II Samuel 22 - Labrador Inuttitut Heritage Bible

Davidib imgerutinginik nertordlerutiksanik, piulijaunine omigijiminit pivlugo.

¹ Davidiblo imgerutiksab tamattoma oᴋausertangit oᴋauserivait Nalekab sângane, nalliutome taipsomane, Nalekab piulilaungmago, omigijingita illunatik agganginit, Sauliblo agganginit, oᴋarporlo:

² Nalegak ᴋairtorivara, sernigijiksaᴋautigivaralo, piulijigilugolo.

³ Gude torᴋorviksaᴋautigivara tattigijara, sappulutaksarijara, piulijauviksamalo sakkotinga, sapputsijiga ᴋemâvigijaralo, piulijiga, piuliklertotit uvamnik idluitullivionermit.

⁴ Nalegak nertoromavara, nipliarvigijomalugolo; tagva omigijimnit piulijauniarpunga.

⁵ Toᴋᴋub ânianarningita illumalaungmanga, Belialiblo kôngita ᴋoaksartilaukpânga.

⁶ Kappianartoviub ᴋellarutingita napperlaukpânga, toᴋᴋublo aklunangita sâlagilaukpânga.

⁷ Kappiasuleraiguma, tagva Nalegak nipliarvigivara, ᴋaigarsuklungalo Gudimnut; tagva Tempeleᴋotiminit nippiga tussarpa, ᴋaigarsungneralo sânganut pivok siutikingnut.

⁸ Nuna sajukpilulaukpok, aulatitaulunelo, ᴋillaub tungavingit aulavut, sajukpilutiglo ningaumajartillugo.

⁹ Iserluk kongmuarlaukpok kinganganit, ikkomalo nungutsijok ᴋanninganit, ᴋaumalakarmat tamattomangat.

¹⁰ Killak nakiglitilaukpa akᴋarlunelo, tâktoᴋalaukporlo ittiggangita attâne.

¹¹ Kerubiblo ᴋângane ablangavok, tingilunelo tagvunga, ikkiaᴋilaukporlo annorib êsarungine.

¹² Tuppingalo avatâne tâktoksoniolaukpok, nuvujangolunelo ᴋernertunik silliktuniglo.

¹³ Keblidlarnermut sânganêtomut, ikkoalalaukpok ᴋaumalarlune.

¹⁴ Nalegak ᴋalluᴋarᴋojilaukpok killangmit, kogvasinerpangôjublo ᴋalluksoaᴋotine annitilaukpait.

¹⁵ Kargjuteᴋotine pittiksautilaukpait, siamartilaitalo; ᴋaumalaktitsilaukpok ᴋoaksartipaillo.

¹⁶ Tagva imiksuit kôdlartut takkojaulaukput, nunaksublo tungavinga ulligêrtaumalaukpok, Nalekab suadlarninganut, kingangata annerninganut, annerteridlarninganullo.

¹⁷ Tamna tilliklilaukpok ᴋôtsiktomit, ailungalo, ᴋakkilaukpângalo immaksoarnit.

¹⁸ Piulilaukpânga omigijimnit sangijoksoarnit, omigijimnit pitsartuluadlalauktunit uvamnut,

¹⁹ Sâlaᴋarlauktunit uvamnik, ᴋanoênima nalliuningane, Nalegarlo sungertuteolaukpok uvamnut.

²⁰ Tapsoma annitilaukpânga innitôjomut; nussulaukpânga ᴋuviagilauraminga.

²¹ Nalekab ajungitullivigivânga idluarnera malliklugo, akkiniarpânga aggangma ivsornainingat malliklugo.

²² Uvanga Nalekab apᴋosiningit attorapkit, idluitullilungilangalo Gudimnut.

²³ Idluarijangit illunaita ijingma sângangnêput, perᴋojangillo egilungilakka uvamnit.

²⁴ Idluineᴋalungilangale sângane, ulloreasuklungalo ajortunik.

