II Samuel 21 - Labrador Inuttitut Heritage Bible

Kângnartomik Jarit pingasut nâvlugit Saule pivlugo. Davidib unatadlarninganik sâlaᴋarninganiglo Filisterinik.

¹ Davidib nalliuningane kângnartoᴋalaurivoktauk Jarine tuglerêne pingasune. Davidiblo Nalekab kênanga ᴋennerpa. Nalegarlo oᴋarpok: Saule pivlugo, iglolo aulik pivlugo Gibeonemiut toᴋᴋolaungmagit.

² Tagva attanniub Gibeonemiut ᴋaiᴋojauᴋovait oᴋautilugillo: (Gibeonemiut Israelib ᴋittornganginit pilaungilet, amiakolaukpulle Amoriterinit; Israelible ᴋittorngangita angerᴋattigimarilaukpait, Sauliblo ullimarasuarlaukpait illungertornermine Israelib ᴋittorngangit Judakullo pivlugit.)

³ Tagva Davide manna Gibeonemiunut oᴋarpok: Sunamik piniarvigijaksarivapse? Sunamullo ullapᴋoseraksarivapse, saimartitsiᴋovluse Nalekab kingormgutijanganik?

⁴ Gibeonemiut oᴋautivât: Goldemiglonêt, Silberemiglonet pijomalungilagut Saulemit, tapsomalo iglunganit, pijomalunginivogut kinalonêt toᴋᴋotauᴋovlugo Israeleme. Tamna oᴋarpok: Sunamigle okarkise pinniartuksaunimnik illipsingnut.

⁵ Tapkoa attannek oᴋautivât: Angut taimna asseroilauktok nungutsilauktorlo uvaptingnik, nungutaksarivavut taipsomangat amiakoᴋarᴋonago sunamiglonêt Israelib erkâne illunaine.

⁶ Tunnitsivigitigut angutinik 7 nik, taipsoma iglunganit pijunik, kimitsiᴋovluta taipkoninga Nalekamut, Saulib Gibeaᴋotingane, Nalekab annerilauktangata. Attannek oᴋarpok tunnijomavakka.

⁷ Attanniuble Mefiboseth, Jonathanib, Saulib erningata erninga ivleriva, Nalekab angermaringninga pivlugo, tapkungnangnelauktok tagva Davideme Jonathanemelo Saulib erningane.

⁸ Rizpable Ajab panningata ernigik, ernilauktagik Saulemut, Armoni, Mefibosethelo; taimaktauk Michalib Saulib panningata erningit tallimat, ernilauktangit Adrielemut Barsilaib erninganut, Mahalomiomut, attaniub tiguvait,

⁹ Tunnilaitalo Gibeonemiut agganginut; tapkoa ᴋimikpait ᴋaᴋᴋame Nalekab sângane. Taimak 7 it tapkoa ochovut attautsekut, toᴋᴋolutiglo kattersiviub sivurlerpângata nalliuningane, kattersiviub Gerstinik pigiarningane.

¹⁰ Tagva Rizpab Ajab panningata pôksaijak tiguva issivilâlo ᴋairtub ᴋânganut kattersiviub pigiarningane, immek ᴋillangmit kôlerᴋârtinago tapkonunga; uvlotillugolo tingmitset ᴋillaub attânetut mikolaungilait tapkoa ᴋângine, unnuarmelonêt omajut naternamêtut tapkonungarᴋolaungilait.

¹¹ Davidelo oᴋautsaulerpok, sunamik Rizpab Saulib pannervgangata pinniarlauktanganik.

¹² Davidelo tagvungârpok tigusilunelo Saulib taipsomalo erningata Jonathanib sauninginik, Jabesemiunit Gileademetomit, taipkoa tiglilauktanginik, Bethsanib apᴋosininganit. Filisterinut nivingartauvinginit nalliutome taipsomane Filisterit Saule ullimarmatsuk Gilboab ᴋaᴋᴋangane;

¹³ Kaipaillo tagvangat takpaunga, kattitilugillo kimmitaumajut sauningit illaliutilugit;

¹⁴ Illijartorpaillo Saulib tapsomalo erningata Jonathanib sauningit Zelame Benjaminib nunanganêtome, atâtangata Kisib illuvinganut; pinniarlutiglo tamainik, sorlo attannek perᴋojilaungmat. Taimak Gude tamakkoa kingorngane ullapᴋosersimalaurivok nunamut.

¹⁵ Amale Filisterit unatadlarnermik pigiarlaurivut Israelitinut; Davidelo attersarpok, kivgangitalo illagilugo, Filisterillo sorsugvigivait. Davidelo merngortorlaukpok.

¹⁶ Jesbilo Nobemetok, (Rafab ᴋittorngangita illangat, ᴋallugiangalo ᴋannujaᴋalaukpok Sekelititut 300 ditut oᴋumaitigijunik, sakkoᴋalaukporlo nutânik) tamna issumakalaukpok Davide ullimâromavlugo.

¹⁷ Abisaible Zerujab erningata ikajorpa, Filisterelo ullimarlugo toᴋᴋopa. Tagva Davidib anguteᴋotingita oᴋautimarikpât oᴋarlutiglo: Aularungnaituksauvotit illagiluta sorsungnermut, ᴋaumaute Israeleme ᴋamitauᴋonago.

¹⁸ Mattoma kingorngane ama unatadlarneᴋalaurivok Gobeme Filisterinut. Tagva Sibechaib Husathemiub, Saf Rafatib ᴋittorngangita illangattauk, ullimârpa.

¹⁹ Amalo unatadlarnekalaurivok Gobeme Filisterinut. Tagva Elhananib Jaere Orgimib erningata Bethlehemiojub Goliathe Gathemiok ullimarpa, ᴋallugiaᴋalauktok ipulingmik, umiab napparutangatut îtomik.

²⁰ Amalo unatadlarnekalaukpok sulle Gatheme. Tagvane anguteᴋalaukpok takkijomik, tamna innugangoaᴋalaukpok 6 inik aggangmine ittikkaminelo, tagva kattilugit 24 giovut; tamnalo Rafamittauk erniangolaukpok.

²¹ Israelitillo mittautigingmagit, Jonathanib Simeab Davidib angajuata erninga ullimarpa.

²² Tapkoa sittamat erniangolaukput Rafamut Gathemiomut, ochotitaulutiglo Davidib tapsomalo kivgangita agganginut.