II Kronika 5 - Labrador Inuttitut Heritage Bible

Tempelib attortautainarninga.

¹ Taimaglo sannajaksat Salomob sannajangit Nalekab iglungane innertaumalaukput. Salomoblo ittertipait tamaita atâtame Davidib ivsornaitilauktangit, tagva Golde Silberelo perᴋutillo sunatuinait, illivaillo perᴋutitalingmut Gudib iglunganêtomut.

² Tagva Salomob Israelitit angajoᴋangit illunaita, kinguvarêt angajoᴋaunerôjungit, atâtallo attanningit, kattiᴋovait Jerusalemut, Nalekab angerningata iklervinga âtauᴋovlugo takpaunga Davidib iglugasaksoanginit, tagva Zionemit.

³ Kattimalerpullo attannermut Israelib angutingit illunamasiatik uvloksiorvingme, tagva takkit 7 ingane.

⁴ Israelitillo angajoᴋaunerôjungit illunatik tikkiput. Levitillo iklervik erksukpât,

⁵ Apâllo takpaunga, tuppek kattimaviojok, perᴋutillo ivsornaitut tuppermetut illaliudlugit, tapᴋoa ajochertuijut Levitillo takpaungartipait.

⁶ Attannerlo Salomo, illagêllo Israelitit kattimalauktut tapsomunga, iklerviub sânganelaukput tunnijilutiglo tunergutiksanut saukanik, tuktuvangniglo, taimak unnuktigijunik, kittitaujungnarlaungimatta unnumut.

⁷ Ajochertuijullo Nalekab angerningata iklervinga ittertipât takkamunga inniksanganut, innemut iglub kinguanêtomut, ivsornainerpangôjomut, Kerubingoak esarungita attânut.

⁸ Kerubingoaglo esarᴋotik issangavait iklerviub inningata ᴋollâne, ullikpaillo iklervik akkerautigiglo ᴋollânit.

⁹ Akkerautiglo taimak takkitigijolaukpuk, issungit takkojaulaungmatta iklervingmit ivsornaitovingmit, inniub ᴋinguanêtub sângane; igluble sivuanit takkojaulaungilat. Tagvanêtuarporlo uvlok tamanna tikkilugo.

¹⁰ Pittaᴋalaungilarlo sunamik iklervingme aglagvik ujaraujuk assigingnik, Mosesib illilauktakita takkamunga Horebeme, Nalekab Israelib ᴋittorngangit angerᴋattigilaungmagit aulartillugit Egiptenemit.

¹¹ Ajochertuijullo annilertillugit ivsornaitovingmit (ajochertuijut najutijut illunamasiatik sujungaitilauramik, ingmigolingatitauningit kamagijaulaungilat),

¹² Levitillo imgerpaktut, tapᴋoa illunatik, Assafe, Hemanelo, Jedithunelo, erningillo, ᴋattangutingillo, annorarsimavlutik sâtunik, Cimbelijarlutik, Psalterilijarlutiglo, Harfelijarlutiglo nangerput Altarib kittâne, najortanginelo ajochertuijut 120 git Trompetesijartut;

¹³ Imailaukporlo attausênak Trompetesijarajarune imgerajarunelo, nippe attausênak tussartaunajarune Nalegak nertorlugo ᴋujagilugolo. Trompetillo, Cimbelillo noᴋaᴋseraggillo sunatuinait, nertordlertullo Nalekamik, pitsiarmat napkiningningalo sorairniatsangimat issoᴋangitomut, nippingit pigialermatta: tagva Nalekab iglunga illumertaulerpok nuvujarmik,

¹⁴ Ajochertuijut nangerungnarlaungimatta kivgartorlutik nuvujak pivlugo; Nalekab ânanauningata Gudib iglunga illunât nâmangmago.