II Samuel 13 - Labrador Inuttitut Heritage Bible

Amnonib ajortullininganik najaminut. Absalonib toᴋᴋotsiᴋojininganik tapsominga, ᴋemâninganiglo.

¹ Tamakkoalo kingorngane pijoᴋalaukpok Absalome Davidib erninga najaᴋarmat ânanamik, Thamaremik attelingmik; Amnoniblo Davidib erningata alligartulerpa.

² Amnonelo ᴋanimasertorpok, Thamar najane, pivlugo. Uigasolaungmat, Amnoniblo oᴋumainasugiva tamna sunamik pinniarvigilugo.

³ Amnonele illanarijaᴋalaukpok, Jonadabemik attelingmik, Simeab Davidib angajuata erninganik; Jonadabelo tamna anguteolaukpok sillatudlartok.

⁴ Tamna oᴋarpok tapsomunga: Sôg igvit attaniub erninga uvlub aipanganit aipanganut salludlarpalliavît? Tamattominga oᴋautijomangipinga? Tagva Amnonib oᴋautiva: Thamar, nukkama Absalonib najanga alligartorpara.

⁵ Jonadab oᴋautiva: Inariartorit sinnigvingnut ᴋanimasertorlutillo. Tagvalo atatait ᴋainiarpat takkojomavlutit, tagva oᴋautiuk: Nagliktara, najara Thamar ᴋailaule nakkoksititsiᴋovlugo uvamnik, nerᴋiksalliorᴋovlugo sâmne takkonârtillunga, uvangalo taipsoma agganginit nerriᴋovlunga.

⁶ Taimak Amnon innariarpok ᴋanimasertorlunelo. Attannerlo manna tikkilermat takkojomavlugo, Amnon attanermut oᴋarpok; Nagliktara, najara Thamar ᴋailaule, sâmne sannaᴋovlugo uvamnut nerᴋiksamik sâtomik attautsemik, maggungniglonêt, nerriᴋovlungalo taipsoma agganginit.

⁷ Tagva Davide tilliklerpok Thamaremut iglomut, oᴋautsauᴋolâlo: Ailerit annivît Amnonib iglunganut, nerᴋiksalliorlugolo.

⁸ Thamar aivok annime Amnonib iglunganut, tamnale nallavok sinnigvingmine. Tapsomalo sannaugak tiguva, akkulugolo immermut, sannalugolo; sâtuniglo sannavok ijikita sângangne, igalunelo sâtunik tapkoninga.

⁹ Tapsomalo (Thamarib) nerᴋiksak tamanna tiguva, nâvilugolo sânganut; nerrinermigle ᴋunnulaukpok. Amnonelo oᴋarpok: Illunatik annilerlit uvamnit. Illunatiglo annivut tapsomangat.

¹⁰ Tagva Amnonib Thamar oᴋautiva: Nerᴋiksak ᴋaileruk aiparusermut, nerriᴋovlunga aggangnit. Tagva Thamarib sâtut igalauktane tiguvait, âlugillo anniminut Amnonemut aiparutsiub illunanut.

¹¹ Amagolo tamanna tapsomunga, nerriᴋovlugo, tiguva, oᴋautilâlo: Kailaurit najâk, sinniᴋattigilungalo.

¹² Tapsomale oᴋautiva: Taimangungitok annîk, sangêtiniarnanga, taimailiortoᴋarpangimat Israeleme; sillainartomik taimaitomik pinniarnak.

¹³ Namut kangusungnera pivlugo aijuksauvîk? Igvillo sillaitutitut Israelemetutitut îniarpotit. Attannerle oᴋarᴋattigiuk, tapsoma ivlerᴋutiniangilâtit uvamnik.

¹⁴ Tapsomale nalegomalaungila, sâlagivâlo, sangêtipâlo innangaᴋattigilugolo.

¹⁵ Amnoniblo angijoksoarmik omigilerpa, taimak omisungnek manna anginersaulaungmat, naglingnermit sivurngane. Amnoniblo oᴋautiva: Parngnailerit annilutillo.

¹⁶ Tapsomale oᴋautiva: Idluitullinek tamanna, ajuktoramga anginersauvok assianit pinniarlauktarnit uvamnut. Nippingale tussarlaungila,

¹⁷ Nukapiaᴋotinele kivgarijane ᴋaiᴋova, oᴋarlunelo: Una annitiuk uvamnit, upkoarlo kingorngane parngnanaileruk.

¹⁸ Pattigosijarlaukporlo tarsepatâmik, taimaitunik attanniub panningit pattigosijarlauramik uigasôvlutik. Kivgangatalo annitilauᴋârtillugo, upkoarlo kingorngane pallangersimangmago;

¹⁹ Thamarib argsat egipait niaᴋominut, pattigotelo tarsepatâk attortane alliktorpa, agganelo illivait niaᴋominut, pissuklunelo ᴋêavok.

