II Kronika 9 - Labrador Inuttitut Heritage Bible

Salomob nallipsartauninga arnamut Arabiamiut attanninganut. Akluininga, toᴋᴋungalo.

¹ Arabiamiullo attanningata arnab Salomob tussaumajanga tussaramiuk, ᴋaivok Salomo ôktoromavlugo nallaupsarutiksanut, tikkiporlo Jerusalemut, najorteᴋarlune unnuktunik Kamelinik, mingoarutiksanik pivianartunik, Goldeniglo unnuktunik, ujarᴋaniglo pivianartunik nangmartunik. Salomomullo tikkiname oᴋarvigiva tamainik, omamigijaminik.

² Salomoblo tamainik oᴋautiva apperᴋutigijanginik; nallonartoᴋalaungilarlo sunamik Salomomut, oᴋauserilaungitanganik tapsomunga.

³ Arabiamiullo attanningata arnab Salomob illissimaninga, iglolo igloliorlauktanga takkogamigit,

⁴ Nerᴋiksallo tapsoma nerrimavianut illingajut, kivgaᴋotingitalo iksivaningit, nangerningillo, naipertutsiarningillo, anorângillo, immiksaliorᴋotingillo, tapᴋoalo annorângit, majutingillo majoarutigijangit Nalekab iglunganut, tagva uimâmajotut-îlerpok.

⁵ Attannerlo oᴋautiva: Mikseᴋârtôvok tussarlauktara nunaᴋotimne illinganît illissimanîllo pivlugik.

⁶ Oᴋausingille okperilaungilakka, tikkiᴋârtinanga, takkolugolo ijimnut. Ahâglo, illissimanersoarpît ᴋoppanganiglonêt oᴋautsaumalaungilanga. Tussaumajak tussarlauktara pitikipat.

⁷ Pilloridlarput anguteᴋotitit, pilloridlarpullo kivgaᴋotitit nangertsainartut sângne, illissimanerniglo tussarlutik.

⁸ Nalegak Gudit nertortaule nagligijit, iksivautaᴋotiminut ingitilaungmattit attannertut, Nalegak Gudit pivlugo. Gudivit Israelitit nagligingmagit, soᴋᴋosijuititsomavlugit soraijuitomik, igvit attanningortilaukpâtit tapᴋonunga, namanermik idluarnermiglo attorᴋovlutit.

⁹ Tapsomalo arnab attannek tunnitsivigiva Goldinik Talentinik 120 ginik mingoarutiksaniglo tippitsiariktunik unnuktunik, ujarᴋaniglo pivianartunik. Mingoarutiksaᴋalaungilak tapᴋotitunak, Arabiamiut attanningata tunnijangititut attannermut Salomomut.

¹⁰ Huramiblo kivgangit, Salomoblo kivgangit Goldenik ᴋaitsilauktut Ofiremit, ᴋaitsilaurivuttauk ᴋejungnik Sandelemik attelingnik, ujarᴋaniglo pivianartunik.

¹¹ Salomolo sannajauᴋojivok ᴋejungmit Sandelemik attelingmit majutinik Nalekab iglungane, attanniublo iglungane, Harfeniglo noakseralingniglo imgerpaktunut. Sivurngane ᴋejuit taimaitut takkojaulaungilat Judakut nunangane.

¹² Attanniublo Salomob Arabiamiut attanningat tunnitsivigiva tamainik tussujanginik, tuksiararijanganiglo, tapsoma arnab ᴋailauktangita attannermut assinginik. Allarporlo, aulârlunelo nunaᴋotiminut, kivgaᴋotine illagellugit.

¹³ Goldele tikkiutjaulauktut Salomomut Jareme attautseme Talenteôlaukput 666 git,

¹⁴ Niuvertit niuverniartullo ᴋaitangit kittiᴋassiutinagit. Arabiamiullo attanningit illunatik, angajoᴋaillo nuname, ᴋaitsivut Goldemik Silberemiglo Salomomut.

