II Samuel 11 - Labrador Inuttitut Heritage Bible

Davidib asseroininganik nulliarêngnermik, toᴋᴋotsininganiglo.

¹ Jarelo annigormat, nalliutome attannît aularvigivaktangane, Davidib Joabe kivganelo illagellugit, Israelitillo illuêngarlutik tillivait, asseroiᴋovlugit Ammonib ᴋittornganginik, Rabbalo illuvait. Davidele Jerusalemetuarpok.

² Pijoᴋalaukporlo Davide unnub nalliuningane makkilerame innangavingminit, pissuklunelo attanniub iglungata ᴋângane, ᴋânganillo takkova arnak ubvartok ingminik, arnarlo tamna taututsiarilaukpok.

³ Davidelo tilliklerpok tagvunga, arnarlo taimna apperᴋutigijauᴋova, oᴋarᴋojilunelo: Bathsebaungilâk taimna, Eliamib pannia; Uriab Hetiteriôjub nullianga?

⁴ Davidelo kivgartortunik tilliklerpok tagvunga, aijauᴋolâlo. Tapsomalo ittervigingmatsuk, sinniᴋattigiva. Tamnalo arnak sujungaitipok ingminik sujungnerminit, utterlunelo iglominut.

⁵ Arnarlo singailerpok, tilliklerlunelo, Davidelo nallojungnaititauᴋova oᴋautsauᴋolâlo: Singaititaumavunga.

⁶ Davidele tilliklerpok Joabemut: Tilliklerviginga Uriamik Hetitereôjomik. Joabiblo Uria tilliva Davidemut.

⁷ Uriablo tikkingmatsuk, Davide appertsorpok Joabe innugatoksuillo sorsungnerlo pivlugit, illingatsiaralloarmangât?

⁸ Davidiblo Uria oᴋautiva: Attersarit igloᴋotingnut, ubvarlutillo ittiggangnik. Urialo anningmat attanniub iglunganit, attanniub pilliutinga mallikpok tapsominga.

⁹ Urialo innariarpok attanniub iglungata upkuangata sângane, angajoᴋame kivgangita illunatik innangavinganut, attersartaililunelo iglominut.

¹⁰ Davidele oᴋautijaulerame: Uria attersarlungilak iglominut; Davidib oᴋautiva: Nunab assianit tikkisimangilatit? Sôg attersarlaungilatit iglokotingnut?

¹¹ Uriale Davidemut oᴋarpok: Iklervik, Israelitillo Judamiullo tuppernetualerput, angajoᴋaralo Joabe, angajoᴋamalo kivgangit unnatadlarnermeput; uvangalo iglumnut aijuksaunajarᴋik, nerriᴋovlunga, immerᴋovlungalo, nulliaralo innangaᴋattigilugo? Sorlo mikseᴋârtomik innôgavit, tarnîllo inôngmat, taimailiorlungilanga.

¹² Davidib Uria oᴋautiva: Taimak uvlometauk ovanetuarit, kaupat aularᴋojomavagit. Taimak Uria uvlorme taipsomane, aipanganelo Jerusalemetuarpok.

¹³ Davidiblo ᴋaiᴋova, sângane nerriᴋovlugo immerᴋovlugolo; tallatipalo. Unnungmallo annivok, innariarlune sinnigomamut innangavingminut, angajoᴋame kivgangit illagilugit; attersarlungilarlo iglominut.

¹⁴ Uvlarme Davide aglangnik aglakpok Joabemut, tillikliutilaitalo Uriakut.

¹⁵ Aglakporle aglangne tapkonane imâk: Uria pitisiuk sorsungnerub sugaluluarvianut, tunnulugolo allarsiuk, ullimartauᴋovlugo, toᴋᴋoᴋovlugolo.

¹⁶ Joabiblo manna iglugasaksuit illumangmagit, Uria inneᴋartipa ᴋaujimajaminut anguteᴋarmat tagvane sorsugungnartunik.

¹⁷ Iglugasaksuillo angutingit annidlarmatta Joabelo sorsugvigingmatsuk, innugatsuit Davidib kivgangita illangit ochovut, Urialo Hetitere toᴋᴋogivok.

¹⁸ Tagva Joabe tilliklerpok, Davidelo oᴋautauᴋova tamainik, sorsungnerub illuserilauktanginik.

¹⁹ Tillijarlo perᴋova, oᴋarlunelo: Sorsungnerub illuserijanga tamât oᴋautigijarêrungne attanermut,

²⁰ Takkoguvillo attannek ningarosulermat, oᴋautikpattillo: Sôg sorsungnerme taimak iglugasaksuit ᴋanileriartorlaukpissigik? ᴋaujimangilase ᴋannok pittiksertoᴋarpangmat avalut ᴋânganit?

²¹ Kia Abimeleche Jerubesetib erninga annaulauᴋauk? Arnab saᴋalitsiviub ujaraktangata illakunga egilaungiᴋauk avalut ᴋânganit tapsomunga, toᴋᴋolugo Tebezeme? Sôg avalut taimak ᴋaninariartorlaukpissigik? Tagva oᴋartuksauvotit: Kivgait Uria Hetitereôjok toᴋᴋungagivok.

²² Tillijarlo aivok tikkilunelo, oᴋarlunelo Davidemut tamainik, tillijaujutigijaminik Joabemut.

²³ Tillijarlo Davidemut oᴋarpok: Angutit ajugarilaukpavut, annidlarlutiglo uvaptingnut naternamut, uvagulle tapkoa tunganelaukpogut ittertarviksub upkoangata sânga tikkilugo.

²⁴ Pittiksertullo pittiktarlaukput kivgarnut avalut ᴋânganit, toᴋᴋolaitalo illangit, attaniub kivganginit; tapkoalo illagellugit kivgait Uria Hetitereôjok toᴋᴋogivok.

²⁵ Davide tillijamut oᴋarpok: Imâk Joabemut oᴋartuksauvotit: Tamanna ᴋuvianaijutiginiarnago pît, saviksoak nungutsingmat manna ominga, manna ipsominga. Katsungaileritse sorsungnerme iglugasaksoarnik, serᴋomitsiᴋovlutit tapkoninga; mannigorillo.

²⁶ Uriablo nullianga tussarame uine Uria toᴋᴋungmat, uine ogguriva.

²⁷ Ogguarêrmalle, Davide tilliklerpok aijauᴋolâlo iglominut, nulliangolerporlo tapsomunga, ernilunelo tapsomunga ernermik. Nalekable pinniarnek tamanna Davidib pinniartanga idluigiva.