II Pêtrusib 3 - Labrador Inuttitut Heritage Bible

Uvlut kingorlît neliutiniarninganik.

¹ Tamadja aglangma aipangit ilipsingnut, naglingnartose; tamakkonunga tupaktiluselo erᴋaitipara issumase nelâgôrtoᴋ;

² Erkailerᴋovluse oᴋautsinik mattoma sivorngagut nelautaijunut ivjornaitunut oᴋautigijaujunik ilipsingnut; perᴋojaptingniglo, uvagut Nâlekab Piulijipta Aposteligijâtigut.

³ Tamannalo ᴋaujilerᴋârsiuk, uvlut kingorlingine mitauteᴋartoᴋaromârmat, ikligunermingnut inôniartunik,

⁴ Oᴋarlutiglo: Tikiviksangata angerutaumajûb neliuninga naûk? Sivorlît sinisimangmatta, taimangat ilûnatik taimailingatsainarput, sorlo pingortitaumajut pigiarninganit-ilaungmatta.

⁵ Kaujimangilalle, ᴋaujijomanginamik, ᴋilak itsaᴋ Gûdib oᴋausinganut pingmat, nunalo imânit, imânêdlunelo;

⁶ Taimaigalloartilugo silaᴋsoaᴋ taipsomanêtoᴋ ullitornivaksoarmut nungutauvoᴋ imâne.

⁷ Kilagle nunalo mattomanêtûk oᴋausinganuttauᴋ tamattomunga pigumitângulerpûk, pijuksaujomârlutik ikomamut uvluksame erᴋartuivingme, inuillo Gûdemik nâlegomangitut pidlartauviksangane.

⁸ Atauserle nelojaksaringilase naglingnartose, uvloᴋ atauseᴋ Nâlekab sângane jârititut tausendititut-ingmat, jârillo tausendit uvloktut atautsetut.

⁹ Nâlekab angersimanine mulutingilâ, illangita mulutitaunasugigalloarmatsuk; ᴋenuersârvigitigulle, assioniartoᴋarᴋojinginame, ilûnaitale sâgiarᴋovlugit.

¹⁰ Nâlekable uvluksanga neliutsomârpoᴋ sorlo tigliktotut unnuaᴋsiortotut; taipsomane ᴋilait nungujomârput serᴋorpaludlarlutik, pingortitalle ônartovaksoarmut aumajomârput, nunalo perᴋutingillo ikoâlanermut nungutaujomârput.

¹¹ Ilûnatik makkoa nungujomârmatta, angidlartomik ilâ pijariaᴋarpose inônermik ivjornaitomik, Gûde nâleklugo iliornipsingnut;

¹² Nerriukluselo erinesukluselo Nâlekab uvlungata nelliuviksanganut; taipsomane ᴋilait ikomamut nungujomârmatta, pingortitallo ônartovaksoarmut aumadlarlutik.

¹³ Oᴋausingale pitjutigivlugo nerriukpogut ᴋilangmik nutâmik, nunamiglo nutâmik, idluarnerub iniksanganik.

¹⁴ Tamanna pivlugo nagliktakka, tamakkoa nerriugigapsigik, ataruilititse ivsornartoᴋarᴋonase, pidlaraksauᴋonaselo, tâpsoma sângane ullapirsarsimavluse naipitauᴋovluse.

¹⁵ Nâlegaptalo ᴋenuersârninga piulijaujutigisiuk; sôrlotauᴋ nagliktoᴋ ᴋatangutivut Pauluse aglalaungmat ilipsingnut, illisimaneᴋ tunergusiane maliklugo.

¹⁶ Taimâktauᴋ (pigivoᴋ) aglangmine tamaine oᴋautigivlugit tamakkoa; illangille tukkeᴋartilugit oᴋumaiput; illisimangitut tunganilimangitullo mumiktitsivut tamakkoninga, sôrlotauᴋ aglangnik tâpkoa assinginik, ingmingnik asserorlutik.

¹⁷ Ilipsele nagliktakka, tamanna sivorngagut ᴋaujimagapsiuk, udjertoritse ilipsingnik, inuit uivêtut tamartitsininginut uivêrijauᴋonase, nangmineᴋ tungavigigijapsingnit katangniardluse.

¹⁸ Nâlegaptale Piulijiptalo Jêsusib Kristûsib saimarsautâne illitarsinermelo tâpsominga aglivalliatitse. Tâmna nertortaule tamattomane issoᴋangitomullo. Amen.