¹⁵ Attanniublo Salomob sappulutaksat 200 dit sannavait Goldemit namanerpaujomit, Seᴋᴋeletut 600 ditut oᴋumaitigijut Golde attorpait sappulutaksamut attautsemut.

¹⁶ Tartschillo 300 dit Goldemit namanerpâmit, Seᴋᴋeletullo 300 ditut oᴋumaitigijut Golde, attorpait Tartschemut attautsemut.

¹⁷ Attanniublo pitipait igloksoarmut, nappartut Libanonemit igloksoanganik attelingmut. Attanniublo iksivautaksoak sannava Elefantit tôganginit, sillaparpâlo Goldemik illaᴋangitomik.

¹⁸ Iksivautaksoarlo tungmeraᴋalaukpok pingasojortunik, ikkovraᴋalaukporlo attajomik Goldeôjomik, ajakpaviᴋalaukporlo maggungnik iglugêngnik tallingnut iksivavingme, Lœwingoaklo nangerpuk ajakpavikita tungangne.

¹⁹ Lœwingoallo 12 it nangerlaukput tagvane tumerangne pingasojortune ittivigêngine. Taimaitomik sannamajoᴋalautsangilak attanniovit nalliane.

²⁰ Salomoblo illulerᴋutingit immiksakautit Goldeolaukput; iglublo nappartut Libanonemit iglungata illulerᴋutingit illunatik Goldeolaukput, Silbere sunaunasugijautsangimat Salomob nalliuningane.

²¹ Attaniub umiaksoaᴋotingit umiaktormatta immarbingme, Huramib kivgangit illagilugit, utterᴋattarlutiglo Jarine pingasune attausêarlutik, tikkiutjilutiglo Goldemik Silberemiglo, Elefantillo tôganginik, pissuktuniglo itjuarsijunik, tingmianiglo Fauinik attelingnik.

²² Taimak attannek Salomo anginersaulaukpok attannernit nunamêtunit tamainit, akluinerme illissimanermelo.

²³ Attannillo nunamêtut illunatik Salomob kênanga ᴋennerasuarpât sillatuninga tussaromavlugo, Gudib tunnilauktanga tapsoma omattinganut.

²⁴ Illunatiglo attunît atsivigiᴋattarpât pilliutimingnik, illulerᴋutinik Silbereojunik Goldeojuniglo, annorângniglo, sakkuniglo, mingoarutiksaniglo, horsiniglo, horseojartuniglo Jarine tamaine.

²⁵ Salomolo horseᴋuteᴋalaukpok ᴋemmuktunik 4,000 dinik, sorsuktuksaᴋuteᴋalarmelo ablangajunik horsit ᴋângine 12,000 dinik, inneᴋarᴋojaulaukpullo iglugasaksoarne, ᴋammutingnut aksalloalingnut illingajune, attanniublo najugâne Jerusaleme.

²⁶ Attanniotilaukporlo attannernut illunainut, kôb miksânit Filisterit nunangat tikkidlugo, Egipteniblo kiglilervinga tikkidlugo.

²⁷ Attanniublo Jerusaleme Silbere taimak unnuktigijotipait ujarᴋatitut, Cederillo nappartutitut Sikomorinik atteᴋartutitut, naksarne perortutitut.

²⁸ Atsiviomavorlo horsinik Egiptenemit nunanillo illunainit.

²⁹ Unipkautsit assingit sulle Salomo pivlugo, sivurlit kingorlillo, ahâk, tapᴋoa aglaksimavut nallautaijub Nathanib aglangine, Ahiablo Silomiub nallautaijutigijangine, Jeddiblo takkojub takkotitauningine, Jerobeame Nebadib erninga pivlugo.

³⁰ Salomolo attanniotilaukpok Jerusaleme Israelitit illunamasianginut Jarit 40 git nâlugit.

³¹ Salomolo sinnisilerpok, atâtagijaminut ailune, illijartortauvorlo Davidib atâtame iglugasaksoangine. Rehabeamelo erninga attanningorpok innangêrdlugo.