II Samuel 15 - Labrador Inuttitut Heritage Bible

Absalomib attaningoromaninganik. Davidib ᴋemâninganik.

¹ Pijoᴋalaukporlo tamakkoa kingorngane Absalome âᴋiksoiᴋojilaungmat ingminut aksalloalingnik horseniglo, angutiniglo 50 ginik, sivurlerpaktunik tapsominga.

² Absalomelo taimak uvlâkut annijajovok, nangeriartorlunelo apᴋosiniub kiglinganut ittertârviub kannitanganut. Kinalo passiklerneᴋalaurangat, attanniub idluarsaivianut aijomalaurangat; Absalomib ᴋaiᴋova ingminut, oᴋarlunelo: Iglugasaksuit nallianit pivît? Tamnalo tagva oᴋalaukpat: Kivgait Israelib kinguvarêngita illanganit pivok;

³ Tagva Absalomib oᴋautiva: Ahâk illiornît idluarpok, namatuinarlunelo, kiglissiniarteᴋangilatille attannerme.

⁴ Absalomelo oᴋarpok: ᴋannoktôk uvanga idluarsaijungortitaunajaruma nuname, nalliat sunaᴋartok idluarsartaujutiksaᴋartorlo tikkilerajarᴋovlugo uvamnut, uvanga ikajorajarᴋovlunga tapsominga, idluarnermik piᴋovlugo!

⁵ Kiale kaglilerangago opigijomavlugo, tagva aggane issakpait tigulâlo, kunniklâlo.

⁶ Absalome taimailiorpok Israelitinut illunamasianginut, ᴋailerangatta attanermut idluarsartaujomavlutik, tiglikpaillo taimak Israelitit angutingita omattingit.

⁷ Jarit 40 git kingorngane Absalome attannermut oᴋarpok: Aijomavunga angerneralo nallautsititsomavara Hebroneme, Nalekamut angernerilauktara.

⁸ Kivgait angerlaungmat, Gesuremêdlunga Siriame, oᴋarlungalo: Nalekab ama tikkiutipanga Jerusalemut, tagva Nalegak kivgartoromavara.

⁹ Attanniub oᴋautiva: Ullapirsauteᴋarlutit aularit. Parngnailerporlo, ailunelo Hebronemut.

¹⁰ Absalomele nautsertortuksanik tilliklilaukpok Israelitit kinguvarênginut illunainut, oᴋautsauᴋojilunelo: Tiptulautib nippinganik tussarniarupse, tagva nipliaritse: Absalome attanningortitaumavok Hebroneme.

¹¹ Angutille 200 dit Jerusalemit ᴋaiᴋojaumajut Absalome illagivât; issumalingasuêrlutigle aivut, ᴋaujimanatiglo pijoᴋartomik tamattominga.

¹² Absalomele tilliklilerivoktauk Ahitofelemut Gilomiomut, Davidib attannertuijoᴋotinganut, iglogasaksoanganit Gilomik attelingnit pijomut. Manna tunnergutinik tunnijingmat, angerᴋattigênek pitsartulerpalliavok, innugatoksuillo kailutik unnuksivalliavut Absalomeme.

¹³ Tagva attausek tikkilerpok, tamna oᴋautjivok Davidemik tamattominga, oᴋarlunelo: Israelitit illunatik attunit omattingita Absalome mallikpât.

¹⁴ Davidele kivgaminut tapsomanêlauktunut Jerusaleme illunainut oᴋarpok: Atte ᴋemâlerta, mâne annigoiviksaᴋarniangimat Absalomemit; tuavititse aularᴋovluta, oppaluijauᴋonnata tapsomunga, tigusilunelo uvaptingnik, pijaksaungitomiglo pititsivigivluta, Iglugasaksuillo ullimârlugit saviksub kênanganut.

¹⁵ Tagva attanniub kivgangit oᴋarput tapsomunga: Ahâk kivgatit oppalungêrsimavut, pinniarlutik sunamik, angajoᴋama attanniub annerosungninganik.

¹⁶ Attannerlo pissuklune annivok iglomioᴋattine illunatik illagilugit. Arnalle tellimaujortut pannervgat nokᴋarᴋovait, paiᴋovlugit iglomik.

¹⁷ Attannerlo innugatoksuillo illunatik pissuklutik annijarêramik, nokᴋarput iglub ᴋanningitangane.

¹⁸ Kivgangillo illunatik sanianêlutik pissukput; taimaktauk Kretit Pletillo, Gathemiullo illunatik, angutit 600 dit pissuklutik Gathemit tikkilauktut, attannek sivurlervigivât.

