II Samuel 2 - Labrador Inuttitut Heritage Bible

Davidib attaningortitauninganik Judakunut. Isbosethib attanningortitauninganik kinguvarêt assinginut, salagijauninganiglo unatadlarnerme.

¹ Pijoᴋalauktut tamakkoa kingorngane Davidib Nalegak apperiva, oᴋarlunelo: Majorartuksauvîk paunga Judab iglugasaksoangita illanganut? Nalekablo oᴋautiva: Majorarit paunga. Davide oᴋarpok: Namut? Tamna oᴋarpok: Hebronemut.

² Taimak Davide tagvungarpok, nulliangne Ahinoame Jesreelemiok, Abigailelo Nabalib Karmelemiub nulliagilauktanga illagellugik.

³ Angutillo tapsomanêlauktut illautilugit Davidib takpaungartipait, illunatik attunit iglomioᴋotingit illagilugit; igloᴋalerlutiglo Hebronib iglugasaksoangine.

⁴ Judablo angutingit tikkilerput, Davidelo mingoarpât tagvane, attaningortilugo Judakunut. Davidelo oᴋautsaulerame, Jabesemiut Gileademêtut Saule illijartorlaungmatsuk;

⁵ Kivgartortunik tilliklervigivait, oᴋautsauᴋolugillo: Saimartitauleritse Nalekamut, napkiningnermik taimaitomik pinniarlaurapse angajokapsingnut Saulemut, illijartorlaurapsiuk.

⁶ Taimak Nalekab manna napkiningnermik nertornarnermiglo pinniarvigilise; uvangalo ajungitullivigijomagivapse, taimailiorlaurapse.

⁷ Taimaglo manna aggase pitsartutitaulit, sivoraniaraselo: angajoᴋase Saule innôjungnaimat, tagva Judakut mingoarlaukpânga attaningortilunga ingmingnut.

⁸ Abnerible Nerib erningata, Saulib sorsuktuksaksoaᴋotingita angajoᴋangata, Isboseth Saulib erninga tiguva, âpâlo Mahanaimemut,

⁹ Attaningortilâlo Gileademut, Assurimullo, Jesreelemullo, Efraimemullo, Israelitinullo illunainut.

¹⁰ Isbosethelo Saulib erninga Jareᴋalaukpok 40 ginik attanningortitautillugo Israelitinut, attanniotilunelo Jarik magguk nâlugik. Judakulle Davide ungagivât.

¹¹ Nalliutorlo Davide attanniotillugo Hebroneme Judakunut, Jariôvut 7 it takkillo pingasojortut.

¹² Abnerelo Nerib erninga, Isbosethib Saulib erningata kivgangit illagellugit aularpok sorsuktuksaksoaᴋattigênit, ingergalunelo Gibeonemut;

¹³ Joabelo Zerujab erninga aularpok Davidib kivgangit illagilugit; ingmingnullo tikkiutivut Gibeonib tassingane, tangmarterpullo tapkoa miksâne, taipkoalo tatsib akkiane.

¹⁴ Abneriblo Joabe oᴋautiva; Nukapitset parngnailerlit, pingoartigêlerlillo sâptingne. Joabe oᴋarpok: Taimailiolerlit.

¹⁵ Tagva parngnailerput ailutiglo 12 it Benjaminekunit, Isbosethemut Saulib erninganut illingajunit, 12 illo Davidib kivganginit.

¹⁶ Illunatiglo attunît ingmingnut tigutivut niaᴋungitigut, saviksoatiglo kapputivait sanneranginut ochoᴋattigêkpullo. Tamana pivlugo inne tamanna taijauvok Helkat Hazurim Gibeonemêtok.

¹⁷ Sorsungneᴋalerporlo uvlorme taipsomane sôngojomik. Abnerele Israeliblo angutingit sâlagijaulaukput Davidib angutinginut.

¹⁸ Tagvanetoᴋalaukporle Zerujab erninginik pingasunik: Joabe, Abisai, Asahelelo. Asahelele oᴋᴋilalaukpok tuktungajotut naternamêtotut;

¹⁹ Asaheliblo Abner udlapa, nûlungilarlo tallerpingmullonêt, saumingmullonêt Abneremit.

²⁰ Tagva Abner ᴋêviarpok oᴋarlunelo: Asaheleôvît? Tamna oᴋarpok: Ahaila.

²¹ Abnerib oᴋautiva: Pêrit tallerpingmullonêt saumingmullonêt, nukapitsello tapkoa illangat piuk illingnut, aksarlugolo sagvingmiutanganik. Asahelible ᴋemmagomalaungila.

²² Tagva Abnerib Asahele oᴋautipsarpa; Pêrit uvamnit. Sôg pijomavît ullimartaunernik uvamnut, ochoᴋovlutit nunamut? Kanorlo kênara allortitsungnarajarpigo angajuvit Joabib sângane?

²³ Kunnulaukporle nûvigilugo. Tagva Abnerib kingumut ᴋallugiaminut kappiva nângagut, ᴋallugiak tunnuagut annilermat; ochovorlo tagvane, toᴋᴋolerlunelo tapsoma sângane, nalliallo tikkitok tagvunga Asahalib toᴋᴋungavlune nallavigijanganut nokᴋarpok.

²⁴ Joabible Abisaiblo Abner udlavâk seᴋᴋerngub nippininga tikkilugo. Tikkinamiglo Amab kakkarulânganut Giab sânganêtomut, apᴋome sangmijome Gibeonib sunaᴋajuitunganut;

²⁵ Benjaminib ᴋittorngangit kattilerput Abnerib kingorngane, kattimgajoârsolerlutiglo, ᴋakᴋarulaillo illangata ᴋânga aivigivât.

²⁶ Abneriblo Joabe nipliutiva, oᴋarlunelo: Saviksoak sorairane nungutsijuksauva? Nallovît kingorngane ogguanartoᴋarnersaunajarmat? ᴋannok akkunêrtigijomik innugatsuit oᴋautijomangipigît allarᴋovlugit ᴋattangutimingnit?

²⁷ Joabe oᴋarpok: Sorlo mikseᴋârtomik Gude innôngmat, uvlome uvlâkut taimak oᴋarajalauruvit, innugatsuit illunatik attunit allarajarlaukput ᴋattangutimingnit.

²⁸ Joabiblo tiptulaut tiptulausijautigiva, innugatsuillo illunatik nokᴋarput, udlanigungnailutiglo Israelitinik, sorsugungnailutiglotauk.

²⁹ Abnerible anguteᴋotingitalo unnuak tamana nâlugo naternaksoak pissugvigivât, Jordanelo iᴋârpât, Bithronelo illunât ingergavigivât, tikkilutiglo tangmarvingmut.

³⁰ Joabele tunnulerpok Abneremit, innuggatsuillo illunaita kattitipait; Davidiblo kivganginit angutit 19 it kingomajauvut, Asahelelo.

³¹ Davidible kivgangit Benjaminekut Abneriblo anguteᴋotingita akkorngane ullimarnilaukput, angutit 360 git toᴋᴋotaulaungmatta.

³² Asahelelo kivikpât, illijartorlâlo atâtangata illuvinganut Bethlehemêtomut. Joabelo anguteᴋotinelo illagilugit, unuak nâlugo ingergaᴋattigêkput, ᴋagujauvlutik Hebroneme.