II Samuel 18 - Labrador Inuttitut Heritage Bible

Absalomib sorsuksoaᴋotingita salagijauninginik Joabemut; Absalomib kappijauninganik, nivingatillugo nappartome Eichemik attelingme.

¹ Davidiblo innugatsuit illagijine oppalungaijarpait, angajoᴋaᴋartilaitalo 1,000 dinut, 100 dinullo.

² Tillivaillo, innugatsuit pingajungit attautsit, Joabe angajoᴋagilugo; pingajungillo attautsit, Abisai angajoᴋagilugo; pingajungillo attautsit Ithai Gathemiok angajokagilugo. Attannerlo innugatoksoarnut oᴋarpok: Uvangatauk aularᴋattigijomavapse.

³ Innugatsuille oᴋarput: Aulartuksaungilatit; uvagulle ᴋemâniaralloarupta, ᴋetterarlutalonêt toᴋᴋolerniarupta, kamaginiangilâtigut; igville îpotit sorlo 10,000 ditut uvaptingnit; taimak manna namanersauvok ikajoruptigut iglugasaksoarnint.

⁴ Attanniub oᴋautivait: Namagijapsingnik pinniaromavunga. Attannerlo ittertarviksub tungânut nangeriartorpok, innugatoksuillo illunatik annilerput, 100 dit kattigêklutik, 1,000 dillo kattigêklutik.

⁵ Attanniublo Joabe, Abisailo, Ithailo perᴋovait, oᴋautilugillo: Sugautitaililugo nukapiak Absalome pinniarvigisiuk. Innugatoksuillo illunatik tussarput attanniub angajoᴋait illunaita perkungmagit Absalome pivlugo.

⁶ Innugatoksuillo sillatânut naternamut tikkimatta, Israelitit pachrearlugit; tagva sorsungnek pigiarpok Efraimib nappartungine.

⁷ Innugatoksuillo Israelitit sâlagijauvut tagvane Davidib kivganginut, uvlorme taipsomane ullimartauneᴋalaungmat angijomik, angutinik 20,000 dinik.

⁸ Sorsungnerlo siamarsimalaukpok tagvane nuname illunâne; nappartulle nungutsinersaulaukput innungnik uvlorme taipsomane, saviksoarmit.

⁹ Absalomiblo Davidib kivgangit pârpait, ablangavlune horseojartub ᴋângane. Horseojartorlo nappartoksub silliktub Eichemik attiggub attânut tikkimat, niakunga nâpok Eicheme, nivingalunelo ᴋillaub nunablo akkorngangne, horseojarᴋotingale tapsoma attânit pangalidlarlune aularpok.

¹⁰ Angutit illangata tamanna takkogamiuk, oᴋautigiva Joabemut, oᴋarlunelo: Ahâk Absalome takkolaukpara nivingatillugo Eicheme.

¹¹ Joabiblo angut tamna oᴋautjine tamattominga oᴋautiva: Ahâk, tamattominga takkolaukît? Sôg annaulaungikiuk, nunamut ochotilugo? Tagva pivlunga Silberlinginik 10 nik, tapserumiglo tunnitsivigijomanajarpagit.

¹² Angut tamna Joabemut oᴋarpok: Silberlinginik 1,000 dinik tunnitsivigigalloarumga aggamnut, sulle aggakka illijomanajangilakka attanniub erninganut. Attanniub igvit perᴋolaungmattit. Abisailo Ithailo siutiptingnut tussartilluta, oᴋarlunelo: Udsertoritse, kinalonêt pinniarluᴋonnago nukapiamut Absalomemut.

¹³ Ubvalo sunamik idluitullinajalauruma nangiarnartomik tarnimnut, attannek sunamiglonêt angigutijaulungimat; tagva igvit nangminek akkerartorajarparma.

¹⁴ Joabe oᴋarpok: Taimak akkunêrtigijomik nokᴋarungnangilanga illingne. Tagva Joabib ᴋallugitset pingasut tiguvait aggangminut, kapputilaitalo Absalomib omattinganut innotillugo sulle Eicheme.

¹⁵ Nukapitsallo tallimaujortut, Joabib sakkunginik akjarsijut, tikkilutik illumavât, annaulerlugolo toᴋᴋopât.

¹⁶ Tagva Joabib tiptulaut tiptulausijautigiva, innugatoksuillo utterᴋovait, udlanigungnaiᴋovlugit Israelitinik; Joabib innugatsuit ivlerijomangmagit.

¹⁷ Absalomelo tiguvât, egilugolo nappartut akkornganut ittersâlungmut, ujarᴋello unnuktut perorliutivait ᴋânganut. Israelitillo illuêngarlutik attunît ᴋemâvut igloᴋotimingnut.

