II Kronika 7 - Labrador Inuttitut Heritage Bible

Tempelib attortautainarningata nâninga. Gudiblo sakᴋerninga Salomomut, angerningillo sillungningillo.

¹ Salomoblo tuksiarnek nâgamiuk, ikkoma kattakpok ᴋillangmit, nerrilunelo tunnergutinik otaksanik, tunnergutiniglo toᴋᴋotaksanik; Nalekablo ânanauningata iglo nâmalerpa;

² Ajochertuijut itterungnarlungimatta Nalekab iglunganut; Nalekab ânanauningata Nalekab iglunga nâmangmago.

³ Israeliblo ᴋittorngangita illunatik ikkoma takkovât kattaktillugo, Nalekablo ânanauninga iglub ᴋollâne, okkolerlutiglo kênatik pûvlugit nunamut, opigosulutiglo. Nalegarlo ᴋujagivât pitsiarmat, napkiningningalo sorairniatsangimat.

⁴ Attannerle innugasaksuillo illunatik tunnergutinik tunnijivut Nalekab sângane.

⁵ Attannerlo Salomo tunnijivok tuktuvangnik 22,000 dinik, saukaniglo 120,000 dinik, taimaglo Salomob innugasaksuillo Gudib iglunga attortainarlugo ivsornaitipât.

⁶ Ajochertuijullo nangerput pinniaraksamingne, Levitillo Nalekab noakseraliᴋotinginik, attanniub Davidib sannajauᴋolauktanginik attorlugik, Nalegak ᴋujalivigilugo, napkiningninga soraijuimat, Davide imgerlune nertordlerlaurangat tapkutiguna. Ajochertuijullo akkingerlugit Trompetesijarput, Israelitilio illunamasiatik nangerput.

⁷ Salomoblo avaluliorsimajok ᴋetterdlek, Nalekab iglungata sivurânetok ivsornaitipa, tunigamigit tagvane tunnergutit ôtaksat, tunnergutillo ᴋujalijutiksat, Altare kannujaujok Salomob sannajauᴋolauktanga mikkiluarmat tunnergutinut otaksanut, tunnergutinullo nerᴋiksanut, tunnergutillo ᴋujalijutiksat orksunginut.

⁸ Taimaglo Salomob nalliutome taipsomane uvloksiorvik attorpa uvlut 7 it nâlugit, illagellugolo Israelitit illunamasiangit, illagêt unnuktovaksuit Hemathemit Egiptenib kônga tikkidlugo.

⁹ Uvlullo 8 ingane kattimaniksaᴋarput; Altarible attortautainarninga uvloksiorpât uvlut 7 it nâlugit, uvloksiorviglotauk uvlut 7 it nâlugit.

¹⁰ Taᴋᴋillo 7 ingata uvlungita 23 gingane innugasaksuit angerarᴋovait iglunginut ᴋuviasuktillugit maksoatillugillo, ajungitut tamaita pivlugit Nalekab saᴋᴋertilauktangit Davidemut Salomomullo, innuᴋotiminullo Israelitinut.

¹¹ Taimak Salomob Nalekab iglunga, attanniublo iglunga innerpâk, tamaitalo omattime illumigijangit sannajomavlugit Nalekab iglungane, iglominelo sullivait.

¹² Nalekablo Salomo saᴋᴋervigiva unnuarme, oᴋautilâlo: Tuksiarnît tussarlaukpara, innelo tamanna annerimavara uvamnut tunniorᴋaiviksauᴋovlugo tunnergutiksanik.

¹³ Ahâk, ᴋillak pallangairupko, sillaluᴋonnago, piglertaujartullonêt nerriᴋogupkit nunamik, nussilingnartorlonêt tikkikogupko innuᴋotima akkornganut,

¹⁴ Innuᴋotikkalo attera malliklugo atserarsimajut nikkanarsarpatta, tuksiarpattalo, kênaralo ᴋennerlugo pikpatta, sagiarlutiglo apᴋotigijamingnit idluitomit; tagva ᴋillangmit tussaromavunga, issumagijungnailugillo ajorningit, nunangallo innulilugo.

¹⁵ Manna ijikka uitatsainartuksauvuk, siutikkalo kammatsiartuksauvuk tuksiarnernik attortaujunik inneme tamattomane.

¹⁶ Taimaglo manna iglo tamanna annerimavara ivsornaitilugolo, attera tagvanêᴋovlugo issoᴋangitomut, ijikkalo, omattigalo tagvanêtuksauvut nalliutune tamaine.

¹⁷ Sâmnelo agvertarniaruvit sorlo atâtait Davide agvertarlaungmat, piniaruvit taimaluatsiamik sorlo perᴋogapkit, perᴋojakkalo idluarijakkalo malligungne;

¹⁸ Tagva attanniovikpît iksivautanga soᴋᴋosijuititsomavara, sorlo Davide atâtait angervigilaurapᴋo, oᴋalaurama: Ajoksartuksaungilatit angumik, nalegaujomik Israelitinut.

¹⁹ Allarniarupsele, idluarijakkalo perᴋojakkalo tunnilauktakka illipsingnut, ᴋemmagupsigik, Gudiblo assingit kivgartoriartorupsigik, tuksiarvigilugillo pigupse;

²⁰ Tagva nutsungniarpakka nunaᴋotimnit, tunnilauktamnit tapᴋonunga, iglolo tamna ivsornaiviotilauktara attimnut, eginiarpara kênama sânganit, oᴋausiovaktungortiniarparalo oᴋangoarutingortiniarlugolo innuᴋattigêksuit illunatik akkorngane.

²¹ Iglolo tamna pijariaᴋortônerpângôlauktok, tapsominga sannerᴋotsijut kakkiladlarutigijomârpât, okoromârlutiglo: Suna pivlugo Nalekab nuna una, iglolo una taimailiorvigilaukpagik?

²² Oᴋartoᴋaromârporlo: Tamanna pivlugo, Nalegak, atâtagijamik Gudingat ᴋemmalaungmatsuk, aulartitsilauktok tapᴋoninga Egiptenemit, Gudiblo assingit ungagilugit, tuksiarvigilugillo, kivgartorlugillo pilaungmatta; tamanna pivlugo tikkitauᴋolaukpait ᴋannoêtomut mattomunga tamât.