abner toᴋᴋopâk, tamanna pivlugo nukagik Asahele toᴋᴋolaungmago unatadlarnerme Gibeoneme.

³¹ Davidele Joabemut innugatsoarnullo illunainut tapsoma illagijanginut oᴋarpok: Annorase alliktorsigik, pôngniglo tapseruseritse illipsingnut, Abnerelo oggurilugo pititse. Attanniublo pissuklune iklervik mallikpa.

³² Abnerelo illijartormatsuk Hebroneme, attannek nipliarkivok, ᴋêalunelo Abnerib illuvingane, innugatsuillo illunatik ᴋêavuttauk.

³³ Attanniublo Abner ârusutigiva, oᴋarlunelo: Abner toᴋᴋolerlaungilak sillaitub toᴋᴋolerningatut.

³⁴ Aggaktit ᴋellaksorsimalaungilet, ittikkatillo kippitjutinut illijaungilet; ochosimavotit, sorlo nalliat uivêtoâlungnut ochotitaungmat. Tagva innugatsuit illunatik ᴋêagiluarpât sulle.

³⁵ Innugatsuit illunatik manna ittermatta Davide nerriᴋattigijomavlugo uvlomariktillugo sulle, Davide angermarikpok, oᴋarlunelo: Gudib imâglonêt imâglonêt pinniarvigilinga, ᴋakᴋojaktoruma, sunamiglonêt ôksiguma seᴋᴋinek nippilerᴋârtinnago.

³⁶ Inugatsuillo illunatik tukkisilerpât, attanniublo pinniarningit tamaita namagijauvut inugatsuit illunamasiatik ijingita sângine.

³⁷ Inugatsuillo illunatik Israelitillo illunamasiatik tukkisilerput uvlorme taipsomane, attannermit pilaungimat Abner Nerib erninga toᴋᴋotaulaungmat.

³⁸ Attaniublo kivgane oᴋautivait: ᴋaujimangilase uvlorme tamattomane attannek, pijariaᴋôrtojorlo ochosimangmat Israeleme?

³⁹ Uvangale sangêpunga, attanniolungalo mingoarsimajok. Angutigle Zerujab ᴋittorngagik, sinaungavuk uvamnut. Nalekab tamna idluitullijok akkinniarvigiliuk, idluitullininga malliklugo.