II Samuel 12 - Labrador Inuttitut Heritage Bible

Nathanib oᴋâlaninganik ᴋaᴋᴋialerᴋojijomik; Davidib ᴋaᴋᴋialerninganik; nallojungnaititauninganik Gudib issumangnarungnaininganik. Salomonib innulerninganik. Ammoniterit salagijauninganik.

¹ Nalekablo Nathan tilliva Davidemut. Tapsomalo tikkigamiuk, oᴋautiva: Iglugasaksuit illangane anguteᴋalaukpok maggungnik, aipa akluilaukpok, aipa akluvok.

² Akluitok saugaᴋutteᴋadlalaukpok, tuktuvaᴋutteᴋalarmelo.

³ Aklujorle sunaᴋalaungilak saugârsuᴋotituane pissiarilauktame assianik; nerritipalo angijororᴋovlugo tapsomane, ᴋittorngangillo illagilugit; nerrilaukpok tamuanganit, immerlunelo ermgusiârsuᴋotinganit, sinnilarmelo tapsoma sângane, panniktullo kamagiva.

⁴ Tikkitoᴋalaungmalle nerrimarᴋattaujomik angumut akluitomut, tagva saugaᴋotine tuktuvaᴋotinelo ivlerivait, tapkonangat nerrimarᴋattaujok nerᴋiksaliorlugo, aklujublo saugaᴋotinga tiguva âᴋiksorlâlo angumut tikkitiminut.

⁵ Tagva Davidib illungertulerlune angut taimna taimailiorlauktok ningaumajarvigidlarpa, oᴋarlunelo Nathanemut: Sorlo Nalegak mikseᴋârtomik inôngmat, angut taimna taimailiorlauktok toᴋᴋotaksauvok.

⁶ Tamannalo tappilugo saugak taimna sittamairtorlune akkileraksariva, tamattominga pinniarlaungmat ivlersilaungimallo.

⁷ Tagva Nathan Davidemut oᴋarpok: Igvit anguteôvotit taimna. Imâk Nalegak Israelib Gudinga oᴋarpok: Uvanga mingoarlutit attaningortilaukpagit Israelemut, piulilaukpagillo Saulib agganginit.

⁸ Tunnitsivigilaukpagillo angajoᴋavit iglunganik, tappilugolo nullianginik sângnut, Israelekullo Judakullo tunnilaukpakka illingnut, tamannalo suglunarpat tagva mattominga ipsomingalo illautitsijomavunga sulle tamattomunga.

⁹ Sôgle tagva Nalekab oᴋausingit nachogilaukpigit, idluitoâlungmik taimaitomik pinniaravit tapsoma ijikita sângangne? Uria Hetitere ullimarlaukpat saviksoarmut; nullianga tigulaukpat nulliarilugo, taimnale toᴋᴋolaukpat Ammonib ᴋittorngangita saviksoangagut.

¹⁰ Manna saviksoak nûlertuksaungilak iglokotingnit soraijuitomik; nachogilauramga, Uriablo Hetitereôjub nullianga tigulaurangne, nulliangôᴋovlugo illingnut.

¹¹ Imâk Nalegak oᴋarpok: Ahâk ᴋannoêtunik saᴋᴋertitsivigijomavagit igloᴋotingnit nangminerijarnit pijunik, nulliaᴋotitillo tigujomavakka ijikpît sângangne tunnijomalugillo innuᴋattingnut, nulliaᴋotitit siniᴋattigivlugit piᴋovlugo seᴋᴋerngub ᴋaumamaringningane.

¹² Igvit tamattominga sagvangitome pinnialauravit, uvangale tamattominga pinniaromavunga Israelitit illunamasiatik takkoane, seᴋᴋineᴋarninganelo.

¹³ Tagva Davide Nathanemut oᴋarpok: Idluitullilaukpunga Nalekamut. Nathanib Davide oᴋautiva: Tagva Nalekab ajornît pêjarsimagiva, toᴋᴋoniangilatit.

¹⁴ Nalekable omigijingit pijoᴋartomut omunga mittauteᴋartilaurangne, tamanna pivlugo ernek erniangomajok illingnut toᴋᴋolerniarpok.

