II Samuel 19 - Labrador Inuttitut Heritage Bible

Davidib uttertitauninganik Judakunut. Tapsomalo issumatoninganik ᴋujalidlarninganiglo.

¹ Joabelo oᴋautsaumalerpok: Ahâk attannek ᴋêavok, ogguarlunelo Absalome pivlugo.

² Sâlaᴋarnermillo uvlorme taipsomane, kiksarneᴋalerpok innugatsuit illunamasiatik akkorngane, innugatsuit illunamasiatik tussarlaungmatta, attaniub ernine issumajarutigingmago.

³ Innugatsuillo angigutsivlutik, aularasuarput uvlorme taipsomane, iglugasaksoarnut ittertaililutik, sorlo inugiartoksuit angigutsivlutik aularpangmatta, kangusuktitaumajut sorsungnerme ᴋemâlaukpatta.

⁴ Attaniublo kênane ulliksimalaukpa, oᴋausertosarlunelo nipliavok: Ernîk Absalome, Absalome, ernîk, ernîk!

⁵ Joabible attannek iglub illuanut tikkipa oᴋarlunelo: Uvlome kivgatit, uvlome piuliklerlauktut tarningnik, ernivîllo, pannivillo, nulliavillo panervgaᴋotivillo tarninginik, illunaita kangusuktilaukpattit;

⁶ Omigijitit nagligigangne, nagligijitillo omigigangne, mallugosuᴋojigavit uvlome angajoᴋajat kivgatit kamaginginangne. Mallugosugalloarama uvlome, Absalome innotuinarajarpat, uvagullo uvlome illunata toᴋᴋonajarupta, idluarasugituinarajarpat tamanna.

⁷ Tagva parngnailerit manna annilutillo, illanâᴋarlutillo kivgatit oᴋarᴋattigilerkit. Oᴋautimarikapkit Nalekame: Anniniangikuvit, angut attauserlonêt, illingnêtuarniangilak unnuarme tamattomane. Tamanna sugalunersauniarpok illingnut, kappianartunit tamainit tikkitautigijarnit innuosungnernit manna tikkilugo.

⁸ Tagva attannek parngnailerpok, ingilunelo ittertarviub illuanut. Innugatsuillo illunaita oᴋautsaulerput: Ahâk attannek iksivavok ittertarviksub illuane. Tagva innugatsuit illunatik tikkilerput attanniub sânganut. Israelitille ᴋemmâlaukput illunatik attunît iglomingnut.

⁹ Innugatoksuillo illunatik aivaᴋattigêlerput Israelib kinguvarêngine illunaine, oᴋarlutiglo: Attanniub piulilaukpâtigut omigijipta agganginit, piulilaukpâtigullo Filisterit agganginit, ᴋemmâjariaᴋalaukporlo nunamit Absalome pivlugo.

¹⁰ Absalomelo mingoarlauktavut attannioᴋovlugo uvaptingnut toᴋᴋolaukpok unatadlarnerme. Sôg manna ᴋikkarᴋise taimak, attannek aitaililugo pigapse?

¹¹ Attannerlo tilliklerpok Zadokemut Abjatharemullo ajochertuijungnut, oᴋautsauᴋovâglo: Angajoᴋaunerôjut Judakune oᴋarᴋattigisigik, oᴋarlutiglo: Sôg illipse kingurlerpaujomavise attanek aimilugo iglunganut? (Israelitit illunatik oᴋausingit tikkisimalaungmatta attanniub sânganut iglunganut.)

¹² Illipse ᴋattangutigivapse, sauneᴋattigiluse uvineᴋattigivapse; Sôg taimaimat illipse kingurlerpaujomavise, attannek aimilugo?

¹³ Amasamullo oᴋaleritik: Sauneᴋarᴋattigingilagit uvineᴋarᴋattigingilagillo? Gudib imâglo imâglo pinniarvigilinga, angajoᴋaksoangojuksaungikuvit sorsuktuksaᴋattigêksoarnut sâmne, Joabib iningane, innôtsit nâlugo.

