II Kronika 6 - Labrador Inuttitut Heritage Bible

Salomob tuksiarninga Tempele attortautainartillugo.

¹ Taipsomane Salomo oᴋarpok: Nalegak oᴋalaukpok inneᴋaromagame tâktome.

² Uvanga iglo igloliolauralloarpara igloksarnut, innelo innigijaksarijat soraijuitomik.

³ Attanniublo kênane allarpa, illagêllo Israelitit illunamasiangit saimartipait, illagêllo Israelitit illunatik nangerput tagvane.

⁴ Oᴋarporlo: Nertortaule Nalegak Israelib Gudinga, ᴋannerminut oᴋalauktok atâtamnut Davidemut, aggangminullo nallautsititsilauktok, oᴋalaurame:

⁵ Nalliutomit taipsomangamit aulartitsivigilauktamnit innuᴋotimnik nunamit Egiptenemit, iglugasaksuit nallianik annerosulaungilanga Israelitit kinguvarêngine illunaine, iglo igloliortauᴋovlugo, attera tagvanêᴋovlugo, angullo annerilaunginivara attannioᴋovlugo innuᴋotimnut Israelitinut.

⁶ Jerusalemele annerilaukpakka attera tagvaneᴋovlugo; Davidelo annerilaukpara angajoᴋauᴋovlugo innuᴋotimnut Israelitinut.

⁷ Davidelo issumalaungmat Nalegak Israelib Gudingata attinga iglomik igloliorlugo,

⁸ Nalegak atâtamnut Davidemut oᴋarpok: Namaktullilaukpotit issumagavit attera iglomik iglolioromavlugo.

⁹ Igville iglo tamna iglolioraksaringilat, erniville illingnit piniartub, tapsoma attera iglolioraksariva.

¹⁰ Taimak Nalekab manna oᴋautsine oᴋauserilauktane nallautsitimavait, uvangalo atâtaga Davide innangêrlaukpara, iksivalungalo Israelib iksivautaksoangane, sorlo Nalekab oᴋalaungmat, iglolo igloliorlaukpara Nalekab Israelib Gudingata attinganut;

¹¹ Iklerviglo takkamunga pitilaukpara, Nalekab angerninganik pittalik, angerlauktanganik Israelib ᴋittornganginut.

¹² Salomoblo Nalekab Altareᴋotinga sangariartorpa, illagêt Israelitit illunamasiatik najutitillugit, agganelo issangmivait.

¹³ Salomoble ikkovrak kannujaujok sannalaukpa, nappartilaukpâlo inniub avaluliorsimajub ᴋerᴋânut, tallitut tallimatut tukkimutotigijok, sannimutotigijorlo, tallitullo pingasotut poktotigijok; tapsoma ᴋânganut nangeriartorpok, serᴋortorlunelo illagêt Israelitit illunamasiatik sângine, agganelo issangmivait ᴋillangmut,

¹⁴ Oᴋarlunelo: Nalegak Israelib Gudinga, Gudeᴋangilak illiktut ᴋillangmêlonêt, nunamêlonêt; soᴋᴋosijuititsijotit angernermik, napkiningnermiglo kivgaᴋotingnut, agvertartunut sângne omamut tamânut.

¹⁵ Nallautsititsiᴋauvotit kivgaᴋotingnut Davidemut, atâtamnut oᴋauserilauktarnik tapsomunga, ᴋannernut oᴋauserilaukpat, aggangnullo nallautsitilaukpat, sorlo uvlorme tamattomane-îmat.

¹⁶ Manna Nalegak Israelib Gudinga, kivgait Davide, atâtaga, soᴋᴋosijuititsivigilauruk oᴋauserilauktarnik tapsomunga, oᴋarlutit: Ajoksartuksaungilatit angumik, sâmne iksivajomik Israelib iksivautangane, ernitit kammatsiartuinarpatta apᴋotigijamingnik, agvertarᴋovlugit perᴋojamne, sorlo igvit sâmne agvertarlauravit.

¹⁷ Manna Nalegak Israelib Gudinga, oᴋautsitit mikseᴋârtotikit, oᴋauserilauktatit kivgaᴋotingnut Davidemut.

¹⁸ Gude nallâgut inneᴋaromagalloarᴋa innungne nuname? Ahâk ᴋillaub ᴋillaillo ᴋillangita illunamasiatik illumajungnangilatit, ᴋannok tagva iglo una igloliorlauktara pijungnarajarᴋa tamattominga?

¹⁹ Sâlaurilletôk Nalegak Gudiga, kivgaᴋotivit tuksiarninganut, ᴋennuninganullo, tussarᴋovlutit ᴋennunernik tuksiarnerniglo kivgavit attortanginik sângne,

²⁰ Ijikik uitatsainarᴋovlugik uvlotillugo unuarmelo iglomut omunga, innemut oᴋautigilauktarnut, attit tagvungatitsomagangne, tussarᴋovlutit tuksiarnermik, kivgavit tuksiarnerijanganik, inneme tamattomane.

²¹ Taimak tussalaurit manna kivgavit innuᴋotivillo Israelitit ᴋennuninginik, ᴋennuneriniartanginik inneme omane: tussalaurugle innemit innigijarnit, ᴋillangmit, tussarungnelo issumagijungnainilaurit.

²² Kina idluitullirangat innuᴋattiminut, angermaringnermiglo illitsiviokpat, attoraksanganik, angermaringnerlo âtaulerpat Altareᴋotivit sânganut, iglome omanêtub,

²³ Tagva igvit tussalaurit ᴋillangmit, pinniarlutillo, kivgatillo erᴋartorkit, passijaksak akkiniarlugo piᴋovlutit, agvertarningalo pitilugo niaᴋoanut, idluartorlo idluarnerarlugo piᴋovlutit, tunnitsivigilugolo idluarninga malliklugo.

