II Kronika 35 - Labrador Inuttitut Heritage Bible

Josiab attorninga Passamik, toᴋᴋotauningalo unatadlarnerme.

¹ Josialo Passamik attorpok Jerusaleme Nalegak pivlugo, toᴋᴋotsivullo Passamik taᴋᴋib sivurliub uvlungita 14 ingane.

² Ajochertuijullo pitipait sullijaksanginut, kajungersarpaillo pinniarninginut Nalekab iglungane.

³ Oᴋarporlo Levitinut, Israelitinik illunainik ajochertuijunut, Nalekamullo ivsornaititaumajunut: Iklervik ittertisiuk iglomut Salomob Davidib erningata Israelitit attanningata igloliorlauktanganut. Erksugaksaringilasse. Tagva manna Nalegak Gudise innuᴋotingillo Israelitit kivgartorsigik.

⁴ Opalungaijaritselo illipsingnik atâtagijapse iglungita ingmigolinganingit malliklugit, sorlo Davidemut Israelitit attanninganut, erninganullo Salomomut aglaksimangmat;

⁵ Nangerluselo ivsornaitovingme, atâtagijapse iglungita ingmigolinganingit malliklugit, ᴋattangutipse innugasaksuit erningita akkorngane, Levitillo atâtagijamik iglungita ingmigolinganingit malliklugit.

⁶ Toᴋᴋotsiluselo Passamik, ivsornaitiluselo, ᴋattangutiselo opalungaijarsigik, pinniarᴋovlugit Nalekab oᴋausingit Mosesekut malliklugit.

⁷ Josialo innugasaksoarnut tunnijivok saugârsungnik tuktungajoarᴋaniglo (tamainik Passamut illingajuksanik illunainut najutijunut) unnurningit 30,000 diolaukput, tuktuvângniglo 3,000 dinik; illunatiglo attanniub perᴋutinginit.

⁸ Angajoᴋaᴋotingille tunnijivut pijarallutik innugasaksoarnut, ajochertuijunullo, Levitinullo, (tagva Hilka, Sacharjalo, Jehielelo angajoᴋaunerôjut Gudib iglungane ajochertuijut akkorngane,) Passamut 2,600 dinik saukanik, tuktungajoarᴋaniglo, tuktuvângniglo 300 dinik.

⁹ Kananjale, Semajalo, Nethaneelelo, ᴋattangutingillo Hasabja Jejel, Josabadelo, angajoᴋaunerôjut Levitinut, tunnijivut Levitinut Passab tunnergutiksanginut 5,000 dinik saugârsungnik tuktungajoarᴋaniglo, tuktuvângniglo 500 dinik.

¹⁰ Taimaglo kivgartornek Gudemik aᴋiksortaumalaukpok; ajochertuijullo nangerput innimingne, Levitillo ingmigolinganitik malliklugit, attanniub perᴋojanga malliklugo.

¹¹ Passamiglo toᴋᴋotsivut, ajochertuijullo tapᴋoa agganginit auk serᴋerartipât, Levitillo aktorpait.

¹² Apterpaillo tunnergutiksat ôtaksat, tunnilugit atâtat iglungita abvakunginut, tunnergutautilugit Nalekamut, sorlo aglaksimangmat Mosesib aglangine. Taimailiorlaukpaittauk tuktuvait.

¹³ Passalo ikkoalavât ikkomamut sorlo pijuksaungmat, ivsornaititaumajulle igavait ukkusingne ᴋattanelo ᴋallutanelo; tuavitomiglo âpait innugasaksoarnut.

¹⁴ Kingornganelo âᴋiksoivuttauk nangminermingnut, ajochertuijunullo. Ajochertuijut Aronib erningita tunnergutit ôtaksat, orksuglo sulliarivait unnuak tikkidlugo. Tamanna pivlugo Levitit attuinaruteriaᴋalaukput nangminermingnut ajochertuijunullo Aronib erninginut.

¹⁵ Imgerpaktullo Assafib erningit nangerput innimingne Davidib attanniub Assafiblo, Hemaniblo, Jedituniblo takkojub perᴋojangat malliklugo, upkoaniglo udsertortut upᴋoaᴋsoarne (nangerput) nûlungilallo sullijaksamingnit, ᴋattangutingit Levitit attuinaruteringmatta pivlugit.

¹⁶ Taimak kivgartornek Gudemik Nalekamik âᴋiksorsimalaukpok uvlorme taipsomane, Passa attorlugo, tunnergutillo ôtaksat tunnilugit Nalekab Altaringata ᴋângane, attanniub Josiab perᴋojanga malliklugo.

¹⁷ Taimak Israelib ᴋittorngangita, najutijut, Passa attorpât, uvloksiorvik ᴋaᴋᴋojanik sêrnaᴋangitunik nalliutome taipsomane, uvlut 7 it nâlugit.

¹⁸ Tapsotunarle Passamik attortoᴋalaungilak Israeleme, Samuelib nallautaijub nalliuninganit, Israelitillo attanningit illunatik Passamik attorlaungilet taimaitomik Josiab, ajochertuijullo, Levitillo, Judamiullo illunatik Israelitinillo najutijut, Jerusalemiullo attorlauktangititut.

¹⁹ Josiab attanniovingata Jaringita 18 ingane Passa tamanna attortaulaukpok.

²⁰ Tamakkoa Josiab sattortautitsiningata iglomik kingorngane, Necho Egiptenemiut attanningat takpaungarpok, ᴋarchemis Fratemetut sorsugomavlugit. Josialo aularpok pâromavlugo.

²¹ Taipsomale tillijanik tilliklervigiva oᴋautsauᴋolâlo: Suniarpigit Judakut attanninga? Opalugvigingilagit manna innugasaksuille taipkoa unatadlartakka; Gudelo oᴋarpok tuavituksaugama. Gude aiparijiga akkerartorungnairuk, asseroiᴋonago illingnik.

²² Josiable kênane sangulungila tapsomangat, anorâminiglo pissertorpok sorsuᴋattigijomavlugo, Nechublo oᴋausingit, Gudib ᴋaninganit nalangilait; tikkiporlo Megiddob naternanganut sorsuᴋattigijomavlugo.

²³ Pittiksertulle attannek Josia pittikpât; attanniublo kivgane oᴋautivait: Nûtisinga, angijomik ikkilersimagama.

²⁴ Kivgangitalo niotipât ᴋamutingnit ikkitilâlo ᴋamuteᴋotingita aipanganut, âpâllo Jerusalemut; toᴋᴋovorlo illijartortaulunelo atâtagijame illuvingita akkorngane. Judakullo illunamasiatik Jerusalemiullo Josia oggurivât.

²⁵ Jeremiablo Josia ârusutigiva; imgerpaktullo illunatik angutit arnallo ogguarsiutitik oᴋâlatigivait Josia pivlugo, uvlok tamanna tikkilugo, illusiotitaulaukporlo Israeleme. Ahâk aglaksimavok imgerutine ogguarsiutine.

²⁶ Unipkautsille assingit Josia pivlugo, pinniarningillo idluartut, Nalekab aglangit perᴋojaktaggit malliklugit pijut,

²⁷ Pijoᴋalauktangillo, sivurlit kingurlillo, ahâk, tamakkoa aglaksimavut Israelitit, Judakullo attanningita aglangine.