II Pêtrusib 2 - Labrador Inuttitut Heritage Bible

Ajoᴋertuijut nelangaitut sivorngagut oᴋautauninginik.

¹ Nelangaitunigle nelautaijoᴋalaurivoᴋtauᴋ inuit akorngane, sorlotauᴋ ajoᴋertuijut nelangaitut akunapsingnêtsomârmatta. Taipkoa seniagut ajoᴋertûtsinik pititsijomârput asserornartunik, Nâlegarlo misiarutigijomârpât pisiarijigilauktatik; ingmingnut pititsivlutik asserudlautiksamik tagvainârtomik.

² Unuktoᴋsuillo maligomârput ajoᴋertûsinginik asserornartunik. Taipkonunga mikseᴋârnerub apᴋutâ mitautigijaujomârpoᴋ.

³ Pijomatudlarnermullo ilipsingnit perᴋutiniarasuaromârput, oᴋautsinut mikseliungitunut piniarlutik. Taipkoa pidlartautiksangit oᴋautauᴋammerungnairtut noᴋᴋarniangilat, erᴋartortautiksangillo sininginivut.

⁴ Engelit idluitulilauᴋtut Gûdib pidlartaulilaunginamigit, tâᴋtoᴋsûble ᴋelaumgujanginêdlutik Sâtanaseᴋarvingmut ajaktordlugit pitilauramigit, ᴋimergutauᴋovlugit erᴋartuiviksamut;

⁵ Silaᴋsoatoᴋaujorlo pidlartaililaunginamiuk, Noale idluarnermik oᴋâlajoᴋ, illangillo sittamaujortôvlutik piulilauramigit, ullitornivaksoaᴋ pitidlugo silaᴋsoarmiunut Gûdeᴋaromangitunut;

⁶ Iglugasaksuillo Sodoma Gomorralo argjainautilerdlugit pidlalauramigit asserorlugit, erᴋaraksangortidlugit idluitulijunut, kingorngane pijomârtunut;

⁷ Lotelo idluartoᴋ piulivlugo, kappiasuktitaujoᴋ angijomik inuluâluksuit illôᴋeudlartut piniarninginut;

⁸ (Idluartoᴋ tâmna, taipkoa akornganêname, uvlut tamaita tarnimigut idluartokut kappiasuktitaulauᴋpoᴋ idluitulininginut takojaminut tussartaminullo):

⁹ Tagva Nâlekab Gûdemik nâlektut piulidlarungnarpait ôktortaunermit, idluitulle ᴋumergusiudlugit erᴋartuiviksamut, pidlartauᴋovlugit;

¹⁰ Sugaluluartomik uvinik maliklugo inôjut, ivsornartunik ikliguktut, nâlekaniglo nachojut, inungmik silasiujuitut, ingmingnik piojoridlartut, sajugatiglo atanionerit mitautigilugit;

¹¹ Engelit pitsartunersauvlutiglo sôngonersaujut mitautigijaunadlartoᴋ patsitiksaᴋ taipkoa pivlugit oᴋautigitsangigalloarmatsuk Nâlekamut.

¹² Taipkoale sorlo nergjutitut silatuneᴋangangitutitut-iput, ingergarmik erniangojutitut tigujaksauvlutik toᴋotaksatuinauvlutik; mitauteᴋaramik ᴋaujimangitamingnik, asserornatulinermingnelo nungutautaujomârput.

¹³ Idluitulinermingnut akkivioniksatik neksarpait. Issumamikut alliadlarput uvlut tamaita uviniub ᴋuviagijanganut inônermik, kangunartoᴋsôvut maᴋojungnadlalarmiglo, ᴋuviasuktoᴋsôvut uivêriklernermingne, nerreᴋatigijarangamise;

¹⁴ Ijeᴋarput angijomik illoᴋeudlartunik, ajortulinermik soraijunatik, kajumiksarpait ᴋuksalaitut tarningit, ômateᴋarlutik pijomatudlarnermik ilumersimajunik, inuit ôminadlartut.

¹⁵ Apkut idluartoᴋ ᴋemakamitsuk, tammarnartomut pivut, Balaamib Bosorib erningata apᴋutigilauktanga atorlugo; tâpsoma nâmangitulinerûb akkilertauninga tussugidlarpâ.

¹⁶ Idluituliningale pivlugo pidlartauvoᴋ, nergjutib kipalûb oᴋajuitûb oᴋalerdlune nelautaijûb silaininga inertermago.

¹⁷ Taipkoa puilavît imeᴋangitut, nuvujat ullajûjâmut aulataujut, taipkonunga kappianartomik tâᴋtoᴋsoarmik ᴋumergutaumajoᴋarpoᴋ issoᴋangitomut.

¹⁸ Piblingaidlartunik oᴋauseᴋaramik piungitoᴋsoarnik, uviniub ikliguningagut ivsornartulinermut kajumiksarpait imaitut, ᴋemâmakasâlertut tamarnartomut inôjunit;

¹⁹ Kivgaujungnainermik angervigivait; nangminerle Asserornartûb kipalogivait. Sâlagijaujoᴋ kivgaulermat sâlagijiminut.

²⁰ Maᴋojungnartunit silaᴋsoarmêtunit ᴋemâmajut, illitarsinermut Nâlekamik Piulijiptingnik Jêsuse Kristûsemik, taimaitut ama napertitaugunik sâlagijauvlutik tamakkonunga, kingorngane tagva taipkoa ilinganingit ajulualerput sivorlermit.

²¹ Nâmanersaunajarmat taipkonunga, apᴋosineᴋ idluartomut ᴋaujilaungikunitsuk, tununermit perᴋojanik ivsornaitunik, taipkonunga pititaumajunik.

²² Taipkonane nelautsimavoᴋ oᴋausiovaktoᴋ imna okpernartoᴋ; Kingmeᴋ merialauᴋtaminik nerrigivoᴋ; kuingêngerlo salumarsarsimajoᴋ salumaitomut aksapalloagivoᴋ.