²⁴ Innuᴋotitillo Israelitit sâlagijaulerangatta omigijimingnut, idluitullilauramik illingnut, sâgiarpattalo attillo kigligiutigilugo pikpatta, tuksiarpattalo ᴋennulutiglo illingnut iglome omane;

²⁵ Tagva igvit tussalaurit ᴋillangmit, issumagijungnailugillo innuᴋotivit Israelitit ajorningit, uttertilugillo nunamut, tapᴋonunga, atâtagilauktanginullo tunnilauktarnut.

²⁶ ᴋillak parnanairsimalerangat sillaluluganelo, idluitullilaungmattalo illingnut, tuksiarniarpattalo inneme omane, attillo kigligiutigilugo pikpatta, sâpattalo ajornermingnit manigotitigangne,

²⁷ Tagva igvit tussalaurit ᴋillangme, issumagijungnailugillo kivgaᴋotivit innuᴋotivillo Israelitit ajorningit, ajochertorlauᴋârdlugit apᴋosinermik ajungitomik, agvertarvigijaksarijanganik; tunnijilutillo sillalungnermik nunaᴋotingnut, tunnilauktarnut innuᴋotingnut, innigijauᴋovlugo tapᴋonunga.

²⁸ ᴋâviᴋalerangat nuname, nûsilingnartoᴋarangallonêt, perorsijat ᴋaᴋᴋojaksat ᴋernersilerangattalonêt, piglertaujartoᴋadlarangallonêt nerrijoksoarnik, omigijingitalonêt nuname ittertarvingit illumajarangagit, pagvinartoᴋarangallonêt, ᴋannimaseᴋarangallonêt nallianik;

²⁹ Tuksiarnerit tamaita, ᴋennunerillo tamaita, tagva pinniartut, inuit nallianut, innuᴋotingnullo Israelitinut illunainut, missigilerpatta illunatik attunît pagvisartaunermingnik, ânianermingniglo, aggatiglo issangminiarpagit iglomut omunga;

³⁰ Tamanna igvit tussalauruk ᴋillangmit, innemit innigijarnit, issumagijungnainilutillo, illunaitalo attunît pinniarvigikit apᴋosinerilauktangit tamaita malliklugit, sorlo omattingit illitarigangne; igvit kissivit innuit ᴋittorngangita omattingit illitarigangne.

³¹ Sivoralerᴋovlugit illingnik, agvertarᴋovlugillo apᴋosineᴋotingne uvlut tamaita, innotillugit nuname tunnilauktarne atâtagijaptingnut.

³² Takkorngartattauk nalliat, innuᴋotingnut Israelitinut illingalungitok, tikkilerangat nunamit ᴋanningitomit, attit angijok, aggaktillo pitsartojut, tallillo issangmijok pivlugit, tikkipallo tuksiarlunelo iglomut omunga;

³³ Tagva igvit tussalaurit ᴋillangmit, innemit innigijarnit, pinniarniarlutillo tamainik nipliarutigijanganik illingnut, innuᴋattigêksuit nunamêtut illunatik atternik illitarksilerᴋovlugit, sivuragilutillo piᴋovlugit, innuᴋotititut Israelitititut, tukkisilerᴋovlugillo iglo una, igloliolauktara, attit malliklugo atserartaungmat.

³⁴ Innuᴋotitit aularniarangatta unatadlarnermut, omigijitik sorsugvigilugit, apᴋome tilliklerutigijarne tapᴋoninga, tuksiarpattalo illingnut, iglugasaksuit ukkoa annerilauktatit sâdlugit, iglolo igloliolauktara atternut sâdlugo:

³⁵ Tagva igvit tuksiarningit, ᴋennuningillo tussarlaukit ᴋillangmit, idluartomiglo sakᴋêvigikit.

³⁶ Idluitulliniaraikpatta illingnut, (innuᴋalungimat idluitullilungitomik) illulugvigigungnelo, tunnilugillo omigijinginut, sâlagijingitalo parngnanairsortauvlutik aularutikpagit nunamut ᴋanningitomut ᴋannitomullonêt;

³⁷ Omamiutarilerpatsuglo nuname parngnanairsimavigijamingne, sâlerpattalo, ᴋennulerpattalo illingnut, nuname parngnanairsimavigijamingne, oᴋarlutiglo: Idluitullilaukpogut; tammarlauklutalo, innorlulaukpogut;

³⁸ Taimaglo sâlerpatta illingnut omamut tamânut, nuname parngnanairsimavigijamingne, parngnanairsortauvlutik aulartitauvigijamingne, tuksiarpattalo sâlutik nunagijamingnut atâtagijanginut tunnilauktarnut, iglugasaksoarnullo annerilauktarnut, iglomullo igloliorlauktamnut atternut;

³⁹ Tagva igvit tuksiarningit, ᴋennuningillo tussarlaukit ᴋillangmit, innemit innigijarnit, idluartomiglo sakᴋêvigikit, innuᴋotitillo issumagijungnaivigikit idluitullininginik illingnut.

⁴⁰ Taimak manna Gudiga ijikik uitalaulik, siutikiglo ᴋammatsiarlaulik, tuksiarnermik inneme omane.

⁴¹ Mannalo Nalegak Gude ᴋângatarit innemut merngoêrservingnut, igvit, pitsartunivillo iklervinga. Ajochertuijoᴋotitit Nalegak Gude attititaulit piulijaunermik, idluarijatillo ᴋuviasulerlit ajunginek pivlugo.

⁴² Igvit Nalegak Gude mingoartauᴋojavit kênanga allârtiniarnago; erᴋailaurit saimanermik angerutigijaumajomik kivgaᴋotingnut Davidemut.