II Kronika 36 - Labrador Inuttitut Heritage Bible

Josiab malliktingit sittamat; Judakut aulartitauningat Babelemut. Utterᴋojauningat Koresemut.

¹ Nunablo innugasaksoangita Josiab erninga Joahas tiguvât, attanningortilâllo atâtanga innangêrlugo.

² Joahase Jareᴋalaukpok 23 ginik attanningorame, attanniotilunelo Jerusaleme takkit pingasut nâlugit.

³ Egiptenemiullo attanningata attanniojungnaitipa Jerusaleme, nunalo akkilêᴋova Talentinik Silberinik 100 dinik, Talentemiglo attautsemik Goldemik.

⁴ Egiptenemiullo attanningata Eliakime ᴋattanguta attanningortipa Judakunut Jerusalemiunullo, attingalo ablatsangortipa Jojakimemut. Nechoble ᴋattanguta Joahase tiguva tikkiutilâlo Egiptenemut.

⁵ Jojakime Jareᴋalaukpok 25 ginik attanningorame, attanniotilunelo Jarit 11 it nâlugit Jerusaleme, pinniarporlo Nalekab Gudime idluigijanginik.

⁶ Nebukadnezarelo Babelemiut attanningat takpaungardlune opalukpa, ᴋellaksorlâlo ᴋellaumgujanut, aularutijomavlugo Babelemut.

⁷ Nalekab iglungata illulerᴋutingita illangit Nebukadnezarib Babelemiut attanningata tikkiutipaittauk Babelemut, pitilaitalo Tempeleᴋotiminut Babelemetomut.

⁸ Unipkautsit assingit Jojakime pivlugo, makkojungnartulliningillo, nachvartaulertut tapsomane, ahâk, tamakkoa aglaksimavut Israelitit Judakullo attanningita aglangine. Erningalo Jojachin attanningorpok innangêrdlugo.

⁹ Jojachin Jareᴋalaukpok 18 nik attanningorame, attanniotilunelo taᴋᴋit pingasut, uvlullo tallimaujortut nâlugit Jerusaleme, pinniarporlo Nalekab idluigijanginik.

¹⁰ Jarelo ᴋângermat, Nebukadnezar tilliklerpok aijauᴋolâlo Babelemut, illulerᴋutit pivianartut Nalekab iglunganêtut illagilugit, Zedekialo ᴋattanguta attanningortipa Judakunut Jerusalemiunullo.

¹¹ Zedekialo Jareᴋalaukpok 21 nik attanningorame, attanniotilunelo Jarit 11 it nâlugit Jerusaleme.

¹² Pinniarporlo Nalekab Gudime idluigijanginik, manigotitilungilarlo nallautaijub Jeremiab oᴋâlalauktub Nalekab ᴋanninganit sângane.

¹³ Nalagungnaipâlo Nebukadnezar Babelemiut attanningat, angermaringnermik Gudeme tigusilauktok tapsomangat, tappatôsilunelo, omattinelo mangaitipa, sâlerᴋonago Nalekamut Israelib Gudinganut.

¹⁴ Ajochertuijut angajoᴋaunerojungit illunatiktauk innugasaksuit illagilugit idluineᴋartitsivut unnuktunik, nallojut makkojungnartulliningit sunatuinait malliklugit, ivsornartipâllo Nalekab iglunga, ivsornaitilauktanga Jerusaleme.

¹⁵ Nalegarlo atâtagijangita Gudingat tilliklerpok tapᴋonunga, tillijamigut uvlamit. Innuᴋotine iglunelo ivlerigamigit.

¹⁶ Tapᴋoale Gudib tillijangit mittautigivait nachogilaitalo oᴋausingit, ijorivaillo nallautaijoᴋotingit, Nalekab kanningajarninga innuᴋotine pivlugit angijororᴋârtinago, innulijaujungnarungnaimatta.

¹⁷ Tagva tikkitauᴋovait Kaldaerit attanninganut, tapsoma angutingit innuosuktut toᴋᴋopait iglome ivsornaitovingane, ivlerilaungilaillo innuosuktut angutillonêt uigârsuillonêt innutoᴋaujullonêt ᴋêrtojullonêt; Gudib illunaita tunnivait tapsoma agganginut.

¹⁸ Illulerᴋutillo Gudib iglunganêtut mikkijut angijullo, perᴋutillo Nalekab iglunganêtut, attanniublo angajoᴋâᴋotingitalo perᴋutingit pivianartut, âtauᴋovait Babelemut.

¹⁹ Gudiblo iglunga ikkipât, Jerusalemiblo avalungita ᴋarmangit serᴋomipait, igloksoaᴋotingillo illunaita ikkipait, perᴋutingillo pivianartut illunaita asserorpait.

²⁰ Aularutivaillo Babelemut saviksoarmit amiakolauktut, tagvanelo kivgaulaukput tapsomunga erninginullo, Persiamiut attanniovingat attanniotilerᴋârtinago.

²¹ Nallautsilerᴋovlugit Nalekab oᴋausingit Jeremiab ᴋanningagut, nunab Sabbatingit namaksilerᴋârtinagit. Nalliutok tamna illunât nuna asserorsimatillugo Sabbateôlaungmat, Jarit 70 it nâlerᴋârtinagit.

²² Koresible Persiamiut attanningata Jaringita sivurlingane, nallautsilerᴋovlugit Nalekab oᴋausingit, oᴋauserilauktangit Jeremiab ᴋanningagut, Nalekab Koresib Persiamiut attanningata annerninga tuppaksarpa, akpautigijauᴋojiᴋovlugo attanniovingmine illunane, aglaktigullotauk, oᴋarᴋojilunelo:

²³ Imâk Korese Persiamiut attanningat oᴋarpok: Nalekab ᴋillaub Gudingata tunnitsivigilaukpânga attanniovingnik tamainik nunane, perᴋolaukpângalo iglomik igloliorlugo Jerusaleme Judame. Kina manna akkonapsingne tapsoma innuᴋotinginut illingajok, tamna Nalekab Gudingata aipariliuk, takpaungarlunelo.