II Samuel 24 - Labrador Inuttitut Heritage Bible

Davidib kittitsiᴋojininganik innugatsoarnik, pitlartauninganiglo tamanna pivlugo.

¹ Nalekablo ningaumajarninga illungertulerlaurivok ama Israelitinut, Davidelo ᴋajungersarpa tapkoa akkorngane, oᴋarᴋovlugo: Ailerit, Israelitillo Judakullo kittijartorkit.

² Attannerlo Joabemut sorsuktuksaksoaᴋotime angajoᴋanganut oᴋarpok: Israelib kinguvarêngita illunatik akkorngattigut ailerit, Danemit Berseba tikkilugo; innugatoksuillo kittikit; ᴋaujilerᴋovlunga ᴋapsiomangatta.

³ Joabe attannermut oᴋarpok: Nalegak Gudit illautitsilerle innugatoksoarnut tapkonunga, sorlo manna illingangmatta 100 deêrtortunik unnurnersanik sulle, nalegara attannek, ijingme ᴋuviasutiksanganik takkoᴋovlugo tapkonane; kissiane sôg nalekama attanniub tamanna ᴋuviasutigivaûk?

⁴ Attanniuble oᴋausingit ajugaulaukput Joabemut, sorsuktuksallo angajoᴋanginut. Taimak Joabe aularpok, sorsuktuksello angajoᴋangit attannermit, innugatsuit Israelitit kittijartorlugit.

⁵ Ailutiglo Jordane ikarpât, tangmarlutiglo Aroereme, iglugasaksuit tallerpiane, Gadib kôngata kiglinganetome, Jaeseremelo;

⁶ Tikkilutiglo Gileademut, Hadsiblo nunanganut atsiktometomut; tikkilutiglo Danjaanemut, Zidoniblo avatânut;

⁷ Tikkipullo iglugasaksoarnut songojunut Tirusemik attelingnut, Heviterillo, Kanaaniterillo iglugaseksoanginut illunainut, tikkilutiglo Judab seᴋᴋernganut, Bersebamut;

⁸ Taimaglo nuna illunât ingergavigivât, tikkilutiglo Jerusalemut takᴋit 9 it uvlullo 20 git aularvingmik kingorngane.

⁹ Joabiblo attanermut tunnivait innugatsuit kittitaumajut unnurningit. Israelemelo anguteᴋalaukpok 800,000 dinik sôngojunik, saviksoarmik amuarsijungnartunik, Judamelo angutinik 500,000 dinik.

¹⁰ Davidiblo omattinga tiglilerpok innugatsuit kittitaulauᴋârtillugit. Davidelo Nalekamut oᴋarpok: Angijoksoarmik idluitullilaukpunga, tamattominga pinnialaurama; mannalo Nalegak kivgavit idluitullininga pêjalauruk, sillaidlartomik pinniarlaurama.

¹¹ Davidelo uvlarme makkimat, Nalekab oᴋausinga Gademut, nallautaijomut, Davidib takkojokotinganut, pivok oᴋarlunelo:

¹² Ailerit tagvunga Davidelo oᴋarvigiuk: Imâk Nalegak oᴋarpok: Pingasunik adsigêngitunik ᴋaitsivunga illingnut; annerosulerit tapkoa illanganik, taimailiorᴋovlunga illingnut.

¹³ Gadelo Davidemut tikkipok, oᴋautigivâlo tamanna tapsomunga, oᴋautivâlo: Pijomavît Jarit 7 it nâlugit ᴋângnartoᴋarᴋovlugo nunaᴋotingne? Ubvalo takkit pingasut nâlugit akkerartortitit ᴋemâjariaᴋarangne, taipkoalo unangmiklerᴋovlugit illingnik? Ubvalo uvlut pingasut nâlugit nusilingnartoᴋarᴋovlugo nunaᴋotingne? Tagva kamatsialerit manna nautsertorlutillo, sunamik oᴋartuksaumangarma tapsomunga tillilauktimnut.

¹⁴ Davide Gademut oᴋarpok: Kappiasudlarpunga, kissiane Nalekab agganginut kattangniarta, tapsoma napkigosungninga angijongmat; innuit agganginut kattagomalungilanga.

¹⁵ Taimak Nalegak nusilingnartomik tikkitoᴋarᴋojivok Israelitinut, uvlâmit nalliutok tamna taijaumajok tikkidlugo, innugiartoksoarnit Danemit Berseba tikkilugo angutit 70,000 dit toᴋᴋolermatta.

¹⁶ Engeliblo aggane issangmagit Jerusalemib ᴋollânut asseroromavlugit; Nalegak ᴋaᴋᴋialerpok idluinermik tamattominga, oᴋarlunelo Engelemut, asseroijomut innugatsoarnik: Namaksivok, aggaktit erᴋitikit. Nalekable Engelinga Arafnab Jebusitereôjub ᴋaᴋᴋojaksaliorvinganelaukpok.

¹⁷ Davidible Engele innugatsoarnik toᴋᴋotsijok takkogamiuk, oᴋarpok Nalekamut: Ahâk, uvanga idluitullilaukpunga, uvanga idluitullinermik ominga piniarlaukpunga; sunamik saukat ukkoa pinniarlauᴋât? Aggaktit torarlit uvamnut akkerartorlunga, atâtamalo iglunganut.

¹⁸ Gadelo Davidemut tikkipok nalliutome taipsomane oᴋautivalo: Majorarit takpaunga, Altaremiglo sennalerit Nalekamut Arafnab Jebusitereôjub ᴋaᴋᴋojaksalliorvingane.

¹⁹ Taimak Davide majorarpok takpaunga, sorlo Gade oᴋalaungmat, sorlolo Nalegak perᴋojilaungmat.

²⁰ Arafnalo ᴋeviarame, attannek kivgane illagilugit ᴋaitillugo takkova, kênanelo pûlugo nunamut opigosukpok,

²¹ Oᴋarlunelo: Sôg nalegara attannek kivgaminut ᴋaiva? Davide oᴋarpok: Kaᴋᴋojaksaliorvik una pissiarilugo illingnit, Altaremiglo sannalunga Nalekamut, pagvisartoâluk innugiartoksoarne soraiᴋovlugo.

²² Arafnale Davidemut oᴋarpok: Nalegara attannek tigusilerle, tunnergumiglo tunnijile namagijaminut; ahâk tagva tuktuvakarpok tunnergutiksamut ôtaksamut, tuktuvaublo annungita ᴋejuktangit ikkomaksamut.

²³ Tamaita Arafnab attanniojub tunnivait attannermut. Arafnalo oᴋarpok attannermut: Nalekab Gudivit namagijautilitit ingminut.

²⁴ Attannerle Arafnamut oᴋarpok: Taimangungitok, pissiarijomavarale illingnit kênaujanut akkiluanga malliklugo; Nalekamnut Gudimnut tunnergumik ôtaksamik tunnijomalunginama, akkeᴋangitomik pilauktamnik. Taimak Davidib ᴋaᴋᴋojaksaliorvik, tuktuvâglo pissiarivâk Sekelinut Silbereôjunut 50 ginut.

²⁵ Sannalunelo tagvunga Altaremik Nalekamut, tunnijilunelo tunnergutinik ôtaksanik, tunnergutiniglo ᴋujalijutiksanik. Nalegarlo ᴋennuvigijauvok nuna saimarvigilugo; Nalegarlo ullapᴋosertaulaukpok nunamut, pagvisartoâluglo sorailaukpok innugatsuit Israelitit akkorngane.