¹⁹ Attannerlo Itaimut Gathemiomut oᴋarpok: Sôg igvittauk illagivittigut? Utterit attannermêtuarlutillo; tujormiangôgavit, nunagilauktarnillo aularlutit tamaungarpotit.

²⁰ Ikpaksak tikkisimavotit, uvlomelo ᴋajusivotit aularᴋattigijomavluta. Uvangale aijomavunga aivigijungnartamnut. Utterlaurit, ᴋattangutitillo illagellutit napkigijaunermik nertornarnermiglo pilit.

²¹ Itai kiovok oᴋarlunelo: Sorlo mikseᴋârtomik Nalegak inôngmat, sorlolo mikseᴋârtomik angajoᴋâra attannek inôngmat, nane angajokama attanniub inneᴋarniarningane, toᴋᴋomut illinganiarmangat innôtsemullonêt, kivgait tagvanêniarivok.

²² Davide oᴋarpok Itaimut: Tagva ᴋait, aularᴋattigilutalo. Taimak Itai Gathemiok anguteᴋotingillo illunatik aikattauvut, sorrutsillo illunatik illagijangit.

²³ Nunamiullo illunatik ᴋêadlarput nippeᴋortôjomut, innugatoksuillo illunatik ᴋannilârpait. Attannerlo aivok kôb Kidronib akkianut, innugatoksuillo illunatik sivurlerput, apᴋosinerme sunaᴋajuitomut sangmijome.

²⁴ Ahâglo Zadok tagvanêlaurivok, Levitillo illunatik tapsomanêlauktut, akkigarlutiglo Gudib angerningata iklervinganik, illilâlo tagvunga. Abjatharelo kagverpok innugatsuit illunatik iglugasaksoarnint anniᴋârtinnagit.

²⁵ Attanniuble Zadoke oᴋautiva: Gudib iklervinga iglugasaksoarnut âlaungmiuk. Saimaneksiniaruma Nalekab sângane, tagva ainiarivânga, takkoᴋoniarpângalo ominga iglominiglo.

²⁶ Oᴋarunele imâk: Kuviagingilagit; ahâk mânepunga. Tapsoma pinniarvigilinga namagijaminut.

²⁷ Attanniublo ajochertuijok Zadok oᴋautiva: Igvit takkojôlungilatit? Utterit iglugasaksoarnut ullapirsauteᴋarlutit, illagellutiglo ernîktik, Ahimaaz ernît, Jonathanelo Abjatharib erninga.

²⁸ Ahâk natername sunaᴋajuitome uttakᴋijomavunga, kivgartortomik tikkitoᴋarᴋârtinnago illiptingnit, oᴋautauᴋârtinangalo.

²⁹ Taimak Zadokib Abjathariblo Gudib iklervinga âlerivâk Jerusalemut, tagvanêtuarlutiglo.

³⁰ Davidible ᴋakᴋak orksuktalik majorarpa ᴋêalunelo, niaᴋungalo ulliksimalaukpok, ᴋammilârlunelo pissukpok. Taimaktauk innugatsiut illunatik illagijangita attunnit niaᴋotik ulliksimalaukpait, majorarpullo ᴋêalutiglo.

³¹ Davidelo oᴋautsaulerame, Ahitofelib Absalome illagingmago, oᴋarpok: Nalegak, Ahitofelib attanertuininga sillainingortilauruk.

³² Davidelo ᴋakᴋab ᴋânganut tikkimat, tagvunga, Gudemik tuksiarviovaktomut, ahâk tagva Husaib Arachemiub pârpa, ulliglijarlune alliksimajomik; ivjoᴋarlunelo niaᴋomine.

³³ Davidiblo oᴋautiva: Igvit illagigumga oᴋumaijutiksauniarpotit uvamnut.

³⁴ Iglugaseksoarnulle ailerajaruvit oᴋarajarlutillo Absalomemut: Kivgarivarma, attannermut illingajomavunga, atâtarnut kivgaulauktunga nalliutome taipsomane, kivgaujomavunga manna illingnut; tagva idluarᴋutiksamnut Ahitofelib attannertuininga asserorajarpat.

³⁵ Taimak Zadokib Abjathariblo ajochertuijuk illagivâtit. Tamaita tussarniartatit attaniub iglunganit oᴋauseriniarpattit ajochertuijungnut Zadokemut Abjatharemullo.

³⁶ Ahâk tapkungnanêpuk ernikik, Ahimaaz Zadokib, Jonathanelo Abjatharib erninga. Taipkungnûna oᴋautauᴋojungnarparma tussarniartarnik.

³⁷ Taimak Husai, Davidib illanârijanga, tikkilerpok iglugaseksoarnut; Absalomelo tikkilerpok Jerusalemut.