II Kronika 34 - Labrador Inuttitut Heritage Bible

Josiab attanniotininga idluartok.

¹ Josia Jareᴋalaukpok sittamaujortunik attanningorame, attanniotilunelo Jarit 31 git nâlugit Jerusaleme.

² Pinniarporlo Nalekab namagijanginik, agvertarlunelo atâtagijame Davidib apᴋosiningine, sangunanelo tallerpingmullonêt, saumingmullonêt.

³ Attannionime Jaringita 8 ingane nukapiangôvlune sulle pigiarpok atâtagijame Davidib Gudinga ᴋennerlugo, Jaringitalo 12 ingane, pigiarpok Juda Jerusalemelo pêjaivigilugit poktojunik, nappartuniglo Gudingoalingnik, Gudingoaniglo, adsingoaniglo kovimajunik;

⁴ Najutitillugolo Baalit Altaringit asserorpait, adsingoallo ᴋollanêtut nakᴋarpait, nappartullo Gudingoaggit, Gudingoallo, adsingoallo serᴋomipait, sanningortilaitalo, ᴋângasorpaillo taipkoa, tunnergutinik tunnijilauktut tapᴋonunga, illuvingita ᴋânginut.

⁵ Ikkipaillo ajochertuijut sauningit Altarit ᴋângine, êpᴋejarpaillo Juda, Jerusalemelo;

⁶ Manassekullo, Efraimekullo, Simeonekullo, Naftalikullo tikkilugit iglugasaksoangine, iglungita illungit nautertorpait, avatânê illunane.

⁷ Altarillo nappartullo Gudingoaggit, asserorêramigit, Gudingoallo serᴋalimagamigit, adsingoallo illunaita Israelitit nunanganêlauktut nakᴋarsimagamigit, utterpok Jerusalemut.

⁸ Attannionime Jaringita 18 ingane, nuna iglolo êpᴋejarêramigit, tillivait Safan, Azaljab erninga Maesejalo iglugasaksuit angajoᴋangat, Joalo Joahasib erninga, aglakpaktut angajoᴋangat, Nalekab Gudingata iglunga âkigasuarlugo.

⁹ Tikkipullo ajochertuijersoarmut Hilkiamut. Tunnitsiviôvullo kênaujanik, Gudib iglunganut âtaumajunik, Levitit upkoanik udsertortut kattersorlauktanginik Manassekunit, Efraimekunillo, Israelitillo amiakunginit illunainit, Judakunillo illunainit, Benjaminekunillo, tapᴋonangallo Jerusaleme igloᴋartunit.

¹⁰ Tunnivaillo sannajut, aulatsiᴋojaujut sullijaksanik Nalekab iglungane, agganginut. Tapᴋoalo tunnivait tapᴋonunga, sannajunut Nalekab iglungane, sujuksimaneᴋarvingine, iglo sattortautilugo âᴋiksorlugolo piᴋovlugit.

¹¹ Tapᴋoa tunnivait igloliortunut, sannajunullo, ujarᴋat ullimârsimajut, ᴋejuillo iᴋâksat pissiarilugit, ikaksallo iglunut Judakut attanningita asserorlauktanginut.

¹² Angutillo sannavut pinniaraksame tamattomane nertornarlutik. Angajoᴋaᴋartitaulaukpullo Jahatemik, Obadjamiglo, Leviteôjungnik, Merarib erninginit, Sacharjamik Mesullamemiglo Kahatib erninginit, pinniarnek tamanna aulalugo. Levitillo tapᴋoa illunatik sungiusimalaukput noakseraggit attorlugit;

¹³ Angajoᴋaulaurivuttauk akjarsijunut, aulatsijolutiglo sannajunik tamainik, sullijaksat nallianik; Levitinillo illangit aglakpaktôlaukput, aulatsijôlutiglo, udsertorteôlutiglo upᴋoaᴋsoarnik.

¹⁴ Kênaujallo Nalekab iglunganut âtaumalauktut tigungmagit tagvangat, ajochertuijub Hilkiab Nalekab aglaᴋotingit perᴋojaktaggit, Mosesekut tunnijaumajut, nachvarpait.

¹⁵ Hilkialo kiovok oᴋarlunelo Safanemut aglakpaktomut: Aglait perᴋojaktaggit nachvarpakka Nalekab iglungane. Hilkiablo aglait tunnivait Safanemut.

¹⁶ Safaniblo aglait âpait attannermut, unipkautilâlo attannek, oᴋarlunelo: Tamaita sannajauᴋojaujut kivgaᴋotingnut, sannavait.

¹⁷ Kênaujallo nachvartaujut Nalekab iglungane navilaukpait, tunnilauklugillo sannakojijut aulatsijullo pinniaraksanik agganginut.