²⁰ Anningatalo Absalomib oᴋautiva: Annît Amnon illingnelauᴋa? Unêt najâk, nippangerit, annigivat, tamanna taimak omamiutariniarnago. Taimak Thamar uigasovlune Absalomib annigijame iglunganêtuarpok.

²¹ Attannerlo Davide tamattominga tamât tussarame, ningalerpok angijoksoarmik. Absalomible Amnon oᴋarᴋattigingila ajortomiglonét ajungitomiglonêt.

²² Absalomible Amnon omigiva, najanga Thamar sangêtilaungmago.

²³ Jarigle magguk nângmannik, Absalome sallijeᴋalaukpok saugaᴋotiminik Baalhazoreme Efraimib nunanganêtome; Absalomiblo attanniub ᴋittorngangit illunaita ᴋaiᴋovait,

²⁴ Tikkilerlunelo attannermut, oᴋarlunelo: Ahâk kivgait sallijeᴋarpok saukanik; attaniub kivgane illagilugit kivgane illagijomaliuk.

²⁵ Attanniub Absalome oᴋautiva: Aukak, ernîk, illunata ainiarata, pagvisarᴋonata illingnik. Innagalloarmagolo, aijomalaungilak sulle, saimartipale.

²⁶ Absalome oᴋarpok: Angajugale Amnon illaujuksaungilâk uvaptingnut? Attanniub oᴋautiva: Sôg taipsoma illagijaksarivâtit?

²⁷ Tagva Absalomib innapa, illauᴋojiᴋovlugo Amnonemik, attaniublo ᴋittornganginik illunainik.

²⁸ Absalomible nukapiaᴋotine perᴋovait, oᴋarlunelo: Kamatsiaritse, Amnon Weinemut ᴋuviasulerpat, uvangalo oᴋautigupse: Amnone annaulersiuk, toᴋᴋolugolo, sivuraᴋonnase, perᴋolaurapse; sivurajuileritse omaridlarluselo.

²⁹ Taimak Absalomib nukapiaᴋotingita Amnon pinniarvigivât, sorlo Absalomib perᴋolaungmagit. Tagva attanniub ᴋittorngangit nikkoviput, illunatiglo attunît ikkivut siuteᴋoᴋtôjoᴋotimingnut, ᴋemmâlutiglo.

³⁰ Apᴋomêtillugillo sulle, Davide tussaumanermut tikkitauvok, Absalomib attanniub ᴋittorngangit illunaita toᴋᴋolaungmagit, amiakoᴋalungimallo tapkonangat attautsemiglonêt.

³¹ Tagva attannek nikkovipok, annoranelo alliktorpa, pamakterlunelo nattermut; kivgangitalo avatingane nangertut illunatik annoratik alliktorpait.

³² Tagva Jonadabe, Simeab, Davidib angajungata erninga kiovok oᴋarlunelo: Angajoᴋara issumaniarane, nukapitset attaniub ᴋittorngangit illunatik toᴋᴋungangmatta; Amnonele kissime toᴋᴋungavok. Absalome issumanerlulaungmat uvlormit taipsomanemit najanga sangêtilaungmago.

³³ Taimaimat manna angajoᴋangma attaniub, tamanna omamiutariniarnago, attaniub ᴋittorngangit illunaita toᴋᴋonasugallugit; Amnonele kissime toᴋᴋovok.

³⁴ Absalomele ᴋemâvok. Nukapiarlo udsertorvingme ijiminut takkosarpok, takkolunelo; ahâglo innugatsuit aggerput nallakârdlutik apᴋosinerme ᴋaᴋᴋab sivinganingane.

³⁵ Tagva Jonadabe attannermut oᴋarpok: Ahâk attaniub ᴋittorngangit ᴋaivut; sorlo kivgait oᴋalaungmat, taimailingalaukpok.

³⁶ Oᴋarêrmallo, ahâk tagva attanniub ᴋittorngangit tikkilerput, niplialerlutiglo ᴋêalarmiglo. Attannek kivgangillo illunatik ᴋêavaksoadlalaurivuttauk.

³⁷ Absalomele ᴋemâvok, ailunelo Talmaimut Amihudib erninganut, attanniôjomut Gesureme. Tapsomale ernine oggurilaukpa uvlut tamaita.

³⁸ Taimak Absalome ᴋemmâvok, ailunelo Gesuremut, Jarillo pingasut nâlugit tagvanêtuarlaukpok.

³⁹ Attaniublo Davidib tarninga paingulerpok, aularomavlune Absalomemut; allijilaurame ernime Amnonib toᴋᴋunganik.