II Samuel 14 - Labrador Inuttitut Heritage Bible

Absalomib saimarvigijauninganik, arnab tuksiutsininga tapsominga pivlugo.

¹ Joabele Zerujab erninga mallugosulerpok attaniub omattinga torarmat Absalomemut,

² Tilliklerlunelo Tekoamut aiklerᴋojilunelo tagvangat arnamik sillatojomik, oᴋautivâlo: Ogguarit annorâniglo ogguarsiutinik attitilerit, mingoarniarnaglo illingnik orksumut, arnaujalerille akkunît ogguarlauktomik toᴋᴋungajok pivlugo.

³ Attanermullo ittertuksauvotit, oᴋarᴋattigilugolo imaitomik imaitomiglo. Joabiblo ᴋaujitipa sunamik oᴋartuksauninganik.

⁴ Arnablo Tekoamiub attannek oᴋarᴋattigijomagamiuk, pamakterpok nattermut kênane pûvlugo, opigosulunelo, oᴋalarmelo: Attannek ikkajorlaunga!

⁵ Attanniub oᴋautiva: Suvît? Tamna oᴋarpok: Uigarniôvunga, arnak ogguartok, uigalo toᴋᴋolerlaukpok.

⁶ Kivgaillo arnak ernekalaukpok maggungnik, tapkoa naternamêdlutik aivaᴋattigêlaukpuk, piuliklertokalaungimallo, aipangata aipa annaudlugo toᴋᴋolaukpa.

⁷ Ahâglo, manna illagêt illunatik kivgait akkerartorvigilerpât, oᴋarlutiglo: Ernît toᴋᴋotsilauktok ᴋattangutiminik ᴋaitsuk, toᴋᴋotsiᴋovluta taipsominga, ᴋattangutingata toᴋᴋolauktangata tarningata akkiniarutiksanganut, kingormgojijuksarlo pêjaromavavut; ingniârsuᴋotigalo amiakojok sulle, ᴋamitsomavât, uigilauktamnit amiaᴋokarᴋonago attermiglonêt sunamiglonêt nuname.

⁸ Attanniub arnak oᴋautiva: Angerarit, pivlutit perᴋojijomavunga.

⁹ Arnablo Tekoamiub attannek oᴋautiva: Nalegâk attannek, idluitullinek tamanna illingalerle uvamnut, atâtamalo iglomiuᴋotinginut, attannerle iksivautaksoangalo passijaksaungilik.

¹⁰ Attannek oᴋarpok: Kina akkerartorlutit oᴋauseᴋartok, tamna ᴋaitsuk uvamnut; tagva aktuijungnaituksauvok illingnik.

¹¹ Tamna (arnak) oᴋarpok: Attannek, Nalegarnik Gudingnik erᴋaumalerle, aungmik akkiniartut unnulualerᴋonnagit, asseroilutik, erneralo pêjartauᴋonnago taipkonunga. Tamna oᴋarpok: Sorlo mikseᴋârtomik Nalegak inôngmat, nujak attauserlonêt kattaktuksaungilak ernerpît niaᴋunganit nunamut.

¹² Arnarlo oᴋarpok: Kivgait nalekamnut attannermut sunamik oᴋarle. Tamna oᴋarpok: Oᴋarit.

¹³ Arnak oᴋarpok: Sôg taimaitomik issumaᴋalauᴋît Gudib innuᴋotingit akkerartorlugit, attannek taimaitomik oᴋalaungmat, idluitullingmat, ajoktortanelo utterᴋolungimago?

¹⁴ Uvagut toᴋᴋoleriakarapta, illingalutalo immektut nunamut kivilertotut, nokᴋartitaujungnangitotut; Gudiblo innôsek pêromangila issumaᴋsarsiorporle, ajoktortaumajok ajoktortaumiᴋonnago tapsomunga.

¹⁵ Taimak manna tikkisimavunga nalegara attannek oᴋarᴋattigijomavlugo; innugatsuit kappiasuktimanga. Kivgait issumaᴋalaurame: Attannek oᴋarᴋattigijomavara; imakkâ pinniarniarpok kivgangata oᴋauseᴋarninganik.

¹⁶ Kivgane arnak tussarniarmago, piuliklerᴋovlugo uvamnik, illunatik agganginit pêjaijomajut uvamnik, ernimniglo, Gudib kingormgutijanganit.

¹⁷ Kivgaillo issumaᴋalaukpok: Nalekama attanniub oᴋausingit manigoiniôjuksauvut uvamnut; nalegara attannek Gudib Engelingatut îmat, tussarungnarmat sunamik idluarmangat idluimangallonêt. Tamanna pivlugo, Nalekab Gudivit illaginiarpâtit.