¹⁴ Judakullo angutingita illunatik omattingit sangutipait, sorlo angutib attautsib omattingatut. Tilliklerpullo attanermut: Kailaungmît, igvit kivgaᴋotitillo illunamasiatik.

¹⁵ Taimak attannek utterivok, Jordanemullo tikkimat, Judab angutingit Gilgalemut tikkisimalaukput, attersaromavlutik, attannek pachrearomavlugo, attannerlo ikârtilugo Jordanib akkianut.

¹⁶ Simeilo, Gerab erninga, Jeminib erningata Bahurime nunakalauktok, tuavilaukpok, Judablo angutingit illagallugit attersarpok attannek pachrearlugo.

¹⁷ Angutillo 1,000 dit Benjaminekunit illagivât, taimaktauk Ziba, kivgak Saulib iglunganit pijok, ernine 15it, kivganelo 20 git illagilugit, Jordanelo ikârpât attannek sivurlervigilugo.

¹⁸ Umiarlo oppalungaijarpât, attaniub illangit ikârtilugit, pinniarlutiglo ᴋuviagijanginik. Simeile Gerab erninga attanniub sânganut pamakterpok Jordane ikârmago,

¹⁹ Oᴋarlunelo attannermut: Nalekama idluitullinermik tamattominga illingatiniarnangatôk, erᴋainiaranelo kivgavit idluitullivigilaungmatit uvlorme taipsomane, nalegara attannek annitillugo Jerusalemit, attaniublo omamiutariniarnagotôk.

²⁰ Kivgait illitarksilermat idluitullidlalaurama. Ahâglo uvlome tikkitunit Josefib iglomiuᴋotinginit tamainit sivurlioᴋauvunga, nalegara attannek pachrearomavlugo.

²¹ Abisaile Zerujab erninga kiovok oᴋarlunelo: Simeilo tamanna pivlugo, toᴋᴋotaksaunajangilâk, Nalekab saimartitanga oᴋarnerlotigilauralloarmago?

²² Davidele oᴋarpok: Uvanga sugivissinga illipse Zerujab ᴋittorngangit, uvlome Satanasingoromagapse uvamnut? Uvlome kina toᴋᴋotaujuksaunajarᴋa Israeleme? Issumavît ᴋaujimalunginama, uvlome attanningortitaumagama Israelitinut?

²³ Attannerlo Simeimut oᴋarpok: Toᴋᴋojuksaungilatit. Attaniublo angermarikpa.

²⁴ Mefibosethe Saulib ernguta ᴋailune attersarivok, attannek pachrearlugo. Ittikkanelo uminelonêt ipêrutilaungilait, annoranelo ergortorlaungilait uvlormit taipsomangat, attanniub aularvianit, uvlok taimna ullapirsauteᴋarlune uttermat tikkilugo.

²⁵ Tagva manna Jerusalemut tikkiname attannek pâromavlugo, attanniub oᴋautiva: Sôg aularkattigilaungipinga Mefiboseth?

²⁶ Tamnalo oᴋarpok: Nalegara attannek! kivgama uivêrilaukpânga. Kivgait issumaᴋalaungmat, siuteᴋoᴋtôjut illangat iksivaviktâromavara, ablangajomalungalo tapsoma ᴋângane, attannermullo ingergalunga; kivgait tussiangmat.

²⁷ Tamannalo tappilugo taipsoma kivgait passilauriva attanerme. Nalegarale attannek Gudib Engelingatut îpok; pinniarit namagijarnik.

²⁸ Atâtama iglomioᴋotingit illunatik sunaulautsengimatta, assianik, innungnit toᴋᴋotaksanit, nalekama attanniub sângane; taimak kivgait ingitilaukpat taipkoa nerrimarᴋattaujut nerrimavingne akkornganut; sunamik assianik idluartomik pitjutiksaᴋarᴋîk attannek nipliarvigilugo?