²⁵ Tamanna pivlugo Nalekab akkinniarvigivânga idluarnera malliklugo, ivsornainera ijikita sângangne malliklugo.

²⁶ Heiligeôjune heiligeôvotit, idluartunelo idluarpotit.

²⁷ Ivsornaitune ivsornaipotit, mumiksimajune mumiksimavotit.

²⁸ Innuit ajulertut ikajorangne, ijingnullo piojorijut miklilertipattit.

²⁹ Igvit Nalegak ᴋaumautigigapkit. Nalekab tângnera ᴋaumaksarpa.

³⁰ Aiparilutit sorsuktut egilugit serᴋomitsungnarapkit; Gudigalo aiparilugo ᴋarmaksuit abtusarvigijungnarpakka.

³¹ Gudib apkosiningit ᴋanoêtoᴋatsengilet, Nalekab oᴋausingit illakangilet. Tamna sappulutauvok illunainut tatteᴋartunut tapsominga.

³² Nanele Gudeᴋarᴋa Nalegak pinago? Nanelo torᴋorviksaᴋauteᴋarᴋa Gudivut pinago?

³³ Gudib nekkoksitipânga pitsartunermut, apᴋosinermiglo unertutivânga tamarnangitomik.

³⁴ Ittigakka tuktut ittiggangititut îtipait, pitilungalo poktojoᴋotimnut.

³⁵ Tapsoma aggakka ajochertorpait sorsungnermik, talleralo ajochertorpa pittikse ᴋannujaujok kellulugo.

³⁶ Tunnitsivigivarmalo piuliklernivit sappulutanganik. Nikkanarsartigumgalo angijorortiparma.

³⁷ Attimne inniksamik âᴋiksoivotit pissungnermut, kamgâka uniorterᴋonagik.

³⁸ Omigijikka udlatsomavakka, nungutsomalugillo, utteromalungilangalo toᴋᴋotsijarêrᴋarnanga tapkoninga.

³⁹ Toᴋᴋotsomavakka egilugillo, serᴋomitsomavakka, akkerartoraksaringilânga; ittikkama attânut ochojuksauvut.

⁴⁰ Pitsartunekartitsungnarparma sorsungnermut, akkerartortikka ochotitsungnarpattit attimnut.

⁴¹ Omigijikka ᴋemâtipattit, asseroiᴋovlunga omisuktunik uvamnik.

⁴² Keviarput, piuliklerteᴋangilarle; Nalekamut, tapsomale kiolungilait.

⁴³ Toggarlugit serᴋallititsomavakka sannektitut nuname, allorluktitut apᴋosinerme serᴋallititsomavakka, siamartitsomalugillo.

⁴⁴ Piulilaukparma innuᴋotima annartorninginit, sapputilungalo angajoᴋangorᴋovlunga nellojut akkorngane; innugatsuit illitarilaungitama kivgartorpânga.

⁴⁵ Tujormitsat sappidlalaukpânga, nalatsiarpângalo siutinut nalatsiartunut.

⁴⁶ Tujormitsat perlersimavut, nimajalutiglo ᴋallarutimingne.

⁴⁷ Nalegak omavok, ᴋairtoralo torᴋorviksaᴋautiga, Gudigalo nertortaule, piulijauviksama ᴋairtunga nakorijaule.

⁴⁸ Gude tamna, akkiniarnermik tunnijijok uvamnut, innuᴋattigêksoarniglo ochotitsijok attimnut.

⁴⁹ Tapsoma ikajorpânga omigijimnit. Igvit angijorortiparma taipkonangat akkerartortimnit; igvit ikajorparma koksalaitunit.

⁵⁰ Tamanna pivlugo ᴋujagijomavagit Nalegak, nellojut akkorngane, akkillo imgerutigilugo ᴋujalijutiksanik,

⁵¹ Attanneᴋotiminut sakᴋertitsijok, piulijaunermik angijoksoarmik, ajungitullijorlo saimartitaminut Davidemut, tapsomalo kinguvânginut soraijuitomik.