¹⁸ Attannek kiovok, oᴋarlunelo arnamut: Missiarviginiarnanga apperᴋotiginiartamnik illingnik. Arnak oᴋarpok: Nalegara attannek oᴋarle.

¹⁹ Attannek oᴋarpok: Joabib aggangita illagingilâtit tamakkonane tamaine? Arnak kiovok oᴋarlunelo: Sorlo mikseᴋârtomik tarnît inôngmat nalegara attannek, taipsoma asseᴋangilak tallerpingmêlonêt saumingmêlonêt, nalekama attanniub oᴋautigimajanganit. Kivgavit Joabib perkolaungmanga tamattominga, taipsomalo taimaitomik tamât kivgait arnak illumertilaukpa;

²⁰ Illusek tamanna taimak sangutitaksarigapko, tamanna kivgavit Joabib âkiksorlaukpa. Nalegarale sillatôvok Gudib Engelingata sillatuningatut, mallugosuᴋovlugo pijoᴋartunik tamainik nuname.

²¹ Tagva attanniub Joabe oᴋautiva: Ahâk taimailiorlaukpunga; taimaimat ailerit manna, nukapiarlo Absalome uttertilaungmiuk.

²² Tagva Joabe pamakterpok nettermut kênane pûvlugo, opigosuklunelo, attannerlo ᴋujagiva, oᴋarlunelo: Uvlome kivgait tukkisilerpok, saimaneksimagama ijikpît sângangne angajoᴋara attannek; attannek pinniarmat kivgame oᴋauserijanganik.

²³ Taimak Joabe parngnailerpok, ailunelo Gesuremut, âlâlo Absalome Jerusalemut.

²⁴ Attannerle oᴋarpok: Itterile iglominut, kênaralo takkoniarnago. Taimak Absalome tikkilerivok iglominut, takkotaililugolo attanniub kênanga.

²⁵ Israeleme illunane anguteᴋalaungilak taimak ânanautigijomik Absalometut, taimaglo oᴋautaulaukpok illunainut; ittiggangita allugingnit kabsinga tikkilugo ᴋannoêtoᴋalaungimarikpok tapsomane.

²⁶ Niaᴋungatalo nujangit kippijaulaukpatta, (tamannalo Jarine tamât pivalaukpok, nujangille oᴋumailuarlaukput kippijaujariaᴋarmatta) tagva niaᴋungata nujangit Sekeletut 200 ditut oᴋumaitigijôvalaukput, attanniub Sekelingita oᴋumainingit malliklugit.

²⁷ Absalomemullo erniangolaukput ernit pingasut, pannerlo attausek, tamna atteᴋalaukpok Thamaremik, arnaulaukporlo taututsiariktok.

²⁸ Taimak Absalome Jarik magguk nâlugik Jerusalemetuarpok, takkolugane attanniub kênanganik.

²⁹ Absalomelo tilliklerpok Joabemut, tillijomavlugo attannermut, taimnalo ᴋaijomalaungilak tapsomunga. Tamnale tilliklipsarpok, sullelo ᴋaijomalaungilak.

³⁰ Tagva kivgaminut oᴋarpok: Ahâk, Joabib perorsêvikotinga perorsêviᴋotima senianêpok, perortoᴋarporlo Gerstenik; taimak aileritse ikkilugillo ikkomamut pititse. Tagva Absalomib kivgangita perorsêvik tamna ikkipât.

³¹ Tagva Joabe parngnailerpok tikkilunelo Absalomemut iglub illuanut, oᴋautivalo: Sôg kivgavît perorsêviᴋotiga ikkomamut ikkilaukatsuk?

³² Absalomelo Joabemut oᴋarpok: Ahâk tilliklerlaukpunga illingnut oᴋautsauᴋolaukpagillo: ᴋait tamaunga, tilliklerᴋovlunga illingnik attannermut, oᴋautsauᴋolugo, sôg Gesuremit utterlaukîk? Namanersaunajarpok, tagvanenajaruma sulle. Taimak manna attanniub kênanga takkolaulago: idluineᴋarpalle uvamne, tagva toᴋᴋunga.

³³ Joabelo itterpok attannermut, oᴋautivâlo tamattominga. Absalomelo ᴋaiᴋova, itterᴋovlugo attannermut; tamnalo kênaminik pûlune nettermut opigosukpok, attanniub sângane; attaniublo Absalome ᴋunnikpa.