²⁹ Attanniub oᴋautiva: Sunamik unnurnersanik oᴋarᴋît sulle illuserilauktat pivlugo? Oᴋautigilaukpara: Igvillo Zibalo perorsêvik avingniarpattik illiptingnut.

³⁰ Mefiboseth attanermut oᴋarpok: Taipsoma illuêngarlugo tiguliuk, nalegara attannek ullapirsauteᴋarlune angerarsimalerêrmat.

³¹ Barsilailo Gileademiok attersarpok Roglimit, attannerlo tessiorpa Jordanib akkianut, Jordaneme ᴋannilaromavlugo.

³² Barsilailo innutoᴋaudlalaukpok Jarekarlune 80 ginik; tapsoma attannek pattangaitilaukpa, Mahanaimetillugo, angutitsiangolaurame.

³³ Attannerlo Barsilaimut oᴋarpok: Ikârᴋattigijaksarivarma, pattangaititsomavagit uvamne, Jerusaleme.

³⁴ Barsilaile attannermut oᴋarpok: Sunauva sulle inôneriniartara, uvanga attannek illagellugo takpaungartuksaugama Jerusalemut?

³⁵ Uvlome Jarekarpunga 80 ginik. ᴋannok uvanga illitarksijuksaunajarᴋik, sunamik idluarmangât, idluimangâllonêt, ikpigilungalonêt sunaumangât nerrijara, imertaralo, tussarlungalonêt sunaumangatta imgerpaktut angutit imgertullo arnat imgerutingit? Sôg kivgavit nalegara attannek akkunênersamik pagvisaraksarivaûk?

³⁶ Kivgavit attannek kêtamik ᴋannilaraksariva Jordane ikârlugo. Sôg attaniub taimaitomik nelileromavânga?

³⁷ Kivgait utterᴋoleruk, toᴋᴋolerᴋovlunga iglugaseksoarne igloᴋarvigijamne atâtama, anânamalo illuvikita tungâne. Ahâk ovanêpok kivgait Kimeham, tamna nalegara attannek illagellugo ailerle, pinniarvigilugolo namagijarnik.

³⁸ Attannek oᴋarpok: Kimehamib aiparijaksarivânga akkianut, uvangalo pinniarvigijomavara ᴋuviagijarnik; tamainiktauk annerijarnik uvamnit, tamakkoninga pinniaromavunga.

³⁹ Innugatoksuillo illunatik Jordane ikarêrmatsuk, attanniublotauk, attanniub Barsillai kunnikpa saimartilâlo; tamnalo utterivok nunaᴋotiminut.

⁴⁰ Attannerlo ingergavok Gilgalemut, Kimehamiblo ingergaᴋattigiva. Innugatoksuillo Judakut illunamasiatik attannek ikârtilaukpât, innugiartoksuille Israelitit ketterᴋatuinangit tagvanêlaukput.

⁴¹ Ahâglo, tagva Israelitit angutingit illunatik tikkilerput attannermut, oᴋautivâllo: Sôg ᴋattangutipta Judakut angutingita tiglilaukâtit, attannerlo iglomioᴋotingillo, ikârtilauᴋagit Jordanekut, Davidiblo anguteᴋotingit illunaita illagelugo?

⁴² Tagva Judakut angutingita Israelitit kiovait; attannek ᴋannidlartomik illagivavut, sôg tamanna ningarosujutigivissiuk? Attanermit nerᴋiksamik pilliusianiglonêt pilaurasugivittigut?

⁴³ Taimak tagva Israelitit angutingita Judamit pijut, kiovait oᴋarlutiglo: Uvagut tallimaujortuêrtorluta pitjuteᴋarnersauvogut attanermut, taimaktauk Davidemut, illipsingnit. Sôgle tagva uvagut taimak sunaungitonasugivittigut, oᴋautsivut sivurliotitaulaungimatta, attanivut ailugo? Judable angutingit songonersanik oᴋauseᴋalaukput Israelitit angutinginit.