II Samuel 1 - Labrador Inuttitut Heritage Bible

Davidib pitlarningninganik saglovlune oᴋartomik toᴋᴋotsigame Saulemik. Tapsomalo imgerutinginik ogguarsiutinik Saul Jonathanelo pivlugik.

¹ Saulib toᴋᴋungata kingorngane, Davide unatadlarnermit Amalekiterinik utterlaungmat, maggungniglo uvlilauᴋârtillugo Ziklageme;

² Ahâk, tagva uvluk pingajuangne angut Saulib sorsuᴋattigêksoaᴋotinginit tikkilerpok, annoraᴋarlune alliksimajunik, ivjoᴋalunelo niaᴋomine. Davidemullo tikkiname pamakterpok nunamut, opigosuklunelo.

³ Davidible oᴋautiva: Nakit pivît? Tapsoma oᴋarvigiva: Israelib sorsuᴋattigêksoaᴋotinginit ᴋemâlaukpunga.

⁴ Davidib oᴋautiva: Oᴋarviginga, ᴋannok illingava? Tamna oᴋarpok: Innugatsuit ᴋemâlaukput sorsungnermit, innuillo unnuktut ochosimavut; tappilugillo Saulelo erningalo Jonathan toᴋᴋovûktauk.

⁵ Davidib innuosuktok oᴋautjine tamattominga oᴋautiva: Nakit ᴋaujimavît, Saulelo erningalo Jonathan toᴋᴋungmannik?

⁶ Innuosuktok oᴋautjinga tamattominga oᴋarpok: Maungatuinak tikkilaukpunga Gilboab ᴋakᴋanginut; ahâglo, Saule egangavok ᴋallugiaᴋotiminut, ᴋemuksillo, horsillo ᴋângine ablangajut udlavât.

⁷ Keviarlaukporlo, takkolungalo, ᴋaikolarmalo. Uvangalo oᴋarpunga: Mânepunga.

⁸ Tapsomalo oᴋautivânga: Kinauvît? Oᴋautivara: Amalekitereôvunga.

⁹ Tamnalo oᴋarpok uvamnut: Nangeriartorit uvamnut, toᴋᴋolungalo, illunane kappiasuktitaugama, innôseralo illumnêmarikpok sulle.

¹⁰ Tagva aivigilaukpara, toᴋᴋolugolo, ᴋaujimamarilaurama innojungnangininganik ocholaungningata kingorngane; niaᴋutelo tigulaukpara niaᴋoanit, tallermiutarlo tallinganit, ᴋaimavâkalo tamaunga illingnut nalekamnut.

¹¹ Tagva Davidib annorâne tiguvait, alliklaitalo, angutillo tapsomanêlauktut illunatik taimailiorput.

¹² Ogguarlutiglo ᴋêalarmiglo, nerritailivullo unnuk tikkilugo, Saule, erningalo Jonathan pivlugik, Nalekablo innuᴋotingit pivlugit, Israeliblo iglomioᴋotingit pivlugit, saviksoarmut ochotitaulaungmatta.

¹³ Davidiblo innuosuktok oᴋautjine tamattominga oᴋautiva: Nakit pivît? Tamna oᴋarpok: Takkorngârtab, Amalekitereôjub ernerivânga.

¹⁴ Davide oᴋarpok tapsomunga: Suvît sivuralaunginavit, aggaktit illilugit Nalekab saimartitanganut, asserorlugo!

¹⁵ Davidiblo innuosuktoᴋotime illangat oᴋautiva: Maungalerit ullimârlugolo. Tapsomalo ullimârpa, toᴋᴋoᴋovlugo.

¹⁶ Tagva Davidib oᴋautiva: Aut niaᴋungnut illingale; ᴋannît nangminît pivlutit oᴋalalaungmat, oᴋarmallo: Nalekab saimartitanga toᴋᴋolaukpara.

¹⁷ Davidiblo ogguarsiutit tamakkoa oᴋâlatigilaukpait, Saule erningalo Jonathane pivlugik.

¹⁸ Perᴋojivorlo Judab ᴋittorngangit ajochertortauᴋovlugit pittiktarnermik. Ahâk, aglaksimavut nallagortut aglaᴋotingine:

¹⁹ Angajoᴋaunerôjut Israeleme pôktojoᴋotingne ullimartaumavut. ᴋannok songojoksuit ochosimavut!

²⁰ Oᴋarniarase tamattominga Gatheme, unipᴋautiginiarassiuglo apᴋosinerme Askalonib iglungita akkorngane, Filisterit panningit ᴋuviasulerᴋonnagit, kippisimangitut panningit serridlarᴋonnagit.

²¹ Kakᴋaujose Gilboame, mitsuksoaᴋarniarane, sillaluᴋarniaranelo illipsingnut, perorsêviᴋarniaranelo illipsingne, ᴋaitsijunik tunnergutiksanik pilliusijanik; sôngojut sappulutangit tagvane pêjartaulaungmatta, Saulib sappulutanga, sorlo mingoarsimanajangipat orksomut.

²² Jonathanib pittiksinga uniorsilaungimarikpok, Sauliblo saviksoanga uttilaungimarikpok auᴋejartaunane ullimarsimajut aunganut, orksoᴋijaunanelo sôngojoksuit orksunginut.

²³ Saule Jonathanelo erdlingnarlutik innerᴋonarlutiglo innôsigingne, toᴋᴋomingnetauk aviutingilâk; oᴋinersauvuk nektoralingmit, sanginersaulutiglo Loewemit.

²⁴ Illipse Israelib panningit Saule ᴋêagisiuk, annoraᴋartitsilauktok illipsingnik aupaloriktunik pinnarnartunik, ânanausêlauktorlo illipsingnik annorapsingne pinnarnarsautinut Goldelingnut.

²⁵ ᴋannok sôngojoksuit taimak ochomavut sorsungnerme! Jonathan pôktojoᴋotingne ullimartaumavok.

²⁶ Kiksautigivagit ᴋattangutîk Jonathan; angijomik ᴋuviasutigilaukpagit alliagilutillo; naglingningnît ᴋuviaginersarilaukpara arnab naglingninganit.

²⁷ ᴋannok sôngojoksuit ochomavut, sorsugungnartullo toᴋᴋotaumavut!