II Samuel 23 - Labrador Inuttitut Heritage Bible

Davidib oᴋausingita kingorlinginik; tapsomalo songojoᴋotinginik pinniarninginiglo.

¹ Tamadsa Davidib oᴋausingita kingorlingit: Davide Isaib erninga oᴋalaukpok, angut tamna angijorortitaumajok, Jakob Gudingata saimartitanga, Israelib imgerutiksalliortangat tussarnidlartunik oᴋarpok:

² Nalekab annerninga uvapkut oᴋalaukpok, tapsomalo oᴋalâninga oᴋapkut oᴋautigijaulaukpok.

³ Israelib Gudinga oᴋalaukpok uvamnut, Israeliblo ᴋairtunga oᴋâlalaukpok, attanniôjok idluartok innuit akkorngane, attanniôjok sivuranerme Gudemik.

⁴ Uvlâb ᴋaumaningatut itsomârpok, seᴋᴋinek uvlarme nuilertillugo nuvujakangipat, sillalungnerub kingorngane ᴋaumadlarnermut iviksukat nuilerpatta nunamit.

⁵ Igluga taimailingalungigalloarmat Gudeme, angernermigle tunnitsivigilaukpânga soraijuitomik, aᴋiksoijomik tamainik, soᴋᴋosijuitomiglo, piulijaujutigijamniglo tamât, tussugijamniglo, sulle perorsaᴋolungigalloarmago.

⁶ Belialille illunatik Dornititut nutsuksimajutitut îput, aggangnut tigujaujungnangitutitut;

⁷ Tigusijomajorle tapkoninga, kikkiangmik, ᴋallugiablo ippuanik aggangminejariakarpok, ikkomamullo ikkitaujomârput, tagvane najortamingne.

⁸ Tamadsa Davidib sôngojoᴋotingita attingit: Jasabeame Hachmonib erninga, pijariaᴋortonerpaulaukpok pingasut akkorngane; ᴋallugiaᴋotine kongmuartipa, angutillo 800 dit ullimarpait attautsekut.

⁹ Tapsoma kingorngane Eleasarib Dodob Ahohib erningata erningata Davidib sôngojoᴋotingita pingasut akkorngane Davide illagiva. Filisterit oᴋarnerlotigingmattigik, kattimalaungmattalo sorsungnermut, Israeliblo angutingita majoarmatta paunga.

¹⁰ Tagva tamna nangerpok ullimarpaillo Filisterit, aggangit merngortornermut ᴋeratalerᴋârtinagit saviksoarme. Nalegarlo piulijaunermik angijomik tunnijilaukpok taipsomane, innugatsuit uttermatta tamna malliklugo aksarnilutik.

¹¹ Tapsoma kingorngane Samma Agab Harariub erninga îlaukpok. Filisterit kattimalertillugit kattimgajunut attautsinut, perorsêviᴋalaukporlo tagvane perorsijalingmik Linsinik, innugatoksuillo Filisterit ᴋemâvait;

¹² Tagva tamna nangeriartorpok perorsêviub ᴋerᴋânut, piulilalo, annaulerlaitalo Filisterit, Gudelo sâlakarnermik angijomik tunnijilaukpok.

¹³ Tapkoalo pingasut pijariaᴋortônerpaujut 30 git akkorngane, attersarlutik tikkiput Davidemut kattersiviub nalliuningane Adullamib ᴋairosunganut, Filisterillo kattimgajut tangmarsimalaukput Refaimib naksangane.

¹⁴ Davidele taipsomane ᴋairtoksoarne igloksoatut avaluliorsimajotut îtunelaukpok. Filisterille innugatsoangit tangmarsimalaukput Bethleheme.

¹⁵ Davidelo ikligosulaukpok, oᴋarlunelo: Kia imiksaitoromavânga immektarviub Bethleheme ittertarviub attânetub imminganit?

¹⁶ Tagva songojoksuit pingasut tapkoa Filisterit tangmarvingat ittârpât, ᴋallulutiglo immermik immektarvingmit Bethlehemêtomit ittertarviub attâne, akjartorpâllo, âlugolo Davidemut. Tapsomale immeromalaungilâ, kovilâle Nalekamut,

¹⁷ Oᴋarlunelo: Nalekab tamanna ungasiktiliuk uvamnit, taimailiorᴋovlunga. Aungôlungilâk angutinit tapkonangat, innosermingnik ivlersilaungitunit, ailauktunillo tagvunga? Immeromalaungilâlo. Songojoksuit pingasut tapkoa taimailiorlaukput.

¹⁸ Abisai Joabib angajua angajoᴋaunerôlaurivoktauk pingasut akkorngane. Kallugiaᴋotine kongmuartipa ullimarpaillo 300 dit; oᴋausiongînarlaukpoktauk pingasut akkorngane.

¹⁹ Opigijaunarnerpângolaukporlo pingasut akkorngane, angajoᴋaulaukporlo tapkonunga; pingasulle taipkoa innorpait.

²⁰ Benajalo Jojadab Ishailib erningata erninga, Kabzeelemiub pinniarnersoaᴋalauktub. Tapsoma angutik Amoniterik Loewetut îtuk ullimarpak, attersarlunelo Loewelo toᴋᴋopa imektarvingme aputeᴋarvingme.

²¹ Egiptenemiorlotauk ullimarpa, angut erksinadlartok, tamna ᴋallugiamik tigumiarpok aggangminut. Tapsomale attersarlune aivigiva ajaupialijarlune, Egiptenemiorlo aksarpa aksorornermut ᴋallugiarmik agganginit, toᴋᴋopâlo ᴋallugiaᴋotinganut nangminerijanganut.

²² Taimailiorlaukpok Benaja Jojadab erninga, oᴋausiongînarlaukporlo songojoksuit pingasut tapkoa akkorngane.

²³ Opigijaunarnersaulaukporlo 30 ginit; pingasulle taipkoa innorpait. Davidiblo attannertuijungortipa.

²⁴ Asahel, Joabib nukka, 30 git tapkoa akkornganêpok. Elhanan Dodab erninga, Bethlehemiub.

²⁵ Samma, Haradamiok. Elika, Haradamiok.

²⁶ Helez, Paltemiok. Ira, Jekezib erninga, Tekoamiok.

²⁷ Abieser, Antotemiok. Mebunai, Husatemiok.

²⁸ Zalmon, Ahohimiok. Maherai, Netofatemiok.

²⁹ Helebe, Baenab erninga, Netofatemiok. Ithai, Ribaib erninga, Gibeamiok, Benjaminib ᴋittorngangita iglugasaksoanganit.

³⁰ Benaja, Pirgatonemiok. Hidai, Gaasib kônginit pijok.

³¹ Abialbon, Arbatemiok. Asmaveth, Barhumemiok.

³² Eljaheba, Salbonemiok. Jasonib, Jonathaniblo ᴋittorngangit.

³³ Samma, Hararemiok. Ahiam, Sararib erninga, Hararemiok.

³⁴ Elifelet, Ahasbaib, Macheatib erningata erninga. Eliam, Ahitofelib Gilonemiub erninga.

³⁵ Hezrai, Karmelemiok. Paerai, Arbitemiok.

³⁶ Jegeal, Nathanib erninga Zobamiok. Bani, Gademiok.

³⁷ Zelek, Amonitereôjok. Naharai, Beerothemiok, Joabib Zerujab erningata sakkunginik akjarsijok.

³⁸ Ira, Jethremiok. Garebe, Jethremiok.

³⁹ Uria, Hethitereôjok. Tapkoa illunatik kattilugit 37 giôvut.