¹⁵ Nathanelo angerarpok. Nalekablo nutarak Uriab nulliagilauktangata erniarilauktanga Davidemut annauva, ᴋannimadlarᴋovlugo toᴋᴋojungnarlune.

¹⁶ Davidiblo Gude tuksiarvigiva nukapiarârsuk pivlugo, nerritaililunelo itterporlo, pamangalunelo unnuak nâlugo netterme.

¹⁷ Tagva iglungata angajoᴋaunerôjungit makkiput makkititsomavlugo nattermit; pijomalaungilarle, nerriᴋattinginivaillo.

¹⁸ Uvlulle 7 ingane nutarak toᴋᴋolerpok. Davidiblo kivgangit sivuralaukput tamanna oᴋautigilugo Davidemut nutarak toᴋᴋungmat. Issumaᴋaramik: Ahâk nutarak innôtillugo sulle oᴋarᴋattigilaukpavut, tapsomalo nippivut nalilaungila; ᴋannok angiluartomik issumajalerniarpok okarupta: Nutarak toᴋᴋungavok.

¹⁹ Davidele takkogame kivgane issivsormatta mallugosuleramelo nutarak toᴋᴋungmat, kivgane oᴋautivait: Nutarak toᴋᴋungava? Tapkoa oᴋarput: Ahaila.

²⁰ Tagva Davide makkipok nattermit ermiklunelo, mingoarlarmelo, annorangniglo assianik attivok, ailunelo Nalekab iglunganut, opigosularmelo. Angerarame niaᴋojamik ᴋaitaujojilerpok nerrilunelo.

²¹ Tagva kivgangita oᴋautivât: Sunauva tamanna piniartat? Nutarak innôtillugo nerritaililaukpotit kêalutillo; mannale tokkungalermat makkipotit nerrilutillo?

²² Tamna oᴋarpok: Nutarak nerritailijutigilaukpara, ᴋêagilugolo innôtillugo; issumaᴋalaurama: Imakkâ Gudib saimarviginiangimangângma nutarak innôᴋojauᴋovlugo.

²³ Mannale toᴋᴋungangmat, suna pivlugo nerritailijuksauvîk? Uttertitsungnaralloarpigô? Aivigijomâralloarpara, tamnale utterniatsangilak ama uvamnut.

²⁴ Davidiblo nulliane Bathseba manigorlauᴋârdlugo ittervigiva sinniᴋattigilugolo. Ernermiglo ernivok tapsomunga, tamna atserarpa Salomomik. Nalekablo nagligiva.

²⁵ Pitipâlo Nathanib nallautaijub agganginut. Tapsoma atserarpa Jedidjamik Nalegak pivlugo.

²⁶ Taimak manna Joabib Rabba Ammonib ᴋittorngangita iglugasaksoaᴋotingit sorsugvigivait, aksarnigarivaillo attaniub iglugasaksoaᴋotingit,

²⁷ Tilliklerlunelo kivgartortunik Davidemut, oᴋautsauᴋovâlo: Rabbamiut sorsugvigilaukpakka, sâlagilaurivakkalotauk iglugasaksuit immiksoaggit.

²⁸ Tagva igvit manna innugatsuit assingit kattitikit, Iglugasaksuillo illumakit, salagilugillo, uvanga salaᴋarᴋonanga tapkoninga, atteralo tamanna pivlugo taijauᴋonago.

²⁹ Taimak Davidib innugatsuit illunaita kattitilugit tiguvait, aularlunelo tagvunga, Rabbamiullo sorsugvigivait, sâlagilaitalo.

³⁰ Taipkoalo attaningata niaᴋotinga, Talentetut oᴋumaitigijotut Goldeᴋalauktok, ujaraliglo pivianartunik tiguva tapsoma niaᴋoanit, illijaulunelo Davidib niaᴋunganut; aksarnigaujullo unnuktovaksuit naksarpait iglugasaksoarnint.

³¹ Innugatsuille taᴋᴋamanetut annitipait, illilaitalo kiblut kikkiengôjut, kapputillo, kuksautello kikkiengôjut attânut, ikkilaitalo kieksautine igaliksalliorvingne. Taimailiorvigivait Ammonib ᴋittorngangita iglugasaksoangit illunaita. Tagva Davide innugatoksuillo illunatik uttilerput Jerusalemut.