II Samuel 10 - Labrador Inuttitut Heritage Bible

Ammoniterit idluitullininganik Davidib tillijanginut, salagijauninginiglo.

¹ Mattomalo kingorngane pijoᴋalaukpok Ammonib ᴋittorngangita attanningat toᴋᴋolermat, erningalo Hanon attaningorpok taipsoma innigilauktangane.

² Tagva Davide oᴋarpok: Napkiningnermik pinniaromavunga Hanonemut Nahasib erninganut, sorlo taipsoma atâtangata napkiningnermik pinniarvigilaungmanga. Tilliklerporlo tagvunga, mannigortauᴋolâlo kivgaminut atâtanga pivlugo. Davidib kivgangit manna tikkimatta Ammonib ᴋittorngangita nunanganut,

³ Tagva Ammonib ᴋittorngangita angajoᴋaunerôjungit oᴋarput Hanonemut, angajoᴋamingnut: Issumavit Davidib atâtait opigingmago ijikpît sângangne, manigoijunik tilliklervigilaungmattit? Issumalungilatit tamanna pivlugo kivgane tillilauramigit illingnut, iglugasaksuit nautsertoromagamigit, tukkisinasuarlugillo, serkomilugillo?

⁴ Tagva Hanonib Davidib kivgangit tiguvait, umingillo kippivait ᴋoppilugit, annorângillo kipjaumiktorpait ketterarlugit tapserut tikkilugo, aularᴋolaitalo.

⁵ Davide tamattominga oᴋautsaumagame, tilliklerpok pachreartauᴋovlugit; angutit taipkoa angijomik kangusuktitaulaungmatta. Attaniublo oᴋautsauᴋovait: Jerichometuaritse, umise perorsearilugit, kingorngane uttileritse.

⁶ Ammonible ᴋittorngangit takkogamik tippilungorsimagamik Davidib sângane, tilliklerput ᴋaiᴋojilutiglo Siriamiunik, Rehobib iglomioᴋotinginik, Siriamiuniglo Zobamiunik, angutinik pissuktunik 20,000 dinik, attannermillo Maachamit angutinik 1,000 dinik, Istobemillo 12,000 dinik.

⁷ Davidib tamanna tussaramiuk, Joabe tilliva sorsuktuksaksoaᴋattigêt illunamasiatik illagilugit.

⁸ Ammoniblo ᴋittorngangit aularput, parngnailerlutiglo sorsungnermut ittertarviksub upkoangata sillatâne. Siriamiulle Zobamit, Rehobemillo, Istobemillo, Maachamillo, kissimik naternamelaukput.

⁹ Joabelo manna takkogame sorsungnek tapsomunga torarmat sivurânit kingornganillo; Israelitit angutinginit innuosuktunit illunainit annerosukpok, parngnailunelo Siriamiut akkerartoromavlugit.

¹⁰ Innugatsuillo assingit pitipait angajume Abisaib agganginut, parngnailerᴋovlugo Ammonib ᴋittorngangit akkerartorlugit.

¹¹ Oᴋarlunelo: Siriamiut ajugauniarpatta uvamnut, tagva ikajoriartorlaunga; Ammonible ᴋittorngangit ajugauniarpatta illingnut, tagva uvanga ikajoriartoromavagit.

¹² Mannigorit, pitsartulertalo innuᴋotivut Gudiptalo iglugasaksoangit pitjutigallugit; Nalegarle pinniarle namagijaminik.

¹³ Joabiblo innuᴋotine illagijine illagilugit Siriamiut kaglilerpait sorsugvigilugit; taipkoalo ᴋemâvât.

¹⁴ Ammoniblo ᴋittorngangit takkogamik Siriamiut ᴋemângmatta, nangminektauk Abisai ᴋemâvât, itterlutiglo iglugaseksoarnut. Taimak Joabe uttilerpok Ammonib ᴋittornganginit, tikkilunelo Jerusalemut.

¹⁵ Siriamiullo takkogamik salagijaugamik Israelitinut, kattilerput attautsemut,

¹⁶ Hadad-Eserelo tilliklerpok aijautipaillo Siriamiut kôksub akkianêtut, tikkipullo Helamemut, Sobachiblo Hadad-Eserib sorsuktuksaksoaotingita angajoᴋangata sivorlervigivait.

¹⁷ Davide tamattominga oᴋautijaumagame Israelitit illuêngarlutik kattitipait, ingergalunelo Jordan ikârlugo, tikkilunelo Helamemut. Siriamiullo parngnailerput Davide akkerartorlugo sorsugvigijomavlugo.

¹⁸ Siriamiulle Israelitit ᴋemâvait; Davidiblo Siriamiunit aksalloaggit 700 dit innungit, horsillo ᴋângine ablangajut 18,000 dit toᴋᴋopait; tapkoa illaliudlugit Sobache sorsuksoaᴋattigêt angajoᴋangat ullimarpa toᴋᴋoᴋovlugo tagvane.

¹⁹ Attannille Hadad-Eserib naliktingit takkogamik salagijaunermingnik Israelitinut, ulapirsautiksaliorput Israelitinut, naliklutiglo tapkoninga. Siriamiulle sivuravut Ammonib ᴋittorngangit ikajornersarilugit.