¹⁸ Absalomele nappajoksoamik nangminerijaminut nappartitsilaukpok inôvlune sulle; tamna napparsimavok attaniub naksaᴋotingane. Oᴋalaurame: Erneᴋangilanga, tamana pivlugo, tamanna erᴋaumajaksaujuksauvok attimnut; atserarpâlo nappajok attine malliklugo, taijauvorlo uvlok tamanna tikkilugo, Absalomib inninganik.

¹⁹ Ahimaaz Zadokib erninga oᴋarpok: Nagliktara akpangerlangatôk, attannerlo nallojungnaitilugo, Nalekab piulijaunermik sakᴋertitsivigingmago omigijingita agganginit.

²⁰ Joabible oᴋautiva: Igvit uvlome taigoraksamik ajungitomik âtsiniangilatit. Uvlub tamattoma assiane taigotaksamik âtsiniarpotit, uvlomeloungitok; attanniub erninga toᴋᴋungmat.

²¹ Kusimulle Joabe oᴋarpok: Attannek oᴋautijartoleruk takkolauktarnik. Kusiblo Joabe opigiva, akpangerlunelo.

²² Ahimaazele Zadokib erninga oᴋapsarpok Joabemut: ᴋannok uvangatauk akpangerajaruma Kusi malliklugo? Joabe oᴋarpok: Sôg akpangeromavît ernîk? ᴋait ovunga, taigoraksamik ajungitomik âtsiniangilatit.

²³ ᴋannok akpangerajaruma? Tapsoma oᴋautiva: Tagva akpangerit. Taimak Ahimaaz akpangerpok apᴋome naggonerpâme, Kusilo sivurngitorpa.

²⁴ Davidele iksivavok upᴋoaksoak magguk akkorngangne. Udsertortelo majoarpok upᴋoaksub avalunetub ᴋânganut, ijingminullo takkosarpok, takkolunelo angumik, inutôlune akpangertomik.

²⁵ Nipliarporlo, attannerlo oᴋautiva tamattominga. Attanerle oᴋarpok: Innutôgune, tagva taigotaksak ajungitok tapsoma ᴋanninganêpok. Tamnalo tuaviluᴋarlune ᴋannilertillugo,

²⁶ Udsertortib angutib taipsoma assia akpangertok takkova, nipliarlunelo upᴋoaksoarmut, oᴋarlunelo: Ahâk angut innutôlune akpangerpok. Attannek oᴋarpok: Tamnatauk kivgartorteôvok ajungitok.

²⁷ Udsertorte oᴋarpok: Sivurliub akpangerninga takkovara Ahimaazib Zadokib erningata akpangerningatun îmat. Attannerlo oᴋarpok: Angutauvok tamna idluartok, ajungituniglo taigotaksanik ᴋaitsivok.

²⁸ Ahimaazele nipliarpok, oᴋarlunelo attannermut: Ullapirsaut! Opigosuklunelo attanniub sângane kênane pûlugo nunamut, oᴋarlunelo: Nertortaule Nalegak Gudît, innuit aggamingnik issaktitsilauktut nalekamnut attannermut akkerartorlugo unertutigijingat.

²⁹ Attannek oᴋarpok: Nukapiak Absalome ᴋanoêlungigalloarᴋa? Ahimaaze oᴋarpok: Angijomik aulajadlarnermik takkolaukpunga, attanniub kivgangata Joabib uvanga kivgait tillingmanga, nellovungalo sunaulaungmangat.

³⁰ Attannek oᴋarpok: Avatâgorit nangeriartorlutillo maunga. Avatâgorporlo nangeriartorlunelo tagvunga.

³¹ Ahâk tagva Kusi tikkilerpok, oᴋarlunelo: Mâne taigoraksaᴋarpok ajungitomik, nalegara attannek! Nalekab uvlome piulijaunermik sakᴋêvigilaukpâtit, illunatik akkerartorlauktivit agganginit.

³² Attannerle Kusimut oᴋarpok: Nukapiak Absalome ᴋanoêlungigalloarᴋa? Kusi oᴋarpok: Nalekama attanniub omigijingit illunaita illingajuksauvut nukapiab oma illinganingatut; illunaitalo akkerartortut illingnik idluitullijomavlutik.

³³ Tagva attanek kiksalerpok, ailunelo iglomut angijomut ittertârvingmêtomut, ᴋêalunelo, pissuklunelo oᴋarpok imâk: Ernîk, Absalom, ernîk, ernîk Absalome! Gude pijomaletôk uvanga toᴋᴋojuksaunimnik inningne! Absalomekotîk, ernîk, ernîk!