¹⁸ Safaniblo aglakpaktub attannek nallojungnaitipa oᴋarlunelo: Hilkiab ajochertuijub aglangnik tunnitsivigilaukpânga. Safanelo attuarsivok tapᴋonane attanniub sângane.

¹⁹ Attanniublo perᴋojat oᴋausertangit tussaramigit annorane allikpait.

²⁰ Attanniublo Hilkia, Ahikamelo Safanib erninga, Abdonelo, Michab erninga, Safanelo aglakpaktok, Asajalo attanniub kivganga, perᴋovait oᴋarlunelo:

²¹ Nalegak apperiartorsiuk pivlunga, Israelitillo amiakungit pivlugit, Judakullo pivlugit, aglait nachvartaumajut pitjutigallugit; Nalekab ningarninga kovijaumajok uvaptingnut angijovaksôngmat, atâtagijapta Nalekab oᴋausingit mallilaungimagit, pinniartaililutik sorlo aglaksimangmat aglangne tapᴋonane.

²² Tagva Hilkia tapᴋoa illagilugit, attanniub tillilauktangit, aivok nallautaijomut arnamut Huldamut, Sallumib, Takehatib erningata, Hasrab, udsertortub annorânik erningata nullianganut, igloᴋartomut Jerusaleme abvakungita aipangine, oᴋarvigivâllo tamattominga.

²³ Tapsomalo oᴋautivait: Imâk Nalegak Israelib Gudinga oᴋarpok: Angut tillijise uvamnut, oᴋautisiuk:

²⁴ Imâk Nalegak oᴋarpok: Ahâk ᴋannoêtomik ᴋaisijomavunga iglugasaksoarnut makkonunga, innunginullo, ominautinik tamainik, aglaksimajunik aglangne Judakut attanningata sângane attuartaulauktune;

²⁵ Tamanna pivlugo, ᴋemmalaungmanga, Gudiblo assingit isserluanititsivigilaungmattigik, ningaksarlunga aggangita pinniarninginut sunatuinarnut. Ningarneralo navijaujuksauvok iglugasaksoarnut makkonunga, ᴋamitauniangilarlo.

²⁶ Judakullo attanninganut tillijipsingnut Nalegak apperilugo, oᴋartuksauvose: Imâk Nalegak Israelib Gudinga oᴋarpok, oᴋautsit tussarlauktatit pivlugit:

²⁷ Tamanna pivlugo omattit auksititaumangmat, manigotitilauravillo Gudib sângane, oᴋausingit tussarlaurangne, iglugasaksuit makkoa pivlugit, innungillo pitjutigellugit, manigotitilauravillo sâmne annoraᴋotitit allilaurangne, ᴋugviolauravillo sâmne, tagva uvanga tussarlaurivagittauk, Nalegak oᴋarpok.

²⁸ Ahâk illaliutitsomavagit atâtagilauktarnut, ullapirsauteᴋarlutillo illautitaujuksauvotit illuvingnut, ijikpillo ᴋannoêtut tamaita tikkerᴋojomârtakka iglugasaksoarnut makkonunga innunginullo takkojaksaringilait. Tapᴋoalo tamakkoa oᴋautigivait attannermut.

²⁹ Tagva attannek tilliklerpok kattiᴋovaillo Judakut Jerusalemiullo angajuklingit illunaita.

³⁰ Attannerlo majorarpok takpaunga Nalekab iglunganut, Judakullo angutingit Jerusalemiullo illunatik, ajochertuijut Levitillo, innugasaksuillo illunatik, mikkijut angijullo; tapsomalo attuarpait siutingita sângine, aglait angerᴋattigêngniggit nachvartaumajut Nalekab iglungane oᴋausertangit tamaita.

³¹ Attannerlo nangerpok innimine, angerᴋattigêngneᴋartitsivorlo Nalekab sângane, Nalegak malliklugo agvertaromagamik, perᴋojangillo, illusioᴋojangillo, idluarijangillo malligomavlugit omamut tamânut, tarnemullo tamânut, angernerub oᴋausertangit aglaksimajut aglangne tapᴋonane tamaita malliklugit pinniaromagamik.

³² Illangutiᴋovaillo (angerᴋattigêngnermik) Jerusalemiut illunaita, Benjaminekunillo najutijut, Jerusalemiullo pinniarput Gudib atâtagijamik Gudingata angerninga malliklugo.

³³ Josiablo makkojungnartut tamaita pêjarpait nunanit Israelib ᴋittornganginut illingajunit; illunaitalo Israeleme naipitaumajut kivgartortipait Nalekamik Gudigijamingnik. Josia innotillugo nûlungilet Nalekamit atâtagijamik Gudinganit.