II Samuel 16 - Labrador Inuttitut Heritage Bible

Zibab mangatsininganik Mefibosethemik. Simeib oᴋarnerlotjininganik Davidemik. Absalomib mallingninganik Ahitofelib attannertuininganik piungitoâlungmik.

¹ Davidelo ᴋakᴋab pôktojoninganit kêtamik attersarêrmat; ahâk tagva Zibab Mefibosethib kivgangata pârpa, siuteᴋoᴋtojunik ᴋapsinik iksivavilingnik neksarlune; tapkoalo ᴋângine niaᴋojaᴋarpok 200 dinik, Weiniblo paunganginik kattingajunik pannertunik 100 dinik, Feiginiglo 100 dinik, publaujamiglo Weinelingmik.

² Tagva attannek Zibamut oᴋarpok: Sunamut ukkoa attoromavigit? Ziba oᴋarpok: Siuteᴋoktojut attanniub illanginut illingajuksauvut, ᴋângine ablangaᴋovlugit, niaᴋojallo, Feigillo nukapitsanut nerkiksaujuksauvut, Weinelo imiksauvok tapkonunga, merngortorniarpatta sunaᴋajuitome.

³ Attannek oᴋarpok: Angajoᴋavit erninga nanêᴋa? Ziba attannermut oᴋarpok: Ahâk nokkangalaukpok Jerusaleme; oᴋarame: Uvlome Israelib iglomiokotingita atâtama nalegauvinganik tunnitsiviginiarivânga.

⁴ Attannek Zibamut oᴋarpok: Ahâk Mefibosethib perᴋutingit tamaita perᴋutaujuksauvut illingnut. Ziba oᴋarpok: Opigosukpunga, saimaneksilaunga sângne angajoᴋâra âttanerijaralo.

⁵ Attannerle Davide tikkimat Bahurim tikkilugo, ahâk tagva angut tagvangat annilerpok, Saulib iglungata kinguvânganit pijok, Simeimik attelik, Gerab erninga, tamna annilerpok oᴋarnerluklunelo.

⁶ Millorpâlo Davide ujarᴋanut, attanniublo Davidib kivgangit illunaita. Innugatsuit illunatik sôngojoᴋotingillo illunatik, tapsoma tallerpianelaungmatta saumianelo.

⁷ Imâgle Simei oᴋarpok, oᴋarnerlutjilune: Annit, annit, kingmiôjotit aungmik nerrijok, anguteâlôjotit!

⁸ Nalekab akkiniarutigimavâtit Saulib iglomioᴋotingita illunatik aungit pivlugit, tamna inangêrlugo attaningorsimagavit. Manna Nalekab attanniovik tunnimava ernerpît Absalomib agganginut; ahâglo manna ᴋannoêtoᴋotingnêpotit, kingmiôgavit aungmik nerijok.

⁹ Abisaile Zerujab erninga oᴋarpok attannermut: Kingmiub toᴋᴋungajub oma angajoᴋara attannek okarnerlotitaksarivaûk? Aivigijomavara, niaᴋunganiglo nussuijomavara.

¹⁰ Attannek oᴋarpok: Illipse Zerujab ᴋittorngangit sugivissinga? Oᴋauteᴋalulerle; Nalekab perᴋungmago: Davide oᴋarnerlotiuk. Kina manna oᴋarungnarᴋa? Sôg taimailiorᴋît?

¹¹ Davidelo Abisaimut kivgaminullo illunainut oᴋarpok: Ahâk, ernima, timimnit pimajub, pijugakpânga, suna pivlugo Jeminib erninga una manna taimailiortuksaunginiva? Agviarnago taimailiorle, oᴋarnerluᴋovlugo, Nalekab perᴋolaungmago.

¹² Imakkâ Nalekab ajulernera takkonârniarpa, pitsiarnermullo akkinniarlunga tapsoma oᴋarnerlotjininga uvlomênitak pivlugo.

¹³ Taimak Davide innuᴋotine illagilugit sivumuarpok apᴋosinerme; Simeile ᴋakᴋab uvinganingane pissukpok senniane, oᴋarnerluklunelo, ujarllo ivjullo kattingajut milloriutivait tapsomunga.

¹⁴ Attannerlo innugatoksuillo illunatik, Israelib angutingit illagijangit illagilugit, merngortorlune tikkipok Ajelimut, nakkoksilarmelo ingminik tagvane.

¹⁵ Absalomele innugatoksuillo, Israelib angutingit illunatik Jerusalemut tikkilerput, Ahitofeliblo illagiva.

¹⁶ Husaible Arachemiub Davidib illanârijangata Absalome itteramiuk, Absalome oᴋautiva: Pilloringnartoᴋarle, nalegak attannek! Pilloringnartoᴋarle, nalegak attannek!

¹⁷ Absalomible Husai oᴋautiva: Tamannauva napkiningnît illannarijingnut? Sôg illannârijît illagilaungiᴋiûk?

¹⁸ Husaible Absalome oᴋautiva: Taimangungitok, Nalekable innugatoksuillo ukkoa, angutillo illunatik Israeleme anerijanganut perᴋutaujomavunga, tapsomanêtsainaromalungalo.

¹⁹ Amalo kina kivgartoraksarivigo? Erningata sângane kivgartortuksaungilanga? Sorlo atâtavît sângane kivgartorlaurama, taimailingajomagivunga sângne.

²⁰ Absalomelo Ahitofelemut oᴋarpok: Attannertuileritse, sunamik pinniartuksauvita?

²¹ Ahitofelelo oᴋarpok Absalomemut: Atâtavit pannervgangit, ᴋemalauktangit paiᴋovlugit iglomik, uviniᴋattigikit; tagva Israelitit illunamasiangit tussarniarput atatait tippeluktilaurangne, illunatiglo aggangit illingnêtut nangiartuinersaulerniarput.

²² Tagva tuppek napparterpât Absalomemut iglub ᴋângane, Absalomiblo atâtame pannervgangit uvineᴋattigivait, Israelitit illunamasiatik ijingita sângine.

²³ Nalliutome taipsomane, Ahitofele attannertuilaurangat, tamanna illingalaukpok sorlo Gude apperijaunajalaukpat; taimailaukput Ahitofelib attannertuiningit illunaita, tamangne Davideme Absalomemelo.