II Pêtrusib 1 - Labrador Inuttitut Heritage Bible

Okpertotut nelâgôrtotut arvertarᴋojaunermik. Apôstelib aviniartûb kaiblainingata tungavinganik aulajuitomik.

¹ Simon Pêtruse, Jêsusib Kristûsib kivganga Apôstelingalo. okpernermik pivianartomik uvaptitut pimaᴋatiptingnut idluarnerme, Gûdipta piulijiptalo Jêsusib Kristûsib pititsininganut.

² Gûdib tunitsivigilise saimanartoᴋsoarmik ullapᴋosernartoᴋsoarmiglo, illitarsinermut Gûdemik, Jêsuse Kristûsemiglo Nâlegaptingnik.

³ Tâpsoma Gûdib pitsartuningata tunitsivigingmâtigut tamainik inôtsiarnermut arvertarnermullo Gûdib idluarijanganut ilingajunik, illitarsinermut tâpsominga uvaptingnik ᴋairᴋojijomik ânanaunerminut ajunginerminullo;

⁴ Tamattomûna angnerpângojunik pivianartoᴋsoarniglo angerviovogut, imâk, tamakkonunga illangiutititaulerᴋovluse Gûdioninganik, silaᴋsoarmêtut ikliguningit asserornartut ᴋemakupsigik.

⁵ Tagva ajungitapsingnut ataruilileritse, okpernipsingnullo saᴋᴋijârtitsileritse ajungitulinermik, ajungitulinermullo illisimanermik;

⁶ Illisimanermullo nâmatuinartulinermik, nâmatuinartulinermullo ᴋenuersârnermik, ᴋenuersârnermullo nâlengnermik Gûdemik;

⁷ Nâlengnermullo Gûdemik naglingnermik ᴋatangutinik, naglingnermullo ᴋatangutinik nagligosungnermik ilûnainik.

⁸ Tamakkoa ilipsingnêkunik pigannêrdlutik, erᴋeasuktiniangilâse sulingitiniaraselônêt illitarsinerme Nâlegaptingnik Jêsuse Kristûsemik,

⁹ Tamakkoningale peᴋangitoᴋ, tâmna tautungilaᴋ, aggangminut tapsikârtoᴋ (takotsiarneᴋ ajorlugo), ajornerilauᴋtamelo pêjartaumaningit puigorpait.

¹⁰ Tamanna pivlugo, ᴋatangutikka, ataruililuaritse, ᴋairᴋojaumanise anerimaniselo aulajuitilugit. Taimailiorupse, sumullônêt aporniangilase.

¹¹ Taimâglo angijomik tunitsiviojomârpose iterviksamik Nâlegapta Piulijiptalo Jêsusib Kristûsib nâlegauvinganut issoᴋangitomut.

¹² Taimaimat katsunganiangilanga tamakkoninga kaiblatsainarluse, tamakkoa ᴋaujimagalloarapsigik, tunganilimavluselo mikseᴋârnermik mâna saᴋᴋijârtomik.

¹³ Idluarivikparale tupaktênarluse erᴋaititsinermut, iglome (timeme) tamattomanêtilunga.

¹⁴ Kaujimagama, igluga (timiga) atorungnairaksarigapko mânakassâkut; taimâk Nâlegapta Jêsusib Kristûsib nelojungnaitilaungmânga.

¹⁵ Pinasuaromavungale tamattominga erᴋaumajaksaᴋatsainarᴋovluse kingunimne.

¹⁶ Uvagut oᴋarvigilaurapse Nâlegapta Jêsusib Kristûsib tikitsomârninganik pitsartuniliksoarmik, silatulungnerit oᴋâlagadlarnerit tukkeᴋangitut malilaungilavut; uvagulle nangmineᴋ ânanauninga takolauᴋpavut.

¹⁷ Gûdemit Atâtamit pititaungmat nâlengnartomiglo nertornartomiglo, nippemut, tâpsomunga pijomut, ânanaunermit angijomit imâk: Tagga ernera erdligijara, tâmna ᴋuviagijara.

¹⁸ Nippelo tamanna ᴋilangmit pijoᴋ tussarpavut, ᴋaᴋᴋame ivjornaitome illagigaptigo.

¹⁹ Nelautaijûb oᴋausinganik tunganartomik peᴋarpogut; tamanna nâlekkapsiuk idluartomik pivose, sorlo nenneroaᴋ ᴋaumarsaijoᴋ tâᴋtome, ᴋaulertsiarilugo, uvloriarlo ᴋausiut nuilertsiarivlugo ômatipsingne.

²⁰ Tamannalo ᴋaujijaksariᴋârpase, nelautaijut oᴋausingit aglangnêtut inûb issumanganit nangminerijanganit pitsangimatta.

²¹ Inûb issumanganut nelautainermik pijoᴋalauᴋsimatsangimat; ivsornaitulle taipkoa Gûdib inuᴋotingit oᴋalauᴋput, Anernermut ajunginermut kajungertitauvlutik.